அக்கம் பக்கம்

நெல்லையின் சில மனிதர்கள்

2012-01-18T17:42:00.001+05:30

நெல்லை டவுணில் எங்க வீட்டிற்கு பக்கத்து வைக்கப்பிள்ளை வழவில் என்றைக்கும் வழக்கம் போல அண்ணன் தம்பி சண்டை. இருவருக்கும் ஒரே அப்பா.அம்மாக்கள் வேறு.அவர்களின் அப்பா அப்போது மிக புகழ்பெற்ற வக்கீல்.அவர்களுக்கு 3 வீடுகள் அந்த வழவுக்குள் இருந்தது. எனவே வக்கீல் பிள்ளை வழவு என்று ஆனது.காலப்போக்கில் வைக்கப்பிள்ளை வழவு என்றாகியது.

இன்னொரு வீட்டில் ஒரு 10 வயது பையன் நாதன் தினம் புட்டார்த்தி அம்மன் கோயிலுக்கு போகாமல் இருக்க மாட்டான். அவன் நெற்றியில் தினம் துன்னூரு சும்மா பளிச்சுன்னு இருக்கும். சே, சின்ன வயதில் இப்படி ஒரு பக்தியா. நானும் என் அம்மா சொல்வது போல் காலேஜிற்கு போகும் போது ஷாட் ரூட்டில் போக வழியிருந்தும் புட்டார்த்தி அம்மன் கோயிலை ஒரு சுற்று சுற்றிட்டு கன்னத்தில் போட்டுக் கொண்டு போவேன்.ஒரு நாள் காலையில் அப்படி போகும் போது அவனை பிடித்து வைத்து சிலர் கண்டித்துக் கொண்டு இருந்தனர்.அவன் பாக்கெட்டில் இருந்து காசுகளை எடுத்துக் கொண்டும் இருந்தனர். விஷயம் இது தான் சார்வாள் தினம் கோயிலுக்கு போனதே அங்கு பூசாரி தட்டில் இருக்கும் காசுக்களை எடுக்கதான். அவனை பிடித்து இழுத்துக் கொண்டு அவன் தாயிடம் போய் ஒப்படைக்கையில் அவன் அம்மா சொன்னது தான் டாப்.கறிவேப்பிலை கொழுந்தாட்டம் ஒன்னே ஒன்னு பெத்து வைச்சுருக்கேன்.என் மகனுக்கு புட்டார்த்தி கொடுக்குறா அது பொறுக்கலையா என்று அந்த கோயில் ஆட்களை பார்த்து கேட்டார்.வந்தவர்கள் அந்த சூப்பர் அம்மாவையும் சேர்ந்து அர்ச்சனை செய்துட்டு போனார்கள்.

இன்னொரு வீட்டில் மாரியப்பன் என்ற ஒரு 10 வயது வாண்டு.கரகாட்டக்காரன் படத்தை 10 தடவை பார்த்தது. சரியான செந்தில் கோட்டி. வாழைப்பழ ஜோக்கிற்காகவே அந்த படத்தினை அப்ப பாப்புலர் தியேட்டரில் 10 தடவை பார்த்தது.

கறிவேப்பிலை கொழுந்து நாதனும், வாழைப்பழ மாரியப்பனும் இப்ப எப்படி இருப்பாங்க? ஒருமுறை நெல்லை போகும் போது தேடி பார்க்கணும்.அப்படியே வைக்கப்பிள்ளை வழவில் சண்டை பற்றி விசாரிக்கணும்.

பாப்பா is safe.....

2011-10-10T17:19:00.002+05:30

பிறந்த (செப்டம்பர் 7) அன்றே சூர்யா ஹாஸ்ப்பிட்டலில் சேர்க்கப்பட்ட என் தம்பி மகள் அக்டோபர் ஒன்றில் நலமுடன் வீடு திரும்பினாள். ஐம்பது ஆயிரம் சம்பாதிக்க வேண்டும் என்றே அவசரமாக குழந்தையினை பிரீமெச்சூராக தாம்பரம் ஆஸ்பத்திரியில் சிசேரியன் செய்துள்ளார்கள்.செப்டம்பர் 10-ல் குழந்தையின் அம்மாவை டிஸ்சார்ஜ் செய்து வடபழனி சூர்யாவிற்கு அனுப்பிய தாம்பரம் லேடி டாக்டர் தன் சொந்த ஊருக்கு அன்று இரவே ஏற்கனவே ரிசர்வ் செய்திருந்த ட்ரையினில்(நர்ஸ் கொடுத்த தகவல்) நலமுடன் போய் சேர்ந்தார். ஊரிலிருந்து திரும்பி வர 6 நாட்கள் ஆகும் அதற்குள் என் தம்பி வேறு டாக்டரிம் போய் விட்டால் என்ன செய்வது என்ற நல்லெண்ணத்தில் சீக்கிரமாக சிசேரியன் செய்துவிட்ட அந்த லேடி டாக்டருக்கு குழந்தை கிடையாதாம்.யாருக்கு சொத்து சேர்க்கிறாரோ தெரியவில்லை. சூரியா ஆஸ்பத்திரிக்கு ஒரு லட்சம் மொய் எழுதிவிட்டு தப்பித்தோம்,பிழைத்தோம் என்று தன் அருமை மகளுடன் வீடு திரும்பினான் என் தம்பி.

தாம்பரம் ஹாஸ்பிட்டல் லட்சணம் இப்ப தான் தெரியுது.

சூரியா ஹாஸ்பிட்டல் லட்சணம். ஒரு லட்சணம் தன் குணமுள்ள இன்னொரு லட்சணத்திடம் தானே நம்மை அனுப்பும். டாக்டர் சொல்வதை அப்படியே உண்மை என்று எடுத்து கொண்டு யோசிக்க முடியாமல் இரண்டு ஹாஸ்பிட்டலுக்கும் போய் மாட்டி கொண்டு தப்பித்து வந்தார்கள்.இனிமேல் பிரசவத்திற்கும் செகண்ட் ஒப்பினியன் கட்டாயம் கேட்க வேண்டுமோ?

ராயல் நகைகள்

2011-09-21T20:50:00.005+05:30

டயானா - சார்லஸ் மகன் வில்லியம் தன் தாய் டயானாவின் இந்த நிச்சயதார்த்த மோதிரத்தை தான் தன் மனைவி கேதரினிற்கு அணிவித்தார்.

சிலோன் சஃபையர் என்ற அந்த புளூ நிற மோதிரம் சுற்றிலும் 14 மிக சிறிய வைரத்திற்கு நடுவில் சும்மா பளிச்சென்று இருக்குல்ல. அப்பொழுதைய பொதுமக்களும் வாங்கும் விலையில் ஒரு மோதிரத்தை டயானா செலக்ட் செய்தது மக்களுக்கு மிகுந்த சந்தோஷத்தை கொடுத்தது.

கேட் கேதரின் தலையில் வைத்திருக்கும் அந்த சிறிய க்ரீடம்(halo tiara). இந்த tiara வில்லியமின் பாட்டி இரண்டாம் எலிசபெத்துடையது.இரண்டாம் எலிசபெத்தின் 18 ஆவது பிறந்த நாளிற்கு அன்பளிப்பாக அவரது தாய் எலிசபெத்(1) கொடுக்கப்பட்ட இந்த க்ரீடம் 1936-ல் செய்யப்பட்டதாம்.

எலிசபெத் halo tiara-வுடன் சின்ன வயதில்

கேட் கேதரின் திருமணத்தில் அணிந்திருந்த தோடுகள் அவரின் பெற்றோர் அந்த(halo-tiara) கிரிட டிசைனில் செய்து கொடுத்ததாம்.

டயானாவின் மகன்கள் வில்லியம்,ஹாரி இருவரும் யாருக்கு முதலில் திருமணம் நடைபெறுகிறதோ அவர்களின் மனைவிக்கு நிச்சய மோதிரமாய் இந்த மோதிரத்தை அணிவிக்க பேசி கொண்டார்களாம்.வில்லியம் முந்திக் கொண்டார்.இத்திருமணம் நடந்ததில் இருந்து இந்த புளூ கல் மோதிர விற்பனை இங்கிலாந்தில் அதிகரித்துள்ளதாம்.

டயானா அவர் திருமணத்தின் போது அணிந்திருந்த இந்த (spencer family tiara) க்ரீடத்தினால் மாலையில் தலைவலியினால் மிகவும் அவஸ்தை அடைந்தாராம்.

அதனால் தான் கேதரின் மிக எளிமையான க்ரீடத்தை செலக்ட் செய்து கொண்டாரோ? (cartier halo tiara).

குயின் மேரி

ஜார்ஜ் V 1911-ல் டில்லியில் ஸ்பெஷல் தர்பாரில் கலந்து கொள்ள வந்த போது அவருடைய மனைவி குயின் மேரி அணிந்துள்ள இந்த க்ரீடம் டெல்லி தர்பார் tiara என்றழைக்கப்பட்டது. இந்த க்ரீடம் மேரியின் மருமகள் எலிசபெத்திற்கு(1) அளிக்கப்பட்டது. 1947-ல் எலிசபெத் டெல்லி தர்பார் கிரீடத்தை தன் தென் ஆப்பிரிக்கா விஜயத்தின் போது அணிந்திருந்தார். 60 வருடங்களுக்கு பிறகு 2005 சார்லஸின் இரண்டாவது மனைவி கமீலா ஒரு பார்ட்டியில் அணிந்து வந்தார். மேடம் பெரிய கிரீடத்தை தான் செலக்ட் செய்துள்ளார்.

கமீலா

இந்த டெல்லி தர்பார் கிரீடத்தின் மேலே இருந்த எமரால்ட் நீக்கப்பட்டிருக்கிறது.

நல்ல வேளை நம் திருமணத்தில் இப்படி க்ரீடம் வைக்கும் பழக்கம் இல்லை.இப்ப நகை விற்கும் விலையில் யாரால் முடியும்?

1911-ல் டெல்லி வந்த குயின் மேரிக்கு இந்த டெல்லி தர்பார் நெக்லஸ் பாட்டியாலா மகாராணியால் அன்பளிப்பாக கொடுக்கப்பட்டது. அதன் பிறகு இந்த நெக்லஸ் குயின் மேரி தன் மருமகள் எலிசபெத்திற்கு கொடுத்து விட எலிசபெத் ராணிக்கு மிகவும் பிடித்த ஒரு நெக்லஸ் ஆகியது.

இது குயின் மேரி உள்ளங்கழுத்தில் அணிந்துள்ள நகையாகும்.

இந்த எமரால்ட் சோக்கர் டயானாவால் விரும்பி அணிய பட்டது. கழுத்தில் போட வேண்டிய இதை நெற்றியில் சில சமயம் மிக ஸ்டைலாக டயானா அணிந்து கொண்டார்.

கேதரின் தன் மாமியார் டயானாவின் சஃபையர் தோடை சிறுது மாறுதல் செய்து தொங்குவது போல் செய்துள்ளார். நகை விற்கும் விலையில் இப்படி தான் ராணிகளே ஓசியில் காலம் தள்ளுகிறார்களோ!!!! திருமணம் மற்றும் பார்ட்டிகளுக்கு போட கொடுக்கப்படும் இந்த நகைகளை யாருக்கும் கடனாக கொடுக்கவோ அல்லது விற்கவோ ராஜ பரம்பரையில் பெண்களுக்கு உரிமை கிடையாதாம்.டயானா தன் டைவர்சிற்கு பிறகு அனைத்து நகைகளையும் தன் மாமியாரிடமே திரும்ப கொடுத்து விட்டாராம்.

பாப்பா

2011-09-09T12:50:00.002+05:30

போன மாதம் செக்கப் சென்ற போது செப்டம்பர் 10-ற்கு பிறகு நல்ல நாள் பார்த்துட்டு வாங்க c-section செய்து குழந்தையினை எடுத்து விடலாம் என்று சொல்லவும்.செப்டம்பர் பத்தே நல்ல நாள் தான் அன்றே செய்து விடலாமா என்று செப்டம்பர் 4-ல் டாக்டரிடம் சொல்ல சென்ற போது இல்லை இல்லை இரண்டு நாட்களில் செய்து விடலாம் இல்லைனா அனெஸ்தடிஸ்ட் கிடைப்பது கடினம் என்று சொல்லி இருக்கிறார் டாக்டர்.

10 வரை நல்ல நாள் இல்லையெனினும் டாக்டர் சொல்படி கேட்பது தான் நல்லது என்று 6 ஆம் தேதி ஹாஸ்பிட்டல்லில் சேர்ந்து 7 ஆம் தேதி காலையில் ஆபரேஷன் செய்து குழந்தையும் எடுத்தாச்சு. பெண் குழந்தை ஆஹா எவ்ளோ நாளாச்சு எங்கள் வீட்டில் என் தங்கைக்கு பிறகு வந்திருக்கும் பெண் குழந்தை என்று எல்லோரும் மிக சந்தோஷமாய் இருந்தோம்.மதியம் இடி போல் ஒரு செய்தி. குழந்தையினை ஆம்புலன்சில் இரண்டு நர்ஸ்கள் உதவியுடன் வடபழனி சூர்யா ஹாஸ்பிட்டலுக்கு கொண்டு செல்கிறோம் என்ற தகவல். குழந்தை மூச்சு விட சிரமப்படுவதால் அங்கு கொண்டு செல்லும்படி பிரசவம் பார்த்த டாக்டர் என் தம்பியிடம் சொல்லி அனுப்பி இருக்கிறார்.

பிறந்த குழந்தை தனியே NICU-வில் இருக்கிறது.அம்மாவோ இங்கே ஒரு ஹாஸ்பிட்டலில்.அங்கோ கண்டிஷனாய் தந்தைக்கு மட்டுமே அனுமதி.இன்ஃப்க்‌ஷன் ஆகி விடும் என்பதால் மற்ற யாரும் உள்ளே அனுமதிக்கவில்லை.நேற்று மூன்று கிலோவில் இருந்த குழந்தை இன்று 100 கிராம் குறைந்துள்ளது. எங்கேயெல்லாம் டியூப் சொருக முடியுமோ சொருகியாச்சு.

பிரிமெச்சூர் பேபிக்கு பிறந்தவுடன் மூச்சு பிரச்சனை வராமல் இருக்க டெலிவரிக்கு முன்பு தாய்க்கு போடப்படும் ஒரு வகையான ஹார்மோன் இன்ஜெக்‌ஷனை ஏன் அந்த தாய்க்கு போடவில்லை. இது குழந்தையினை அட்மிட் செய்த ஹாஸ்பிட்டலில் கேட்டார்கள்.

10 தேதிக்கு பிறகு சிசேரியன் செய்யலாம் என்ற டாக்டர் திடீரென்று இரண்டு நாளில் ஆபரேஷன் என்றால் அதற்கு தாயின் உடல்நிலை காரணம் என்றால் ஓகே.அனஸ்தெடிஸ்ட் கிடைக்கமாட்டார் என்பது ஒரு ஒத்துக் கொள்ள கூடிய காரணமா?வேறு ஆட்களே கிடைக்க மாட்டார்களா?

நார்மலா பிறந்தாலே 1000 பிரச்சனைகள் வரக்கூடிய இந்த காலத்தில் எதற்கு அவசரமாய் ஒரு மாதம் முன்பாகவே பிரிமெச்சூர் பேபியினை எடுக்கும் போது செய்ய வேண்டிய முன்னேற்பாட்டினை ஏன் செய்யவில்லை.?

குழந்தையினை சேர்த்திருக்கும் ஹாஸ்பிட்டலில் வேறு ஒருத்தரும் போக கூடாது என்றால் படிப்பறிவு இல்லாத தகப்பன் என்றால் குழந்தை நிலைமை பற்றி எப்படி புரிந்துக் கொள்வார்.படித்தே இருந்தாலும் மெடிக்கல் டெர்ம்ஸ் எப்படி எல்லோருக்கும் புரியும். இல்லையெனில் அந்த ரிப்போர்ட்டை ஒரு ஜெராக்ஸ் எடுத்தாவது கொடுக்கலாம் இல்லையா? இன்னொரு தெரிந்த டாக்டரிடம் செகண்ட் ஒப்பினியன் கேட்போம் இல்லையா?

செகண்ட் ஒப்பினியன் கேட்காமல் டெலிவரி செய்து இப்போ கஷ்டப்படுகிறோம்.

குழந்தை வெயிட் நல்லாயிருப்பதால் நம்பிக்கையுடன் கடவுள் இந்த முறையும் கைவிடமாட்டார் என்ற நம்பிக்கையில் எங்கள் குடும்பம் இருக்கிறது. என் மகன்கள் குழந்தைக்கு பெயர் தேடிக் கொண்டு இருக்கிறார்கள்.ஒன்றும் ஆகாதும்மா பாப்பா வீட்டிற்கு வந்திடும் என்று எங்களுக்கு ஆறுதல் சொல்லிக் கொண்டு இருக்கிறார்கள்.என் தம்பி அந்த ஹாஸ்பிட்டலில் தனியே இரண்டு நாளாய் குழந்தையினை தினம் மூன்று முறை மட்டும் பார்த்து விட்டு ரிஷப்ஷனில் காத்து இருக்கிறான்.

என் தம்பிக்கு இரு முறை 8 மாதத்தில், 6 மாதத்தில் குழந்தை இறந்தே பிறந்தது. இது மூன்றாவது குழந்தை. எங்கே முட்டி கொள்வது,யாரை குறை சொல்வது,என்ன பாவம் செய்தோம் என்று புலம்பி கொண்டு இருக்கிறோம். சொந்தத்திலும் திருமணம் செய்யவில்லை.9 மாதமும் பெட் ரெஸ்ட்டில் இருந்தார் என் தம்பியின் மனைவி.

இன்னும் ஒரு முறை கூட நாங்கள் பார்க்காத அந்த பாப்பா எங்களை எல்லாம் பார்க்க வீட்டிற்கு முழுதாய் குணமடைந்து வந்திடும் என்ற நம்பிக்கையில்.

வெரைட்டி-ஆவணி 2011

2011-08-28T13:00:00.008+05:30

ஹாங்காங்கில் நாய்களுக்கு அமைதியாய் இருக்க யோகா சொல்லி தருகிறார்களாம்.அதற்கு டோகா என்று பெயராம்.அப்படியே அவைகள் அந்தரத்தில் மிதக்க நித்தியானந்தரிடம் அனுப்பலாம்.

அ,ஆ,இ,ஈ,உ,ஊ,எ,ஏ ஏன் ஐ மட்டும் ஒன்றே ஒன்று இருக்கு.ஒண்ணாப்பு படிக்கும் விஷால் என்னிடம் கேட்ட கேள்வி. அது அப்படி தான் என சமாளிச்சிங்.

நேற்று ஒரு வயதான அம்மா என்னுடன் பஸ் ஸ்டாப்பில் நின்று கொண்டு இருந்தார்கள்.மகன் வீட்டிற்கு வந்துட்டு என் வீட்டிற்கு போறேன்மா என்று அவர்களாகவே சொன்னார்கள்.தனியாவா இருக்கிறீங்க என்று கேட்டேன்.ஆமாம்மா,என் வீட்டுக்காரருடன் இருக்கிறேன். சொந்த வீட்டில் என் மூன்று மகன்களும் அவர் அவர் மனைவி குழந்தைகளுடன் இருக்கிறார்கள். நாங்க வாடகை வீட்டில் இருக்கிறோம். மருமகள்கள் பேர குழந்தைகள் படிக்கலை என்று தினம் அடிப்பதை பார்க்க சகிக்கலைம்மா.ஏன் இப்படி அடிக்கிறீங்க என்று கேட்டால் உங்களால் தான் இந்த குழந்தைகள் கெடுகிறார்கள் என்று சொல்றாங்கம்மா அதான் வாரம் ஒரு முறை மட்டும் பேரப்பிள்ளைகளை பார்த்து போவேன் என்றார். நான் இப்போது வீடு கட்டி கொண்டிருக்கும் ஏரியாவிற்கு போய்விட்டு மதியம் வீடு திரும்பி கொண்டு இருக்கும் போது அவர்களை சந்தித்தேன். அவர்கள் சொன்னதை கேட்டதும் இவ்வளவு கஷ்டப்பட்டு வீடு கட்டணுமா என்று தோன்றியது.

உலகிலேயே நீளமான பாலம் 36 கி.மீட்டருக்கு சைனாவில் இருக்கிறது.

ரயில்வே காலனியில் குடியிருந்த போது போது டிரைவர்,கார்டு.டி.டி.ஆர் வீடுகளில் லைனுக்கு போறேன் என்று சொல்லி வேலைக்கு போவார்கள். யாராவது வீட்டுக்காரர் எங்கே என்று கேட்டால் வீட்டில் இருக்கும் பெண்கள் அவரா ஆன் லைன்ல இருக்கிறார் என்று சொல்வார்கள்.இப்ப நெட் வந்த பிறகு தான் நாமெல்லாம் ஆன் - லைனில் இருக்கிறோம். அவர்கள் முன்பே ஆன் - லைனில் இருந்து இருக்கிறார்கள்!!!.

பிடித்தவர்கள் - 1

2011-08-27T10:10:00.004+05:30

ராஜீவ் காந்தி

இந்தியாவின் ஆறாவது பிரதமராக இருந்து இந்தியாவை ஸ்டைலான பாதையில் அழைத்து செல்ல முற்பட்டவர்.இவரின் இழப்பு எப்பவும் மறக்க முடியாத ஒன்று. நம் வீட்டில் ஒருவரை இழந்தது போன்று ஒரு துக்கத்தினை தர கூடியது. இவரின் வாரிசுகள் ராகுல்,பிரியங்காவினை பார்க்கும் போது எல்லாம் பரிதாபமாக இருக்கும். மிக அருமையான ஒரு தந்தையை கொடுமையாக பறிகொடுத்தவர்கள்.

தீதி மம்தா பானர்ஜி

1955-ல் கல்கத்தாவில் பிறந்த இவரின் எளிமை என்னை கவர்ந்தது. வரலாற்றில் முதுகலையும்,சட்டமும் பயின்றவர். மிக எளிமையான உடையும், நகை இன்றியும்,காட்டன் புடவையும், ஒரு துணி பையினை தோளில் தொங்க விட்டப்படி இருப்பதுமே இவரின் ஸ்டைல்.
காங்கிரசில் 1970-ல் சேர்ந்து படிபடியாக முன்னேறியவர். 1997-ல் காங்கிரசில் இருந்து வெளியேறி திரிணாமுல் காங்கிரசை தோற்றுவித்தார். 1999-ல் NDA வில் சேர்ந்து மத்தியில் ஆட்சியினை பிடித்து ரயில்வே மந்திரி ஆனார். 2009-லும் ரயில்வே மந்திரியாக இருந்தார். துரந்தோ என்னும் அதிவேக ரயில் நாடு முழுவதும் அறிமுகப்படுத்தியது இவர் காலத்தில் தான்.2011 மே மாத தேர்தலில் ஜெயித்து தற்போது மேற்கு வங்கத்தின் முதல் அமைச்சராக இருக்கிறார். முதல் அமைச்சரானதும் அவர் செய்த முதல் காரியம் சிங்கூர் விவசாயிகளுக்கு தொழிற்சாலைக்காக பெறப்பட்ட 400 ஏக்கர் நிலத்தை திருப்பி கொடுத்தது தான். தீதி மேலும் நல்லது செய்ய வணங்குகிறேன்.

நதியா

பூவே பூச்சூடவா,சின்ன தம்பி பெரிய தம்பி,பூக்களை பறிக்காதீர்கள்,உயிரே உனக்காக போன்ற படங்களில் நடித்து தன் டீசண்டான உடையால் அனைவரையும் கவர்ந்தவர் என்னை மிக கவர்ந்தார்.

மாதவி

ராஜபார்வை,டிக்,டிக்,டிக்,சட்டம்,தில்லு முல்லு,தம்பிக்கு எந்த ஊரு,உன் கண்ணில் நீர் வழிந்தால்,விடுதலை போன்ற படங்களில் வந்த மாதவி பிறகு ஹிந்தியில் அதிகம் நடிக்க போனதால் தமிழ் படங்களில் காணாமல் போனார்.ஏன் ஹிந்திக்கு போனார் என்று தோன்றும்?இங்கே இருந்து இருந்தால் இன்னும் அதிக படங்களில் நடித்து இருந்திருக்கலாம்.அசத்தலான கண்களுக்கு சொந்தகாரர்.அருமையாக நடனமும் ஆடுவார்.

மேடம் ரால்ஃப் சர்மா என்பவரை திருமணம் செய்து மூன்று பெண் குழந்தைகளுடன் அமெரிக்காவில் நியூ ஜெர்சியில் வசிக்கிறார் என்ற செய்தி படித்து சந்தோஷமாக இருந்தது.

சரிதா

என்ன இரு கண்கள்
மரோசரித்ரா,சுஜாதா,நூல்வேலி,அக்னி சாட்சி,நெற்றி கண்,அச்சமில்லை அச்சமில்லை,கல்யாண அகதிகள்,புதுகவிதை போன்ற படங்களில் நம் பக்கத்து வீட்டு பெண் போன்ற தோற்றத்தில் வருவார். மிக அருமையான குரல்வளம்.

சிம்ரன்

மாடர்ன் கேர்ள், குடும்ப பாங்கான கேரக்டர் இரண்டும் பொருந்த கூடியவர். அருமையாக நடனம் ஆட கூடியவர். நேருக்கு நேர்,அவள் வருவாளா,கண்ணெதிரே தோன்றினாள்,வாலி,பார்த்தேன் ரசித்தேன்,12B,
கன்னத்தில் முத்தமிட்டால்,பஞ்ச தந்திரம் போன்ற படங்களில் நன்கு நடித்தும் இருப்பார்.

S.P.பாலசுப்ரமணியம்

மன்றம் வந்த தென்றலுக்கு -- மெளன ராகப் பாடல் யாருக்கு தான் பிடிக்காமல் போகும். மிக அருமையான மனிதர் என்பது அவரின் இண்டர்வியூக்களில் தோணும். என்ன ஒரு குரல். என்ன ஒரு சாதனை. ஏக் துஜே கேலியே, Hum Aapke Hain Kaun ஹிந்தி படப் பாடல்கள்.60+ வயதிலேயும் 25 வயது கதாநாயகனுக்கு அட்டகாசமாய் பொருந்தும் குரல்.
காதலின் தீபம் ஒன்று(தம்பிக்கு எந்த ஊரு)
காதல் ரோஜாவே(ரோஜா),பனிவிழும் மலர் வனம்(நினைவெல்லாம் நித்யா),தங்க தாமரை மலரே(மின்சார கனவு), என்ன சத்தம் இந்த நேரம் (புன்னகை மன்னன்).....சொல்லி கொண்டே போகலாம்.தனியே பதிவிடணும்.

பிரகாஷ் ராஜ்

டூயட் படத்தில் பாலசந்தர் டைரக்‌ஷன் என்பதால் ஓவர் ஆக்ட் செய்திருப்பார். இருவரிலும் ஓவர் ஆக்ட் தான். கில்லியிலும் ஓவர் ஆக்ட் தான்.மொழியில் சூப்பர் ஆக்‌ஷன்.அபியும் நானும்,வசூல்ராஜா சொல்லி கொண்டே போகலாம்.சில சீன்களில் அட்டகாசமாய் நடித்து பெயர் வாங்கி விடுவார்.

JOHN TRAVOLTA

PULP FICTION,FACE OFF இந்த இரண்டு படங்களும் தான் முதலில் பார்த்தது. அட்டகாசமான ஸ்டைலில் அலட்சியமாய் வருவார். அதன் பிறகு Broken Arrow,Domestic Disturbance பார்த்து இன்னும் ஒவ்வொரு படமாக பார்க்கும் ஐடியாவில் இருக்கிறேன். இரண்டு வருடங்கள் முன்பு இவரின் 16 வயது மகன் இறந்துவிட்டார். அவருக்கு KAWASAKI SYNDROME என்ற நோய் தாக்கி அதனால் வரும் வலிப்பு நோயால் பாத்-டப்பில் தலை மோதி இறந்திருக்கிறார்.Travolta-க்கு போன வருடம் பெஞ்சமின் என்று ஒரு மகன் பிறந்திருக்கிறார். அவரின் மகளின் வயது 10.

லிஸ்டில் பெயர்கள் இன்னும் இருக்கு.இன்றைக்கு இது போதுமே.

காஷ்மீர்

2011-08-26T10:05:00.000+05:30

”1846-ல் பிரிட்டிஷ் சர்க்கார் காஷ்மீரினை குலாப் சிங்கிற்கு எழுதிக் கொடுத்தனர். பதிலுக்கு 72 லட்சம் ரூபாய் பணம்,ஆண்டுக் கப்பமாய் ஒரு குதிரை, 12 செம்மறி ஆடு, மூன்று செட் காஷ்மீர் சால்வைகள் கொடுக்க வேண்டும்.குலாப் சிங்கின் கொள்ளு பேரன் தான் விடுதலை அடைந்த போது காஷ்மீரில் மன்னராக இருந்த ஹரி சிங்.”

இதை கிழக்கு பதிப்பகம் பா.ராகவனின் காஷ்மீர் புத்தகத்தில் படித்தது.

இன்னும் புத்தகத்தினுள்

1.5000 வருட பாரம்பரியமிக்க பண்டிட்டுகள் கிறிஸ்த்துவின் பிறப்பிற்கு 250 ஆண்டுகள் முன்பே காஷ்மீரில் செல்வ செழிப்போடு வாழ்ந்து இருக்கிறார்கள்.

2.புத்த மதம் செழிக்க ஆரம்பிக்கவும் மன்னர் சுகதேவர் இந்து மதத்தின் செல்வாக்கை குறைக்க ஆப்கானில் இருந்து முஸ்லீம் அறிஞர்களை வரவழைத்து தலா ஒரு கிராமத்தினை கொடுத்து குழுவாக தங்க அனுமதிக்கிறார்.

3.துலுச்சா என்ற செங்கிஸ்கான் வழி வந்தவன் காஷ்மீர் மீது படையெடுத்து அதன் அமைதி அழிய ஆரம்பிக்கிறது.

4.பிறகு முகலாயர்கள் காலத்தில் அக்பர் 1588-ல் படையெடுத்து அடுத்து வந்த முகலாயர்கள் அனைவருக்கும் காஷ்மீர் ஒரு போக பொருளாயிற்று.

5.19 ஆம் நூற்றாண்டில் காஷ்மீர் சீக்கியர் வசமாகியது. பிரிட்டிஷார் பஞ்சாப்பினை கைப்பற்றிய போது காஷ்மீரில் டோக்ரா இனத்தை சேர்ந்த தளபதி(பஞ்சாப் மன்னரால் நியமிக்கப்பட்டவன்) குலாப்சிங் பிரிட்டிஷாரிடம் ஒரு ஒப்பந்தம் போட்டு கொண்டார். அது தான் முதல் பத்தியில் சொன்னது.

6.இப்ப காஷ்மீர் குலாப்சிங்கின் வசமாகியது.ரன்பீர் சிங்,பிரதாப் சிங், ஹரி சிங் என டோக்ரா இனத்தை சேர்ந்த இந்து மன்னர்கள் காஷ்மீரினை ஆண்டனர்.

7. இவர்கள் காலத்தில் முஸ்லீம்கள் கொடுமையினை அனுபவித்தனர். எனவே, ஷேக் முகம்மது அப்துல்லா போராட துவங்கினார்.

8.ஹரி சிங் தன் பாட்டன் சொத்தாக காஷ்மீரை நினைத்தார். ஷேக் அப்துல்லாவை சிறையில் அடைத்தார். நேருவிற்கு ஷேக் அப்துல்லா நெருங்கிய நண்பர்.எனவே ஹரி சிங்கிற்கு காங்கிரஸ் பிடிக்காது. ஹிந்து என்பதால் முஸ்லீம்கள் பிடிக்காது. எனவெ, சுதந்திரம் அடைந்ததும் தனி நாடாகவே இருக்க விரும்பினார்.

9. இந்திய பாகிஸ்தான் சுதந்திரத்திற்கு பிறகு ரெஸ்ட் எடுக்க ஜின்னா காஷ்மீர் செல்ல விரும்பினார். அதற்கும் அனுமதிக்கவில்லை ஹரிசிங். அதன் பிறகு தான் பாகிஸ்தான் தன் வேலையினை ஆரம்பித்தது. மவுண்ட்பேட்டன் இந்தியாவுடன் சேர்ந்து விடும்படி பேச சென்றார்.அவரை உடல்நிலை சரியில்லை என்று பார்க்காமல் இருந்தார் ஹரிசிங். காந்தி போய் பேசி பார்த்தார். ஷேக் அப்துல்லாவை மட்டும் விடுதலை செய்ய ஒப்புக் கொண்டார். காந்தியிடமும் இந்தியாவுடன் சேர முடியாது என திட்டவட்டமாக அறிவித்து விட்டார்.

10.ஜின்னாவை காஷ்மீருக்குள் அனுமதிக்க மறுத்ததை பாகிஸ்தானால் ஜீரணிக்கவே முடியவில்லை. வடமேற்கு எல்லைப்புற பதான் ஆதிவாசி இனமக்களை ஆயுதங்களுடன் காஷ்மீருக்குள் அனுப்பி வைத்தனர். புனித போர் என்று அதற்கு பெயரிடப்பட்டது. இதை எதிர்ப்பார்க்காத ஹரிசிங் நேருவின் உதவியினை நாடினார். சர்தார் படேல் தனது செயலாளரான வி.பி. மேனனை அனுப்பி ஹரிசிங்குடன் ஒரு ஒப்பந்தம் செய்து கொண்டார். இந்தியாவுடன் காஷ்மீர் இணைவதற்கான ஒப்பந்தம் அது. மவுண்ட்பேட்டன் பாகிஸ்தான் சென்று பேச்சு வார்த்தை நடத்தினார். ஜின்னா இந்தியாவின் தந்திரம் என்று சொன்னார். ஆனால், அவர் தான் ஆதிவாசிகளுக்கு உதவியதை ஒத்துக் கொள்வாரா என்ன? நேரு ஐக்கிய நாட்டு சபைக்கு பிரச்சனையினை கொண்டு சென்றார்.

11.மக்கள் எந்த நாட்டுடன் சேர வேண்டும் என்று வாக்கெடுப்பிற்கு இந்தியாவும் ஒப்புக் கொண்டது. ஆனால், ஆதிவாசிகளை முற்றிலும் திரும்ப அழைக்க பாகிஸ்தான் மறுத்தது. இந்திய ராணுவம் காஷ்மீரில் இருக்கும் வரை வாக்கெடுப்பு நடக்க கூடாது என்பது பாகிஸ்தானின் வாதம். ஹரிசிங் தேசிய மாநாட்டு கட்சியின் ஷேக் அப்துல்லாவை பிரதமராக நியமித்தார். இவரை பார்த்து பாகிஸ்தான் பயந்தது. இவர் வாக்கெடுப்பை தமக்கு சாதகமாக்கி கொள்வார் என பாகிஸ்தான் நினைத்தது.

12.இந்திய அரசியலமைப்பு சட்டத்தின் 370-ஆவது பிரிவு காஷ்மீருக்கான சிறப்பு அந்தஸ்த்தை நிர்ணயித்தது. இதில் காஷ்மீரில் வாக்கெடுப்பு நடத்துவது பற்றி ஒரு அறிவிப்பும் அதில் இல்லை. அதாவது இந்தியாவின் ஒரு மாநிலம் காஷ்மீர்.கொதித்து போனார்கள் காஷ்மீர் மக்கள்.
ஜம்மு பிரஜா பரிஷத் என்ற அமைப்பிற்கு மன்னர் வேறு உதவினார். அவர்கள் இந்துக்களை மீட்டு எடுக்க வந்தவர்களாக நடந்து கொண்டனர்.

13.ஷேக் அப்துல்லா நேருவால் கைது செய்ய பட்டார். பக்க்ஷி குலாம் முகம்மது காஷ்மீரின் பிரதமனார்.இவர் காலத்தில் தான் பிரதமர் என்பது மாற்றம் பெற்று முதல் அமைச்சர் என அழைக்கப்பட்டார்.இப்படி நிறைய விஷயங்கள்....

14.ஷேக் அப்துல்லாவின் பேரன் உமர் அப்துல்லா தான் இப்பொழுது அங்கு முதலமைச்சர்.

இந்த புத்தகத்தை படித்து முடித்ததும் காஷ்மீர் தனி நாடாகவே இருந்து இருக்கலாமோ என்று தான் தோன்றியது.போன வருடம் ஏப்ரலில் காஷ்மீருக்கு குடும்பத்துடன் போய் வந்த போது தெரியாத பயம், ஆஹா இந்த புத்தகத்தினை படித்த பின் இவ்வளவு பிரச்சனையுள்ள ஒரு இடத்திற்கு எப்படி தில்லாக குழந்தைகளுடன் போய் வந்தோம் என்று இப்போது திகிலாக இருக்கிறது.நாங்கள் போன போது சந்தித்த முஸ்லீம் நண்பர்கள் உங்கள் ஊருக்கு போய் நிறைய நண்பர்களிடம் சொல்லி காஷ்மீருக்கு டூர் வரும்படி சொல்ல சொன்னார்கள். ஏறத்தாழ 15 வருடங்களாக டூரிசத்தை மட்டுமே நம்பி இருப்பவர்கள்,வருமானம் இல்லாமல் இருப்பதால் இப்பொழுது நிலைமை கொஞ்சம் பரவாயில்லை என்றே சொன்னார்கள்.
எங்கேயும் எப்போதும் பாதுகாப்பிற்கு நம் மிலிட்டரி ஆட்கள்.ஆனால், அவர்களை பார்க்கும் போது தான் ஒரு பயம் வருகிறது.

காஷ்மீர்-1, காஷ்மீர்-2, காஷ்மீர்-3, காஷ்மீர்-4

போக விரும்பும் நண்பர்கள் தொடர்பு கொள்ளுங்கள்.முடிந்த உதவி செய்து தரப்படும்.போக வர பணம் எல்லாம் தரமுடியாது!!!

பாபநாசம்+குற்றாலம்

2011-08-25T12:50:00.004+05:30

இந்த மாதம் முதல் வாரத்தில் குடும்பத்துடன் போன டூர்.பாபநாசத்தில் நாங்கள் தங்கியிருந்த காரையார் லோயர் கேம்ப் கெஸ்ட் ஹவுஸின் முன்னால் இருந்த காடு.

மாலை 6.45-ல் அகஸ்தியர் அருவியில் எங்கள் குடும்பம் மட்டும் இருந்தோம்.

பானதீர்த்தம்

பானதீர்த்தம் படகில் போய் இறங்கியதும் ஃபாரஸ்ட் டிபார்ட்மெண்டில் பெற்ற அனுமதியில் ஒத்தையடி பாதையில் எங்கள் குடும்பம் மட்டும் போன இடம்.

அங்கே தனியே ஒரு சின்ன அருவியும்,ஒரு நதியும்

குற்றாலத்தில் தங்கிய 1903-ல் கட்டப்பட்ட ஒரு பழமையான வீடு.

குஷியாக விஷால்

இலஞ்சி கோயில் போகும் வழி

திருமலை கோயில் மேலிருந்து ஒரு க்ளிக்

மெயின் அருவி

செங்கோட்டை போகும் வழியில் இருந்த குண்டலாறு நீர்தேக்கம்

புலி தேடி ஒரு பயணம்

Unknown Reasons (கடவுளுக்கு மட்டும் தெரியுமோ?)

2011-08-25T09:35:00.001+05:30

சமீபத்தில் ஆந்திராவின் இருந்து இங்கு எங்கள் வீட்டு பக்கத்தில் குடி வந்திருக்கும் ஒரு பெண்ணிற்கு உடல்நிலை சரியில்லை.திருமணம் முடித்து 10 வருடங்களில் 3 முறை அபார்ஷன் ஆகி,3 முறை லேப்ராஸ்கோப்பி முறையில் கருப்பை கட்டியினை எடுத்தும் உள்ளார்கள்.

இந்த ஊருக்கு அவர் புதுசு.தமிழ் சுத்தமாய் தெரியாது. ஒரு நாள் கடுமையான வயிற்று வலியில் அவஸ்தை பட்டவரை பக்கத்தில் இருக்கும் டாக்டரிடம் கூட்டி சென்றேன். அவர் உடனே ஸ்கேன் செய்து பார்த்து விட்டு கருப்பையில் பிரச்சனை இருப்பதால் வேறு பெரிய மருத்துவமனையில் பார்த்து விடுங்கள் என்று வலி குறைய மட்டும் மருந்தும் கொடுத்தார்.

எங்கள் ஏரியாவிலேயே இன்னொரு ஸ்பெஷல் மருத்துவரை இரண்டு நாளில் சந்தித்தோம்.அவரும் ஒரு ஸ்கேன் செய்து பார்த்து விட்டு நீங்கள் சேத்பட்டில் இருக்கும் ஒரு டாக்டரை உடனே சந்தித்து விடுவது நல்லது என்று கூறி விட்டார். ஆனால், 20 நாட்களாக சேத்பட் டாக்டரின் அப்பாயிண்மெண்ட் கிடைக்கவேயில்லை. எனவே, எங்க ஏரியா ஸ்பெஷல் டாக்டரையே திரும்ப வலி பொறுக்காமல் பார்க்க சென்றோம். இப்படி சேத்பட் டாக்டரிடம் அப்பாயிண்மெண்ட் கிடைக்கவில்லை அடுத்த மாதம் தான் கிடைக்கும் என்றும் இப்பொழுது வலி நிற்க மருந்து தரும்படி கேட்டோம்.

எங்க உள்ளூர் ஸ்பெஷலிஸ்ட் என்ன கோபத்தில் இருந்தாரோ தெரியவில்லை, ஏம்மா இந்த பெண்ணை கூட்டிட்டு நீ அலஞ்சுட்டு இருக்க,பேசாமா அவருடைய சொந்த ஊருக்கு அனுப்பிட்டு உன் வேலையை பார் என்று கடுமையாக என்னிடம் கூறினார். சூப்பர் டாக்டர்.சொந்த ஊரில் மருத்துவம் செய்ய வசதியில்லாததால் தானே, சென்னை பெரிய ஊர் இங்கே நல்ல மருத்துவம் கிடைக்கும் என்ற நம்பிக்கையில் தானே வந்து இருக்கிறார் என்றும் இவருடன் அலைவதில் எனக்கு ஒன்றும் கஷ்டமில்லை, சேத்துபட் டாக்டர் இல்லையெனில் வேறு டாக்டர் ரெஃபர் செய்யுங்கள் என்றும் கேட்டேன்.

இல்லை நீங்கள் வேறு டாக்டரை பாருங்கள் என்று விட்டேத்தியாக சொன்னார். பிறகு என் கஸின் (டாக்டர்) அட்வைஸ் படி ராமசந்திராவிற்கு அந்த பெண் அவர் கணவருடன் போய் வருகிறார்.ஆனாலும்,அவர் பிரச்சனை என்னவென்று இது வரை கண்டு அறியப்படவில்லை. அங்கு இவர் பார்க்க போன டாக்டர் இரண்டு நாட்கள் கழித்து அங்கேயே இன்னொரு டாக்டரை பார்க்க சொல்லி விட்டார். இந்த இரண்டு மாதத்தில் அந்த பெண் பார்க்கும் 4 ஆவது டாக்டர் இவர்.

2 மாத்தில் அவர் எடுத்தது 4 முறை ஸ்கேனும், ஒரு முறை MRI ஸ்கேனும் ஆனாலும் இன்னும் சுத்தலில் தான் இருக்கிறார்.
கருப்பையால் தானே இவ்வளவு பிரச்ச்னை என்று அவரின் கணவர் அதை எடுத்து விடலாம் என்கிறார். ஆனால் 33 வயதில், குழந்தையும் இல்லாததால் கருப்பையினை எடுக்க எந்த டாக்டரும் தயாராயில்லை. ஆனால் அதனால் அந்த பெண் படும் பாடு. என்ன பிரச்சனை என்று தெரிந்து தக்க சிகிச்சை எடுக்க வேண்டும் என்ற வேண்டுதலோடு இருக்கிறோம்.

கருப்பையில் கட்டி திரும்ப திரும்ப வர காரணம் என்னவென்று தெரியாது?
ஓவரியில் கட்டி வர காரணம் என்னவென்று தெரியாது?
கருப்பையின் அளவு பெரிதாக காரணம் என்னவென்று தெரியாது?
சில பெண்களுக்கு மூன்றாவது மாதத்தில குழந்தை அபார்ஷன் ஆக சரியான காரணம் என்னவென்று தெரியாது?

பரம்பரையில் யாருக்கேணும் இருந்தால் இந்த பிரச்சனைகள் பெண்களை தாக்குமாம்.எதுவும் நம் கையில் இல்லை என்று மட்டும் புரிகிறது.
இத்தூண்டு 3 க்கு 2 இன்ச் சைசில் ஒரு வெற்று பை போல பெண்களுக்குள்ளே இருந்து கொண்டு அது பெண்களை படுத்தும் பாடு.

கட்டைல போறவங்க..

2011-08-24T09:00:00.003+05:30

நேற்று மதியம் பேங்கில் வீட்டு லோன் விஷயமா தேவுடு காத்து இருந்த போது அந்த பேங்க் அருகில் இருக்கும் கல்லூரியில் பெண்கள் அங்கிட்டும் இங்கிட்டும் போறது வித்யாசமாய் இருந்துச்சு.என்னன்னு உத்து பார்த்ததில் அட அவர்கள் கட்டைல போறது தெரிஞ்சுச்சு. இப்ப தான் இப்படி அதிகமா கட்டைல போறாங்களா இல்லை ஆதி காலத்துல இருந்தே இப்படி தானா? பெண்கள் மட்டும் தான் இப்படியா நம்ம ”குடி மகன்கள் ” எப்புடி என்று கூகுளிடம் கேட்டதில்

இப்படி ஒரு படம் கிடைத்தது. ஆஹா உண்மையிலேயே கட்டையில ஆதிகாலத்திலேயே போனார்கள் என்ற உண்மையும் விளங்கிச்சு.Chopine எனப்படும் இந்த செருப்பினை அணிய இரண்டு பேரின் உதவி தேவை. நடக்கும் போதும் யாராவது பிடித்து கொள்ள வேண்டுமாம். ஆனாலும் இதை அணிந்து கொண்டு டான்ஸ் கூட ஆடிய பெண்களும் உண்டாம். 7லிலிருந்து 30 இன்ச் உயரம் வரை இருக்குமாம். 15 ஆம் நூற்றாண்டில் பெண்கள் பயன்படுத்தியது.

இது ப்ளாட்ஃபார்ம் ஷூ எனப்படுகிறது.

பொதுவா பெண்கள் தங்கள் ஸ்டேடசிற்காக இது போல் உயரமான செருப்புகளை அணிந்து இருக்கிறார்கள்.அணிகிறார்கள். வசதி என்பதை விட அலட்டல் தான் இதில் அதிகம்.

Stiletto Heel - கத்தி போல் மிக கூர்மையான் முனைகள் கொண்டது.

பெண் குழந்தைகளுக்கு கண்டிப்பா ஹை ஹீல்ஸ் செருப்புகளை வாங்கி தர வேண்டாம்.சிறிய வயதிலேயே அதன் பாதகங்களை சொல்லி விட்டால் நல்லது.இடுப்பில்,காலில்,பாதத்தில், முதுகில் வலி ஏற்படுத்தும். வலியினை பொறுத்துக் கொண்டு இளம் வயதில் இத்தகைய செருப்புகளை அணிவதால் கட்டாயம் கால் வலி,முதுகு வலியால் வாழ்க்கையின் பிற்பகுதியில் கஷ்டப்பட நேரிடும்.லிகமெண்ட் எனப்படும் மெல்லிய ஜவ்வு கிழிந்து போவது,கால் மூட்டுகள் திரும்பி பாதிப்படைவது, டிஸ்க் ப்ரோலாப்ஸ் போன்ற பாதிப்புகள் ஏற்பட கூடும். உடலில் இரத்த ஓட்டம் கூட பாதிக்கப்படுமாம். ஸ்லிப் ஆகி கீழே விழும் போது கை மணிக்கட்டு பாதிக்க படுமாம். செருப்பு கடைக்கு போனால் இத்தகைய செருப்புகளை பார்க்க மட்டும் செய்யுங்கள். வாங்க வேண்டாம்.

பெண்கள் அணியும் ஹைஹீல்ஸ்கள் வெளி ஆட்களுக்கு தெரிந்து விடுகிறது.எனவே,இப்படி கட்டைல போறவ என்று கிண்டல் செய்ய முடிகிறது. ஆண்களுக்கு இருக்கும் Elevator Shoes - Secret Shoes என்றே அழைக்கப்படுகிறது. காரணம் ஷூக்களின் உள்ளே உயரமாக்க பட்டிருக்கும். வெளியில் இருந்து பார்த்தால் பெண்கள் ஹை ஹீல்ஸ் போல தெரியாது. ஆகவே,கட்டைல போறவனும் இருக்கிறார்கள்.

பாஸ்டன் ஐஸ் கிங்கும் சென்னை ஐஸ் ஹவுஸும்

2011-08-23T08:55:00.001+05:30

சென்னையில் தற்போது விவேகானந்தர் இல்லம் எனப்படும் ஐஸ்ஹவுஸ் பற்றி இந்த பதிவில்.

ஃப்ரெடரிக் டுயுடர் 1805-ல் அவரின் நண்பர்கள் மற்றும் மற்ற பிஸினஸ்மேன்களின் சிரிப்பிற்கு ஆளானார். ஏனெனில் அவர் எடுத்த முடிவு அத்தகையது.அமெரிக்காவின் நியூ இங்கிலாந்தின் ஏரியிலிருந்து ஐஸ் கட்டிகளை கப்பலில் ஐரோப்பா,கரீபியன் மற்றும் இந்தியாவிற்கு ஏற்றுமதி செய்ய போவதாக கூறினால் யாருக்கு தான் சிரிப்பு வராது. ஆனால், இந்த பாஸ்டன் ஐஸ் கிங், டூயுடர் ஐஸ் கம்பெனி மூலம் அதை நடத்தி காட்டினார்.
பாஸ்டனில் இருந்த ஒரு பணக்கார வக்கீல் அப்பாவிற்கு மூன்றாவது மகனாக பிறந்தவர் டுயுடர்.

16,000 மைலகளுக்கு அப்பால் உள்ள இந்தியாவிற்கு ஐஸ் அனுப்ப சாமுவேல் ஆஸ்டின் என்பவருடன் கூட்டு சேர்ந்தார்.1833-மே மாதத்தில் டஸ்கனி என்ற கப்பல் மசாசுசெட்ஸில் இருந்து கல்கத்தாவிற்கு 180 டன் ஐஸுடன் அனுப்பப்பட்டது. செப்டம்பரில் அந்த கப்பல் கல்கத்தா வந்தடைந்த போது 100 டன் ஐஸ் அதில் இருந்தது.

1842-ல் சென்னையிலும் ஐஸ் ஹவுஸ் கட்டப்பட்டு அங்கும் ஐஸ் அனுப்பட்டது. ஆண்டு முழுவதும் இங்கு வரும் ஐஸ்கட்டிகள் பாதுகாக்க பட்டன. சென்னை,கல்கத்தா,மும்பாய் ஆகிய மூன்று இடங்களிலும் ஐஸ் ஹவுஸ்கள் கட்டப்பட்டன. இதில் சென்னையில் மட்டுமே ஐஸ் ஹவுஸ் என்ற பெயருடன் அந்த இல்லம் இருக்கிறது. மற்ற இரண்டு இடங்களிலும் அந்த பெயர் ஐஸுடன் சேர்ந்து ஆவியாகி போனது.

ஐஸ் தாயாரிக்க இயந்திரம் கண்டுபிடிக்க பட்டதும் டுயுடரின் ஐஸ் பிசினஸ் முடிவிற்கு வந்தது. அதன் பின் இந்த பில்டிங் பிலிகிரி ஐயங்கார் என்ற வக்கீலால் வாங்கப்பட்டது. இவர் சுவாமி விவேகானந்தரின் தீவிர ஆதரவாளர் ஆவார்.

பிலிகிரி ஐயங்கார் இறப்பிற்கு பிறகு விசாகப்பட்டினத்தை சேர்ந்த ஒரு ஜமீந்தாரால் வாங்கப்பட்டது. அதன் பிறகு அரசே இந்த கட்டிடத்தை வாங்கி பிராமண விதவை பெண்கள் ஹாஸ்டலாக்கியது. அதன் பிறகு பி.எட் படிப்பவர்களுக்கான ஹாஸ்டலானது.1897-ல் விவேகானந்தர் சென்னை வந்த போது 9 நாட்கள் இங்கு தங்கியிருக்கிறார். 1963-ல் விவேகானந்தர் நூற்றாண்டு விழாவில் விவேகானந்தர் இல்லமானது. 1997-ல் விவேகானந்தர் இங்கு வந்து தங்கி 100 ஆண்டுகள் ஆனது நினைவாக ராமகிருஷ்ண மடத்திற்கு தமிழக அரசு ஒத்திக்கு கொடுத்து உள்ளது. தற்போது இந்த இல்லம் ராமகிருஷ்ணா மடத்தின் சென்னை கிளையாக இயங்கி வருகிறது. புதன் கிழமை தவிர மற்ற நாட்களில் விவேகானந்தர் இல்லம் பொது மக்களின் பார்வைக்காக காலை 9 - 12.30,
மாலை 3 - 6.30 வரை திறந்திருக்கும். விவேகானந்தரின் அரிய புகைப்படங்கள் பார்வைக்கு உள்ளது.

ஆண்களின் எந்த ஜீனெல்லாம் காணாமல் போகணும்?

2011-08-22T09:12:00.000+05:30

X,Y,குரோமோசோம்கள் பற்றி கொஞ்சமா தெரியும். பள்ளியில் என்னவென்றே தெரியாம புரியாம கடம் அடித்து படித்தது. அதை கொஞ்சமா தூசி தட்டி இருக்கிறேன்.

குரோமோசோம்களில் தான் மரபணுக்கள்(Genes) இருக்கின்றன. பரம்பரையாக நமக்கு வருகின்ற குணம்,நிறம்,உயரம்,நோய்கள் இவைகள் இந்த மரபணுக்கள் மூலமே நமக்கு வருகின்றன. 23 ஜோடி குரோமோசோம்கள் மனித உடலின் ஒவ்வொரு செல்லிலும் இருக்கின்றன.குரோமோசோம் 1,குரோமோசோம் 2,குரோமோசோம் 3, இப்படியாக குரோமோசோம் 22 வரை ஜோடி ஜோடியாக இருக்கின்றன. தாயிடமிருந்து ஒன்றும், தகப்பனிடமிருந்து ஒன்றும் ஒவ்வொரு ஜோடியில் இருக்கிறது. 23ஆவது குரோமோசோம் செக்ஸ் குரோமோசோம் ஆகும். ஒரு ஜோடி செக்ஸ் குரோமோசோம்கள் ஒவ்வொரு செல்லிலும் இருக்கின்றன. இந்த ஜோடியில்

XX-குரோமோசோம்கள் இருந்தால் பெண்.
XY-குரோமோசோம்கள் இருந்தால் ஆண்.

குரோமோசோம் 1-ல் இருக்கும் ஜீன்களின் எண்ணிக்கை - 4220.இதில் ஒரே ஒரு ஜீனில் ஏதேனும் கோளாறு என்றாலும் அதற்குரிய நோய் தாக்கும். குரோமோசோம் 21-ல் 300 -400 ஜீன்கள் இருக்கின்றன. இரண்டு 21 குரோமோசோம்களுக்கு பதிலாய் மூன்று இருந்தால் வரும் நோய் தான் Down Sydrome.

தொடக்கத்தில் இந்த X,Y குரோமோசோம்களிலும் ஒரே அளவில் தான் மரபணுக்கள் இருந்தனவாம்.இன்று X-குரோமோசோமில் இருப்பதோ 2000 மரபணுக்கள்.ஆனால்,Y-குரோமோசோமில் இருப்பதோ 78 மரபணுக்களே. SRY GENE தான் Y-குரோசோமில் உள்ள முக்கியமான ஒரு ஜீன் ஆகும்.XX என இரண்டும் ஒன்றாக இருக்கும் போது ஒரு மரபணுவில் எதேனும் பிரச்சனை எனில் கூடவே இருக்கும் இன்னொரு மரபணு அதனை சரி செய்து விடுகிறது. ஆனால், Y-குரோமோச்சோம் தனித்து வருவதால் ஒவ்வொரு முறையும் அதன் மரபணுவில் ஒன்றை அது இழந்து விடுகிறதாம். X-குரோசோம்கள் அளவில் Y-ஐ விட பெரியதாகவும்,நல்ல சுறுசுறுப்பான DNA,RNA,PROTEIN பெற்று இருக்கின்றன.

அடுத்த 10 மில்லியன் ஆண்டுகளுக்குள் Y-குரோமோசோம்கள் தங்களிடம் உள்ள 78 மரபணுக்களையும் இழக்க நேரிடும்.எல்லா மரபணுக்களும் காணாமா போச்சுன்னா எப்படி ஆண் குழந்தைகள் பிறக்கும்?ஆணே இல்லையெனில் எப்படி குழந்தைகள் பிறக்கும்? அதெல்லாம் கண்டு பிடித்து கொண்டு இருக்கிறார்கள்.

ஒரு சந்தோஷம் என்னவெனில், Y-குரோசோம்கள் ரகசியமாக தன் மரபணுவில் முக்கியமானவைகளுக்கு ஒரு பிரதி எடுத்து வருகிறதாம். MADAM-I 'M ADAM இந்த சொல்லை எப்படி முன்னாடி, பின்னாடி வாசித்தால் ஒரே மாதிரி வருகிறதோ அப்படி பிரதி எடுத்து வருகிறதாம்.
எனவே,அவ்வளவு சீக்கிரம் Y-யில் இருக்கும் 78 மரபணுக்களும் காணாப்போகாது.

ஆனாலும்,வரும் நாட்களில் என்னென்ன மரபணுக்கள் ஆண்களை விட்டு காணாமல் போகணும் என்று என்னை கேட்டால்,

1.இந்த டி.வி ரிமோட்டை தன் கையில் வைத்து கொண்டு என்ன பார்ப்பது என்று குறிக்கோள் இல்லாமல் அடிக்கடி சேனல் மாற்ற செய்யும் அந்த குறிப்பிட்ட மரபணு.

2.புடவை கடைக்கு வரமாட்டேன் என்று தைரியமா மனைவியிடம் சொல்ல முடியாமல் கடனே என்று கடை வாசலில் தேவுடு காக்க வைக்கும் அந்த மரபணு.

3. காய்,பழக் கடைக்கு தனியே போனால் அழுகியதும்,பழையதையும் பார்த்து வாங்கி வரும் அந்த மரபணு.

4. குடும்ப உறுப்பினர்களின் பிறந்த நாட்கள் போன்ற முக்கியமான நாட்களை மறந்து போகும் அந்த மரபணு.

5. பாட்டிலை பார்த்தாலே நாக்கை சப்புக் கொட்டும் அந்த மரபணு.

6. மனைவி வந்ததும் தன் கூட பிறந்தவர்களையும்,பெற்றவர்களையும் மறக்க வைக்கும் அந்த மரபணு.

7. தலையில் வழுக்கை விழ வைக்கும் அந்த குறிப்பிட்ட மரபணு.

இப்படியே என்ன என்ன மரபணுக்கள் காணாமா போகணும்னு பின்னூட்டத்தில் சொல்லிட்டு போங்களேன்

ஏன் இப்படி?

2011-07-27T22:15:00.001+05:30

இந்த பதிவை படிக்க நேர்ந்த போது மனது ரணமாய் வலித்தது. இப்படி செய்யவும் மனிதர்கள் இருக்கிறார்களா? என்ன பிரச்சனை இவர்களுக்கு? ஏன் இப்படி? என்ன செய்தால் இப்படி பட்ட மனிதர்கள் இல்லாத சமுதாயத்தினை ஏற்படுத்த முடியும்?

நம் வீட்டு ஆண் குழந்தைகளை ஒழுங்காய் வளர்க்க வேண்டும்.பெண்களின் கஷ்டங்களை அவர்களுக்கு உணர்த்தி வளர்க்க வேண்டும்.அதுவே இந்த சமுதாயத்திற்கு செய்யும் முதல் பணி என்று தோன்றியது.எல்லோரும் அப்படி செய்தால் ஏன் இப்படி என்றே கேள்வியே இல்லாமல் போகாதா என்ற நப்பாசை+ வேறு என்ன செய்வது என்ற கேள்வியுடன்..

ஐடியா ப்ளீஸ்ஸ்..

2011-07-27T12:20:00.011+05:30

வீடு ஒன்று கட்டிக் கொண்டு இருக்கிறோம்.

டைல்ஸ்,மார்பிள்,ஸ்விட்ச்கள்,(எந்த கம்பெனி) கதவுகள்,ஜன்னல்கள்,அதற்கு வைக்கப்படும் கம்பிகள்,ரூம்களுக்கான பெயிண்ட்கள், அதன் கலர்கள்,வீட்டை சுற்றிலும் உள்ள இடத்தில் வைக்கப் படவேண்டிய மரங்கள், செடிகள்.. இவைகளை பற்றி அனுபவம் உள்ள நண்பர்கள் ஐடியாக்கள் கொடுத்தால் அதை உபயோகப்படுத்திக் கொள்ள இருக்கிறேன்.

கிச்சன் மேடை எந்த கலர் கிரானைட் நல்லது? ஸிங்க் பற்றி,கிரைண்டர்,மிக்ஸி வைக்கும் மேடை பற்றி,அதன் உயரம் பற்றி,மாடிப்படிகளில் எந்த கல் போட்டால் நல்லது? ஹால்,டைனிங் எந்த கலரில் தரை போடுவது?பாத்ரூமில் எந்த கலர் டைல்ஸ் போட்டால் ரொம்ப நாட்கள் உழைக்கும்?ஏனெனில் இந்த துறையில் உள்ளவர்கள் கூறுவதை விட அனுபவித்தவர்கள் கூறினால் அது உபயோகமாக இருக்கும்.கிச்சன் செல்ஃபிற்கு ஃப்ளை வுட்? ரப்பர் வுட்? மொட்டை மாடியில் என்ன தரை?

சென்னையில் நீங்கள் சாமான்கள் வாங்கிய கடைகள் பற்றிய விபரங்கள்.

நண்பர்கள் தங்களுக்கு தோன்றும் ஐடியாக்களை சொல்வீர்கள் என்ற நம்பிக்கையில்...

நலமுடன் திரும்பியாச்சு..

2011-07-07T22:00:00.002+05:30

ஹிமாலாயாவில் ரூப்கண்ட் ட்ரெக்கிங் போன என் மகன் நகுல் பத்திரமாய் வீட்டிற்கு வந்து சேர்ந்தான். ஃபோட்டோக்கள் பார்க்க பார்க்க ச்ச நாமும் போயிருக்கலாமோ என்று நினைத்தேன்.

அருமையான படங்கள் உங்கள் பார்வைக்கு

வெரைட்டி-ஆனி 2011

2011-07-04T08:35:00.000+05:30

ஒல்லியாவே இருக்கிறேன் கொஞ்சமா குண்டாக என்ன செய்றது என்ற ரிஷியிடம் என் அம்மா தினம் காலையில் பழைய சாதம் அல்லது தயிர் சாதம் சாப்பிடு உடம்பு போடும் என்று சொல்லவும் ரிஷி 10 நாட்களாக காலையில் சாதம் சாப்பிடுகிறான்.என் தம்பி மகன் விஷால் ரிஷியிடம் அச்சச்சோ ஏன் நாய் புவ்வா(சாதம்) சாப்பிடுறீங்க? என்று கேட்கவும் ரிஷி முகத்தினை பார்க்கணுமே.விஷாலுக்கு தயிர் அலர்ஜி.

புதியதாய் ஹைதையில் இருந்து என் வீட்டின் பக்கத்தில் குடிவந்திருக்கும் ஃப்ரெண்ட் ஒருவரின் சகோதரிக்கு ஒரு வாரமாய் தமிழ் ட்யூஷன் நான் தான். அப்படியே என் சுந்தர தெலுங்கையும் டிங்கரிங் செய்து கொண்டு இருக்கிறேன்.

முன்பெல்லாம் தியேட்டர்,ட்ரையினில் மூட்டை பூச்சிகள் அதிகம் இருக்கும். இப்ப இல்லையே எங்கே போச்சு என்று நினைப்பேன். அமெரிக்கவில் மூட்டை பூச்சி அதிகமாம். எல்லா மூட்டை பூச்சிக்கும் யாருப்பா விசா கொடுத்தது?இறப்பதற்கு முன் ஒசாமா செய்த சதியா இருக்குமோ.

2009-ல் நான் மலேஷியா போன போது 13-ஆம் வாய்பாடு தெரியாமல் ஷாப்பிங் செய்ய மிக கஷ்டப்பட்டேன்.இனி தெரிந்து நோ யூஸ்.இப்போ போனா 14-ஆம் வாய்ப்பாடு தான் தெரியணுமாம்.ஏன்னா,ஒரு ரிங்கிட் இப்ப 14 ரூபாயாம்.

இன்னா செய்தாரை ஒறுத்தல் அவர் நாண

நன்னயம் செய்து விடல்..

திருவள்ளுவர் சொல்லி சென்றது. இதன் படி நடக்கலாம் என்று பார்த்தால் இப்பெல்லாம் இன்னா செய்பவர்களுக்கு நாணமே வராது போல.பிறகு அவருக்கு நன்னயம் செய்து என்ன பயன்? விடல் என்றால் பயன் இருக்காது,ஆனாலும் நல்லது செய் என்கிறார் போல.

படித்த ஜோக்:

சில வருடங்கள் முன்பு ஒரு வடை 50 காசு.ஒரு ஃபோன் கால் ஐந்து ரூபாய்.

இப்போது ஒரு வடை ஐந்து ரூபாய்.ஒரு ஃபோன் கால் 50 காசு.

டெக்னாலஜி ரொம்ப வளர்ந்து என்ன? வடை போச்சே???

திருப்பதி தேவஸ்தானத்தின் காட்டுமிராண்டிதனம்

2011-06-27T23:30:00.013+05:30

போன சனியன்று திருப்பதி-திருமலை போய் வந்தேன். ஏழுகொண்டலவாடாக்கு மக்கள் மேல் என்ன கோபமோ தெரியலை.
கோயிலிற்கு செல்பவர்கள் சக்கை பிழிந்து அனுப்ப படுகிறார்கள். நான் போன அன்று செம கூட்டம்.கோயில் உள்ளே மெயின் கோபுரம் நுழைந்ததும்,உள்ளே தரிசனம் முடித்தவர்கள் வெளியே வரவும் இரண்டாவது கேட்டில் கட்டி வைத்துள்ள கயிறினை இழுத்து கியூவில் வரும் நம்மை உள்ளே அப்படியே தள்ளுகிறார்கள்.ஆடு,மாடு மந்தைகள் போல ஒரு 700 முதல் 1000 பேர் கியூ எதுவும் இல்லாமல் அப்படியே தப தபெவென்று கோயில் உள்ளே ஓடுகிறார்கள்.இதில் கைக்குழந்தை வைத்திருப்பவர்கள்,வயதானவர்கள் எல்லோரும் இருக்கிறோம்.

உள் பிரகாரத்தில் ஒரே அடிதடி கோயில் உள்ளே கருடாழ்வார் இருக்கும் இடத்தில் நுழைவதற்கு.நன்கு பலசாலிகளாய் இருப்பவர்கள் அடித்து பிடித்து உள்ளே நுழைய அவர்களுடன் மாட்டி கொண்ட நாமும் அப்படியே இழுத்து செல்ல படுகிறோம்.அப்பாடி உள்ளே போயாச்சு அதோ ஏழுகொண்டலவாடா தெரிகிறார் என பார்த்து கொண்டே செல்லும் போது உள்ளே தடிதடியாய் உள்ள தேவஸ்தான ஆட்களும், கல்லூரியில் படித்து கொண்டே இங்கே சேவைக்காக வந்துள்ள புளூ யூனிஃபார்மில் இருக்கும் பசங்களும் (Guide) (என்ன சாப்பாடு சாப்பிடுகிறார்களோ) ஒரு வரைமுறையின்றி அகப்பட்ட பக்தர்கள் முதுகில் இரண்டு கை வைத்து கன்னாபின்னாவென்று தள்ளுகிறாகள்.
தள்ளப்பட்டவர்கள் அடுத்தவர்களில் மீது மோதி அவர்களையும் தள்ளுகிறார்கள்.துண்டை காணோம்,துணியை காணோம் என்று வெளியில் வீசி எறிய படுகிறோம்.சாமி கும்பிட போன இடத்தில் கெட்ட வார்த்தைதான் வாயில் வந்தது.

300 ரூபாய் சீக்கிர தரிசனத்திற்கு தர்ம தரிசனத்திற்கு வரும் கூட்டம் வருகிறது. செம கலெக்‌ஷன்.அடைக்கப்பட்டிருக்கும் கேஜில் இருந்து கோயில் சைடில் இருக்கும் மரப்பாலத்தில் பக்தர்கள் வரும் முன்னர் 50 ரூபாய்,300 ரூபாய், மற்றும் தர்ம தரிசனத்திற்கு வரும் அனைவரும் ஒரே பாதையில் இணைத்து விடுகிறார்கள்.

இவ்வளவு பணம் வைத்துள்ள தேவஸ்தானம் டெக்னாலஜி இவ்வளவு வளர்ந்தப்பிறகும் இப்படி காட்டு மிராண்டிதனமாய் நடந்து கொள்வது எதற்காக? மனிதனை இப்படி விலங்குகளை போல் எதற்கு நடத்த வேண்டும்.
அமைதியான முறையில் அங்கு தரிசனம் செய்ய வழியே இல்லையா? அதற்கு நம் அறிவியல் நமக்கு உதவாதா? தேவஸ்தானத்தில் ஐ.ஏ.எஸ் படித்தவர்கள் கூட வேலை செய்கிறார்கள்.அவர்கள் படிப்பு இதற்கு உதவாதா?

ஒரு வயதிற்குட்பட்ட குழந்தை வைத்திருக்கும் குடும்பம் கோயில் உள்ளே செல்வதற்கு ஒரு ஸ்பெஷல் வரிசை உள்ளது. உள்ளே நுழையும் போது அந்த கைக்குழந்தையின் கையில் புளூமையால் ஒரு வாரத்திற்கு அழியாத அடையாளம் வைக்கப்படுகிறது!!!

லட்டு கொடுக்கும் இடம் மிக பெரியதாய் கட்டப்பட்டு லட்டு சீக்கிரம் வழங்குகிறார்கள்.ஒரு இடத்தில் இங்கு காலாணிகள் வைக்கும் இடம் என்று இருந்தது.பார்த்து சிரித்துக் கொண்டே வந்தோம்.இடுக்கண் வருங்கால் நகுக...

போன ஜென்மத்தில் காட்டுவாசி

2011-06-21T13:35:00.001+05:30

இவனை என்ன செய்றதுன்னே தெரியலை.ஆறு மாதங்களாக சென்னை ட்ரக்கிங் கிளப்பில் சேர்ந்துட்டு இவன் செய்ற அலம்பல்களை பொறுத்துக் கொள்ள வேண்டியதாய் இருக்கிறது.

வாரவாரம் ட்ரக்கிங் போறேன்னு இவன் செய்ற அலம்பல்கள். வெள்ளி காலையிலேயே போவதற்கு தேவையான பொருட்களை எடுத்து கொண்டு வேலைக்கு செல்கிறான். இல்லைன்னா வெள்ளி கிழமை மட்டும் வொர்க் ஃப்ரெம் ஹோம் என்கிறான்.காட்டில் படுத்துக் கொள்வதற்கு ஒரு ஸ்லீப்பிங் பேக்,சாப்பிடுவதற்கு ஒரு கிண்ணம்,ஒரு ஸ்பூன்,ஒரு செட் அழுக்கு ட்ரெஸ்.ரெடியாய் எந்நேரமும் தயாராக இருக்கிறது. ஆந்திராவில் நாகலாபுரம்,கர்நாடகாவில் ஷராவதி, ஊட்டி முதுமலை காட்டில் அனிமல் சென்சஸ்,கொடைக்கானல் டூ பழனி நடை,மூணாறு என்று வாரம் ஒரு இடம்.

கடந்த ஆறு மாதங்களில் இவன் போன இடங்கள் தான் மேலே சொன்னவை. எப்பவும் அதே பேச்சு. போகும் முன்னாடி எங்கே போகிறோம் என்று லொட லொட. போயிட்டு வந்த பிறகு என்ன பார்த்தோம் என்று லொட லொட. ஒவ்வொரு முறை போகும் போதும் அம்மா போகட்டுமா என்று ஒரு சம்பிரதாய கேள்வி.உன் அப்பாக்கிட்ட கேட்டுக்கோ என்பேன் வழக்கமாய். நான் நேற்றே டாடிக்கிட்ட பெர்மிஷன் வாங்கிட்டேன் என்று போகிற போக்கில் எனக்கு ஒரு பல்பு. சும்மா நீங்கள் என்ன சொல்வீர்கள் என்று ஒரு மைக் டெஸ்டிங் என்று சொல்லி விட்டு என் கையில் அகப்படாமல் ஒரே ஓட்டம்.

எதாவது சொன்னால், சீக்கிரம் படித்து சீக்கிரம் வேலைக்கு போயாச்சு ஏன் இப்படி திட்டிக்கிட்டே இருக்கீங்க என்று கேள்வி கேட்கிறது.பொண்டாட்டி வந்தா விடமாட்டா நீங்க என் செல்லம்ல என்று ஒரே ஐஸ்.நகுல் இந்த வாரம் ஹிமாலயாவில் ரூப்கண்ட் போயிருக்கான்.

"வந்து” படும் பாடு

2011-06-16T10:10:00.001+05:30

வந்து நான் ஒரு பதிவு போடணும் என்று நினைத்தேன்.எங்க வந்து என்றெல்லாம் கேட்க கூடாது.

என்னுடைய பேட்டி டிவியில் ”வந்தால்” இப்படி தான் இருக்கும்.

சமச்சீர் கல்வி பற்றி:

புதிய அரசு வந்து சமச்சீர் கல்வி வேண்டாம் என்கிறார்கள்.வந்து, போன அரசு அதை செயல்படுத்தியது தான் காரணமா,தெரியலை.வந்து இப்ப வந்து பார்த்தீங்கண்ணா,புதிய அரசு எப்படி சில நாட்களுக்குள் சமச்சீர் கல்வி சரியில்லை என்று கண்டுபிடித்தது? வந்து எல்லா ஸ்டேட்ஸ்லேயும் இரண்டே முறை கல்வி தான் உள்ளது.அது வந்து சி.பி.எஸ்.சி, மற்றும் அந்த அந்த ஸ்டேட் ஃபோர்ட் மட்டும் தான் உள்ளது. வந்து இங்க தமிழ் நாட்டில் மட்டும் தான் வந்து பார்த்தீங்கண்ணா இத்தனை கல்வி முறைகள். எனவே, இது ஒன்றும் இந்தியாவிற்கு புதிய கல்வி முறை இல்லை.

பெண்களுக்கு பாதுகாப்பு இல்லாத நாடுகள் பற்றி:

உலகத்திலேயே பெண்களுக்கு பாதுகாப்பு இல்லாத நாடுகள் வந்து ஆப்கானிஸ்தான் தான் இதில் முதல் இடம் வகிக்கிறது. அதன் பிறகு வந்து பார்த்தீங்கன்ணா வந்து காங்கோ வருது லிஸ்ட்ல. மூணாவதா பார்த்தீங்கண்ணா வந்து பாகிஸ்தான் வருது. வந்து மருத்துவ வசதி இல்லாததால் வந்து இங்கு தான் அதிக பெண்கள் வந்து இறக்கிறார்கள்.நான்காவதாக வந்து வருத்தத்துடன் இந்தியா அப்புறமா சோமாலியா.
வந்து பிரசவத்தில் இறப்பு,
வந்து படிப்பறிவு கம்மி,
வந்து கட்டாய திருமணம்,
பெண்கள் பலவந்தமாக கற்பழிக்கப்படுதல்,
குழந்தை உண்டான பெண்கள் சோகைநோயுடன் இருத்தல்,
பெண்கள்,பெண்குழந்தைகள் விபச்சாரத்திற்காக கடத்தப் படுதல்,
18 வயதிற்கு முன்பே திருமணம் செய்வித்தல்,
கருவிலே கொல்லுதல் இப்படி கணக்கெடுத்து தான் இப்படி வந்து ரேங்கிங் செய்து இருக்காங்க.

மூணாறு பற்றி:

2010-ல் ஆசியாவிலேயே மூணாறு தான் இரண்டாவது பெஸ்ட் டூரிஸ்ட் ஸ்பாட்டா செலக்ட் ஆகி இருக்கு.வந்து இங்க பார்த்தீங்கண்ணா மலை முழுவதும் தேயிலை செடிகளாக இருக்கும். 19ஆவது நூற்றாண்டு இறுதியில் தான் இங்கு தேயிலை பயிரிடப்பட்டதாம்.வந்து டோக்கியோ முதல் இடமாம்.வந்து online travel guide TripAdvisor 8 வருடங்களாக தேர்ந்தெடுக்கிறது.

வேறு ஒன்றும் இல்லை. டிவியில் யாரேனும் நம் தமிழ்க்காரங்க பேட்டி கொடுத்தாங்கண்ணா இப்படி வந்து வந்து என்று அடிக்கடி சொல்றோம். வந்து ஒரு பாயிண்ட் சொல்லும் போது அடுத்த பாயிண்டை யோசிக்க இந்த வந்துவை உபயோகப்படுத்துகிறோம் போல.

ஊர் தான் காரணமா?

2011-06-07T19:07:00.000+05:30

போன வாரம் நான் கலந்து கொண்ட திருமணத்தில் மனம் நொந்து போயிருந்த மூன்று பெற்றோர்களை சந்தித்தேன்.அவர்கள் அவர்களின் மகன்/ளால் மனம் நொந்து போய் இருந்தார்கள்.அவர்களின் மகன்/ள் அவர்களாகவே திருமணம் செய்து கொண்டு விட்டது தான் காரணம்.இல்லை ஓடிப்போய்விட்டது தான் காரணம்.

நான் பார்த்த மூன்று பெற்றவர்களும் குறை சொன்னது சென்னையை தான்.சென்னைக்கு படிக்க அனுப்பினேன்,வேலைக்கு அனுப்பினேன் ஓடி போயிட்டான்/டாள்.என்னமோ சென்னையில் தான் பிள்ளைகள் தினம் ஓடிப் போவதை போல்.

சென்னையிலேயே பிறந்து வளரும் குழந்தைகளை காட்டிலும் தமிழ்நாட்டின் உள்நகரகங்களில்,கிராமங்களில் இருந்து வேலைக்காக, படிப்பதற்காக சென்னை வருபவர்களே இப்படி காதலில் சிக்கி கொள்கிறார்களோ என்று தோன்றுகிறது.சென்னையில் காதல் செய்வது மிக சுலபம்.சொந்தக்காரர்கள் அதிகம் இருப்பதில்லை. தெரிந்தவர்கள் கண்களில் படாமலே நல்லா ஊர் சுற்றலாம்.வேலைக்கு வரும் போது அனுபவிக்கும் திடீர் சுதந்தரம் மிகுந்த தைரியத்தினை தருகிறது.பெற்றவர்களை தலை குனிய செய்வது சர்வ சாதாரணமாகி விட்டது.சர்வ சாதாரணமாய் அபார்ஷன் செய்து கொள்கின்றனர்.ஒரு குழந்தைக்கு எத்தனை ஜோடிகள்,எத்தனை வருடங்கள் உண்மையாய் தவம் இருக்கின்றனர்.இப்படி வேண்டாதவர்களுக்கு குழந்தை உண்டாவதும், வேண்டியவர்கள் காத்து கிடப்பதும் கொடுமை.

இன்னொரு கொடுமை என்னவென்றால் ஜாதி பார்ப்பதால் தன் பெண்ணை கட்டாயப்படுத்தி தங்கள் ஊருக்கு அவள் காதல் கணவனிடமிருந்து பிரித்து அழைத்து சென்று வேறு ஒருவருக்கு திருமணம் செய்விப்பது.ஊரில் அந்த குடும்பத்தில் அப்படி நடந்தது இந்த குடும்பத்தில் இப்படி நடந்தது என்று அவர்களே சொல்ல கேட்டப்போது எங்கே இருக்கிறது நம்ம கலாச்சாரம் என்று தேடி கொண்டு இருக்கிறேன். கலாச்சாரம் என்பதெல்லாம் நம்மை நாமே ஏமாத்தி கொள்வதற்கு உண்டான ஒரு பேத்தல் வார்த்தை என்று புரிந்தது. இதில் சிலர் திரும்பவும் வீட்டில் எல்லோரையும் ஏமாற்றி விட்டு ஓடி போன கதைகளும் உண்டு.

சென்னையில் இருக்கும் பெற்றோர் தங்கள் மகன்/மகள் காதல் செய்வது தெரிந்தால் ஒத்துக் கொண்டு திருமணம் முடித்து வைக்கின்றனர்.ஆனால், கிராமங்களில் ஜாதி காரணமாய் அதனை ஒத்துக் கொள்வது இல்லை. எனவே, சொல்லாமல், கொள்ளாமல் ஓடி விடுகின்றனர்.

இங்கு சென்னை சமூகத்திலும் காதல் கல்யாணத்திற்கு உடனே பெற்றோர் ஒத்துக் கொள்வதில்லை. அந்த ஜோடிக்கு சொல்லி பார்க்கிறார்கள். கேட்கவில்லை எனில் டீசண்டாய் திருமணம் செய்விக்கின்றனர்.ஆனால், ஊரிலோ வறட்டு கெளரவம் பார்த்து கொண்டு ஓட விட்டு அப்புறம் தேடுகின்றனர் அல்லது புலம்புகின்றனர்.

ஊரில் ஆண், பெண் பேசவே கூடாது என்று வளர்க்கப்படும் சூழலில் திடீரென்று வேலைக்கு அல்லது மேற்படிப்பு படிக்க வரும் போது சென்னையில் இருக்கும் சுதந்திர சூழ்நிலையில் எதிர்பாலிடம் சாதாரணமாய் பேசும் போது கூட காதல் என்று மிக எளிதில் விழுந்து விடுகின்றனர்.ஆண்,பெண் நட்பு என்பது புரிவதில்லை.

சென்னையில் மகளை/னை வளர்க்கிறார்கள் கட்டாயம் காதல் திருமணம் தான் செய்வார்கள் என்று ஊரில் இருப்பவர்கள் நினைக்கிறார்கள். சாதாரண ஆண்,பெண் நட்பினை கொச்சை படுத்தி பேசுவார்கள்.சும்மா ஒரு முறை டூவீலரில் யாருடனவாது அவசரத்திற்கு போனாலே காதல் என்று கதை கட்டுவார்கள்.

இங்கேயே பிறந்து வளரும் குழந்தைகள் தெளிந்த சிந்தனையுடன் இருக்கிறார்கள்.ஆண்-பெண் நட்பினை சாதாரணமாய் எடுத்துக் கொள்கிறார்கள்.அதை பெற்றவர்களும் புரிந்துக் கொள்கிறார்கள். இங்கு நான் சொல்வது எல்லாமே மிடில் க்ளாஸ் மக்களை பற்றி.

ஆனால் ஒன்று மட்டும் புரிந்தது. இனிமேல் திருமணத்திற்கு ஆணோ அல்லது பெண்ணோ பார்க்க போகும் போது காதல் எதுவும் முன்னாடி இருக்கா என்று சம்பந்தப்பட்டவர்களையே நேரில் விசாரித்து திருமணம் முடிப்பது அனைவருக்கும் நல்லது. இல்லையெனில் ஓடிபோனவன்/ள்,திரும்ப வந்தவள்/ன்,திரும்ப ஓடிப்போக ப்ளானில் இருப்பவன்/ள் என்று யாராவது நம் வீட்டிற்கு வர சான்ஸ் உள்ளது.

எப்பவும், எங்கேயும் ஓடி போகிறவர்கள் இருப்பார்கள்.ஊர் என்ன செய்யும்? என் அம்மா ஸ்கூல் படிக்கும் காலத்திலேயே காதல் திருமணம் நடந்து இருக்கிறது. 1960-களில்.என்னவோ இப்பதான் கலிகாலம் முத்திவிட்டது என்பது போல் புலம்பவது தானே நம்ம ஸ்டைல்.

திரும்பவும் ஒண்ணாப்பு

2011-06-03T12:26:00.001+05:30

ஏற்கனவே 3 முறை ஒண்ணாப்பு படிச்சாச்சு.ஒன்று எனக்காக நானே படிச்சது.திரும்ப படிச்சது என் இரண்டு பசங்களுக்காக.இப்ப நான்காவது முறையாக ஒண்ணாப்பு படிக்க போவது என் தம்பி மகன் விஷாலுடன்.போன வாரம் திடீரென்று என் தம்பிக்கு பெங்களூர் ட்ரான்ஸ்ஃபர்.இங்கே விஷாலுக்கு ஏப்ரலிலேயே ஸ்கூல் அட்மிஷன் எல்லாம் முடித்து ஜூன் 3-ல் ஸ்கூல் ஓப்பனிங்கிற்காக காத்து இருக்கையில் பெங்களூர் ட்ரான்ஸ்ஃபர்.அதனால், விஷால் இனிமேல் இங்கே என் வீட்டில்.ஆகவே இந்த வருடம் படிப்பு எனக்கு ஜாஸ்தி இருக்கும். அதிக பதிவுகளை எழுத முடியாது என்றே நினைக்கிறேன்.(அப்பாடி நிம்மதி என்ற உங்க மைண்ட் வாய்ஸ் கேட்குது)

போன ஜூனில் தான் நான் மிக சந்தோஷமாய் இருந்தேன்.அப்பாடி என் சின்ன மகனும் ஸ்கூல் முடித்து காலேஜ் போகிறான் என்று.யாரோ கண்ணு போட்டுடாங்க.இன்னையிலிருந்து ஸ்கூல் திரும்ப ஆரம்பம்.விஷால் சேர்ந்து இருக்கும் ஸ்கூலில் நோ யூனிஃபார்ம்,நோ ஷூ, நோ டை எனவே நிம்மதி என்று நினைத்தேன்.ஆனால்,காலையில் செம பல்பு, கலர் ட்ரெஸ் பெரிய டெரர் போல அந்த ட்ரெஸ் வேண்டாம் இந்த ட்ரெஸ் வேண்டாம் என்று காலையில் சார் செம ட்ரில்.கடைசியில் அவருக்கு பிடித்த ஒரு ட்ரஸ்ஸில் ஸ்கூல் போனார்.

ஒண்ணாப்பில் இப்பவும் அ ஃபார் அம்மா தானா? நான் அத்தைன்னு சொல்லி தரப்போகிறேன்.நான் வளர்த்த என் இரண்டு பசங்களை பார்த்த பிறகும் என்னை நம்பி தன் மகனை என்னிடம் விட்டு போகும் என் தம்பியின் தைரியம் யாருக்கு வரும்.

திஹார் ஆசிரமம்

2011-05-20T17:35:00.001+05:30

1958-ல் டில்லியில் இருந்த சின்ன ஜெயில் திஹாருக்கு மாற்றப்பட்டது. திஹார் என்ற கிராமம் டில்லியின் மேற்கு பகுதியில் சாணக்கியபுரியிலிருந்து 7 கி.மீ தொலைவில் இருக்கிறது.அப்பொதைய ஜெயிலில் 1273 பேர் இருக்கலாம். இப்பொழுது 12 ஆயிரம் பேர் இருக்கின்றனர். ஆனால் 6500 கைதிகள் தங்க வைக்கவே போதுமான இடம் உள்ளது.திஹார் ஜெயில் ஆசியாவிலேயே மிக பெரிய ஜெயிலாகும்.மொத்தம் 10 ஜெயில்களை உள்ளடக்கியதே திஹார் ஜெயிலாகும். மிகவும் மாடர்னான ஜெயிலாகும். ஆர்.ஓ சிஸ்டத்தில் குடிக்க சுத்தமான தண்ணீர்,கேபிள் டீவி,உள்,வெளி விளையாட்டு அரங்குகள், மருத்துவ வசதி,கேண்டீன் வசதி,சந்திக்க வருபவர்களை சந்திக்க சுத்தமான ஹால்கள்,மிக நவீன சமையலறை ஆகியவற்றை கொண்டது.
பெண்களுக்கான் ஜெயிலின் நம்பர் 6 ஆகும்.

யோகா,மெடிடேஷன்,கம்ப்யூட்டர்,கைவினை பொருட்கள் பயிற்சி மட்டுமில்லாமல் இந்திராகாந்தி யுனிவர்சிட்டி நடத்தும் கரஸ்பாண்டன்ஸ் கோர்ஸ்களும் உள்ளது.

வாரம் ஒரு நாள் 5 நிமிடங்கள் ஃபோன் பேசி கொள்வதற்கு அனுமதி உண்டு. ஒரு கைதிக்கு இரு நம்பர் மட்டுமே பேச அனுமதி. பேசுவதும் முழுவதும் ரிக்கார்ட் ஆகும்.

தச்சு பட்டறை,நெசவு பட்டறை,தையலகம்,அச்சு பட்டறை,உணவு பதனிடும் தொழில்,பேக்கரி,காலனி தாயரித்தல்,விளையாட்டு உபகரணங்கள் தயாரித்தல் ஓவியம் வரைதல் என்று இந்த ஜெயிலில் நிறைய தொழில்கள் இயங்கி வருகிறது.இங்கு வேலை பார்க்கும் கைதிகளுக்கு அவர்கள் திறமைக்கு ஏற்ப சம்பளம் தின கூலி அடிப்படையில் வழங்க படுகிறது.

தாயாராகும் பொருட்கள் வெளியில் விற்கப்படுகிறது.

ஓவ்வொரு ஜெயிலிலும் பெரிய நூலகம் இயங்கி வருகிறது.மது,போதை அடிமை பட்டவர்களை மீட்க ஒரு செண்டரும் உள்ளது. 150 படிக்கைகளுடன் கூடிய ஒரு பெரிய மருத்துவமனை உள்ளது. பெண் கைதிகளின் குழந்தைகளை பராமரிக்க ஒரு சென்டரும் உள்ளது. இலவச சட்ட ஆலோசனையும் கைதிகளுக்கு உண்டு.

ஜெயில் நம்பர் 1: M - Z இந்த எழுத்துக்களில் தொடங்கும் பெயர் உள்ள கைதிகளுக்கானது.இதில் V&W எழுத்தில் ஆரம்பிக்கும் கைதிகள் மட்டும் துவாரகா ஜெயிலில். இது திஸ் ஹாசாரி கோர்ட்டில் தண்டனை பெற்ற கைதிகளுக்கானது.இதில் R என்று தொடங்கும் கைதிகளும் அடக்கம்.

ஜெயில் நம்பர் 2: A to Z ஆயுட் கைதிகளுக்கானது.

ஜெயில் நம்பர் 3: A to L பேருடைய கைதிகள்.

ஜெயில் நம்பர் 4: பாட்டியாலா கோர்டில் தண்டனை பெற்ற கைதிகள் அனைவரும்.

ஜெயில் நம்பர் 5: 10 வருட தண்டனை பெற்றவர்கள் மட்டும்.

ஜெயில் நம்பர் 6: எல்லா பெண் கைதிகளும்

ஜெயில் நம்பர் 7: 18-30 வயதிற்குட்பட்ட கைதிகளுக்கானது.

ஜெயில் நம்பர் 8 & 9: கார்கர்டோமா,சஹாதாரா கோர்டில் தண்டனை பெற்ற கைதிகளுக்கானது.

கைதிகள் தங்கள் சொந்தக்காரர்கள்,ஃப்ரெண்ட்சை வாரம் ஒரு முறை சந்திக்க முடியும். எடுத்துக்காட்டா, இப்போ 6 ஆம் நம்பர் ஜெயிலில் உள்ள K என்று ஆரம்பிக்கும் எழுத்துடைய ஒரு கைதியினை சந்திக்க வேண்டுமானால் திங்கள் அல்லது வியாழன் ஜெயில் அதிகாரியிடம் முன் அனுமதி பெற்று சந்திக்கலாம்.

ஜெயில் பற்றி முழுதும் படித்து பார்த்தால் ஜெயில் மாதிரி தெரியலை.ஏதோ ஒரு ஆசிரமம் மாதிரி தெரிகிறது. அங்கு போய் வருபவர்கள் நன்கு திருந்த அதிக வாய்ப்பு இருக்கிறது.

கிரண்பேடி இங்கு அதிகாரியாக பணியிலிருந்த போது தான் அதிக மாற்றங்களை கொண்டு வந்தார். திஹார் ஜெயில் என்பது திஹார் ஆசிரமமானதும் அப்போது தான்.

கொள்ளைக்காரர்கள்

2011-05-20T00:00:00.004+05:30

என் பெரிய மகன் சொந்த வீடு இல்லை என்று ஒவ்வொரு முறை வீடு மாற்றும் போதும் எப்பம்மா சொந்த வீட்டிற்கு போவோம் என்று புலம்புவான்.ஏனெனில், ஒவ்வொரு முறை வீடு மாற்றும் போதும் அதிகம் வெயிட் தூக்கி கஷ்டப்படுவது அவனே.நான், என் கணவர் எங்கள் திருமணம் வரை அவர் அவர் சொந்த ஊரில் மிக பெரிய சொந்த வீட்டில் இருந்தோம்.உங்கள் ராசி உங்களுக்கு வாடகை வீடு இளமை பருவத்தில் வாய்த்துள்ளது.ஆனால்,நிச்சயம் சீக்கிரம் சொந்த வீட்டிற்கு போய் விடுவோம் என்று சொல்லி சமாதான படுத்துவேன்.அப்பாவினை பார் எவ்வளவு பெரிய வீட்டில் வளர்ந்தவர் இன்று அவரும் தானே வாடகை வீட்டில் இருக்கிறார் என்று சமாதானம் செய்வேன்.வாடகை வீடு கூட இல்லாமல் ப்ளாட்ஃபார்ம்வாசிகளையெல்லாம் பாருங்கள் என்பேன். வீடு மாற்றும் போது தான் புலம்பல்கள்.அப்புறம் அதை மறந்தும் விடுவோம்.

ப்ளாட்ஸ் பிடிக்காது என்பதால் வாங்கவே முற்படவில்லை அதுவுமில்லாமல் ஏகப்பட்ட கமிட்மெண்ட்கள் என் கணவருக்கும். 12 வருடங்கள் முன்பு வாங்கி போட்டிருந்த ஒரு கிரவுண்டில் தற்போது வீடு கட்டலாம் என்று இந்த வருடம் ஜனவரியில் வேலை ஆரம்பித்து இப்பொழுது வீடும் அஸ்திவாரம் போட்டு கொண்டு இருக்கிறோம்.போன மாதம் நான் கட்டிக் கொண்டு இருக்கும் வீட்டிற்கு போகும் போதெல்லாம் மேஸ்த்ரி கவுன்சிலர் மகன் வந்தார்மா.அவரை வந்து சந்திக்க சொன்னார் என்று சொன்னார். அடுத்த முறை வரும் போது ஃபோன் நம்பர் வாங்கி வையுங்கள் என்று கூறி விட்டேன்.நம்பரும் கொடுத்தார்,அவரிடம் பேசினேன் என்ன விபரம் என்று கேட்டேன்.நாங்கள் கல்,மண் சப்ளை செய்கிறோம் எங்களிடம் நீங்கள் வாங்க வேண்டும் என்று அந்த மகர் சொன்னார்.இப்பொழுது எங்களுக்கு தெரிந்த சப்ளையரிடம் கடனுக்கு வாங்கி கொண்டு உள்ளோம்.லோன் இன்னும் வரவில்லை வந்ததும் உங்களிடம் வாங்க முயற்சி செய்கிறேன் என்று கோபத்தினை அடக்கி கொண்டு நல்லவிதமாய் பேசினேன். அந்த புது ஏரியாவில் போய் வசிக்கணுமே ஏன் பகைத்துக் கொள்ள வேண்டும் என்று கோபப்படாத மாதிரி நடித்தேன்.

நேற்று காலை வழக்கம் போல் வீடு கட்டும் இடத்திற்கு போனால் மேஸ்த்திரி இன்றைக்கு காலையிலிருந்து 4 முறை அவர் வந்து போனார்ம்மா.இந்த இடத்து ஓனரை உடனே வந்து என்னை பார்க்க சொல்.இல்லையெனில் மேற்கொண்டு வீடு கட்ட முடியாது என்று மிரட்டி சென்றுள்ளார் அந்த மகர்.இன்று பார்த்துட்டு போய்டுங்கம்மா.இல்லையெனில் வீண்பிரச்சனை என்றார். அட பாவிகளா, என் கணவர் காலை 9 மணியிலிருந்து ராத்திரி 12 மணிவரை கவர்ண்மெண்ட் பணியில் உண்மையாய் உழைத்து சம்பாதித்த காசு (சனி,ஞாயிறு கூட வேலைக்கு போவார்) + 17 வயதிலேயே தகப்பன் இழந்த,வெயில்,மழை என்று பாராமல் உழைத்த என் தம்பியின் காசு சேர்ந்து இந்த இடத்தை வாங்கி பதிவு செய்து, என் மகன்கள் படிப்பு காலேஜ் வரும் வரை + அந்த இடம் கொஞ்சம் டெவலப் ஆக வேண்டும் என்று 12 வருடங்களாய் பொறுமையாய் இருந்து இன்னும் லோன் கிடைக்காத நிலையில் வீடு கட்ட ஆரம்பித்தால் இந்த பிச்சைக்காரனை எதற்கு நான் போய் பார்க்க வேண்டும் என்று அந்த வேகாத உச்சி வெயிலில் கோபம் தான் முதலில் வந்தது.

என் தம்பிக்கு ஃபோன் செய்தால் ஆஃப் செய்து உள்ளது. என் கணவருக்கு ஃபோன் செய்தால் அவர் ஒரு மீட்டிங்கில் இருக்கேன் அப்புறம் கூப்பிடுகிறேன்மா என்கிறார்.

அடுத்த தெருவில் சில வீடுகளை விசாரித்தேன்.அவர் எந்த கட்சி, என்ன பெயர் என்று தெரிந்து கொள்வதற்கு. மிக பெரிய லெவலில் தற்போது தோந்து போன கட்சியினை சேர்ந்தவர்.ஆகா,நல்லா வேண்டும்டா உங்களுக்கு என்று கொஞ்சம் நிம்மதியாச்சு.சரி என்ன செய்வது என்று யோசித்து கொண்டே என் தம்பியின் ஃப்ரெண்டிற்கு ஃபோன் செய்தேன்.அந்த ஏரியாவில் அவருக்கும் நிலம் உள்ளது. அவர் உடனே அக்கா நீங்கள் அங்கேயே இருங்கள் அந்த ஏரியா தலைவரின் தம்பியினை அனுப்புகிறேன் என்றார். 1 மணிநேரத்தில் அந்த தலைவரின் தம்பி வந்தார். விபரம் சொன்னேன். பயப்பட வேண்டாம் இனி யார் வந்து கேட்டாலும் என் பெயரை சொல்லி என்னிடம் பேச சொல்லுங்கள் என்றார்.நான் பார்த்து கொள்கிறேன் என்றார். அவரின் ஃபோன் நம்பரையும் கொடுத்து சென்றார்.நான் வீடு கட்டுவதற்கு இந்த தலைவர்களும்,கவுன்சிலர்களும் எதற்கு? நிஜமாகவே எனக்கு புரியவில்லை.

மேஸ்த்ரி சொல்கிறார் ஏதாவது பணம் எதிர்பார்ப்பார்கள்,இல்லையெனில் தகராறு செய்வார்கள் என்று.

எதற்கு நான் வீடு கட்டுவதற்கு இவர்களுக்கு பணம் தரவேண்டும்.இவர்களிடத்தில் தான் மண்,கல் வாங்க வேண்டும் என்று என்ன கட்டாயம்? நியாயமாக உழைத்த காசில்,யாருக்கும் ஒரு கெடுதலும் செய்யாமல் நாம் பாட்டுக்கு நம் வேலையினை பார்த்தால் எதற்கு இப்படி தேவையில்லாத பிரச்சனை என்று மிகவும் மனசு கஷ்டமாக உள்ளது.

1 லாரியுடன் பிசினஸ் ஆரம்பித்த அந்த மகர் இன்று 3 வருடங்களில் 15 லாரிக்கு உரிமையாளராம். இவர்களையெல்லாம் என்ன செய்வது? பயந்து கொண்டு பணம் கொடுப்பதற்கு என்னிடம் பணமில்லை. இருந்தாலும் எதற்கு கொடுக்க வேண்டும்?

நன்கு படிக்கும் என் மகனிடம் நான் சொன்னது. இப்பொழுது இருக்கும் வேலையினை விட்டு விட்டு IAS படிடா என்று.இது வரை அதை படி, இதை படி என்று அவனை சொன்னதேயில்லை.வெயிலில் அடிக்கடி அலைவதால் எனக்கு என்னமோ ஆகி போச்சு போல என்று ஒரு லுக் விடுகிறான். அவன் என்னை கொடுமை செய்யாதம்மா என்று அலறுகிறான்.ஒரு சொந்த வீடு வேண்டும் என்று கேட்டதற்கு நான் படிக்கணுமா? அம்மா தாயே நாம் வாடகை வீட்டிலேயே இருந்து விடலாம்,வெயிட் தூக்குவதே ஈசி என்கிறான். கலெக்டர் ஆனாலும் இவர்களையெல்லாம் களையெடுக்க முடியுமா தெரியவில்லை. எதாவது செய்ய வேண்டும் என்று தோன்றுகிறது.என்ன செய்யறது என்று தெரியாமல் மனம் நிறைய கோபத்துடனும், நிறைய வெறுப்புடனும் என்ன ஆனாலும் ஒரு கை பார்த்து விடலாம் என்ற எண்ணத்துடனும்...வீடு கட்டி முடியும் வரை பிரச்சனை எதுவும் ஆக கூடாது என்று வேண்டுதலுடனும் நான்.

இதுவா பள்ளி

2011-05-18T19:15:00.001+05:30

ஒவ்வொரு விடுமுறைக்கு முதல் நாள் 10, 12 ஆம் வகுப்பு குழந்தைகளுக்கு ஒரு மீட்டிங் போட்டு விடுமுறையில் அவர்கள் நிம்மதியில்லாமல் இருப்பது மாதிரி ஒரு மிக நீண்ட உரை.வீட்டில் வந்து அந்த பள்ளியின் மீட்டிங்கில் பேசப்பட்டதை பெற்றோர்களிடம் சொல்லும் போதே மாணவிகள் அழுகை.பெண் குழந்தைகளிடம் எவனையாவது இழுத்துட்டு ஓட வேண்டியது தானே, இங்க வந்து ஏன் எங்கள் உயிரை வாங்குகிறீர்கள் என்று கேட்பது. மாணவர்களிடமும் அதே போல அநாகரிமான பேச்சு.

9ஆவது சுமாராக படிக்கும் மாணவர்களிடம்,குறைந்தது 20 மாணவர்களிடம், அவர்களின் பெற்றோரிகளிடம் கையெழுத்து வாங்கி கொண்டு அவர்கள் 10 ஆவது படிக்கும் போது ஜனவரியில் ஸ்கூல் பெயரில் பொது தேர்வு எழுத தடை செய்து தனிதேர்வு எழுத வைக்கும் குள்ள நரி தனம். நல்லா படிக்கலை என்பதால் ஸ்கூல் ரிசல்ட் போகுமாம். அதனால் 10 ஆவது படிக்கும் மாணவர்களின் மனநிலை பாதிப்பதனை போல் திட்டுவது. தண்ணீரில் ஊறவைத்து, எண்ணெய் தடவி எடுத்து வரப்படும் ஒரு பெரிய பிரம்பால் கை, காலில் இரத்தம் வரும் வரை அடி. அடிப்பது பெண் ஆசிரியை. எவனை வேண்டுமானலும் கூட்டி வா என்னை ஒன்றும் செய்ய முடியாது என்று அடிப்பட்ட மாணவர்களை மிரட்டுவது.ரேங்க் வாங்காத மாணவர்களினை முழு பள்ளி நேரமும் வகுப்பு அறையில் கீழேயே உட்கார வைத்து இருப்பது. ஒழுங்கற்ற டாய்லெட் வசதியால் காலை 8 முதல் ராத்திரி 9 வரை தங்கி இருக்கும் மாணவிகள் அனுபவிப்பது அதை விட கொடுமை. மாலை 6லிருந்து 9 வரை ஸ்பெஷல் வகுப்புகள்.ஏராளமான மாணவிகள் யூரினெரி ட்ரபிள் வந்து கஷ்டப்படுகிறார்கள்.

பெற்றோர்கள் ஏன் இதற்கு பொறுத்து போகிறார்கள் என்றால் படிக்கும் தங்கள் குழந்தைகள் அனைவரும் இஞ்சினியர், டாக்டர் ஆக வேண்டும் என்ற பேராசையில் இருக்கிறார்கள். வேறு படிப்பெல்லாம் படிப்பாக மதிப்பது இல்லை. இப்படி கஷ்டப்பட்டாவது மார்க் எடுக்க வேண்டும் என்ற எதிர்பார்ப்பு.அந்த பள்ளி நிர்வாகத்தினரோ யாராவது இவர்களை பற்றி புகார் செய்தால் தங்கள் மேலதிகாரிகளுக்கு பணம் தந்து விஷயத்தினை அமுக்குவது. கொத்தடிமைகள் போல் மாணவர்கள், ஆசிரியர்கள் நடத்த படுகிறார்கள்.

தினம் காலை 8 முதல் ராத்திரி 9 வரை 10, 12 வகுப்பு குழந்தைகள் ஸ்கூலில் இருக்க வேண்டும்.
ஆண் ஆசிரியர்களிடம் பெண்குழந்தைகள் பேசினால் என்ன அவனிடம் வழிசல் என்ற கேள்வி.
எதேனும் ஒரு நேரத்தில் தவிர்க்க முடியாமல் மாணவர்களிடம் மாணவிகள் பேசினால் எப்ப, எங்க ஓட போறீங்க சொல்லிட்டு ஓடுங்க என்று சொல்வது.

இவ்வளவு கொடுமைகள் செய்து இந்த முறை கணக்கில் மட்டும் 25 மாணவர்கள் +2-வில் ஃபெயில் ஆகி இருக்கிறார்கள் அதனால்,அந்த பள்ளியில்.இந்த ஆண்டு +2 படிக்கும் மாணவர்களுக்கு வன்முறை இன்னும் அதிகம் ஆகும்.

தான் பணம் சம்பாதிக்க ஒரு சமுதாயத்தினை கெடுத்துக் கொண்டு இருக்கும் இந்த மாதிரி லூசிடமிருந்து எப்படி தப்பிப்பது? இப்படி லூஸ், சைக்கோ என்று திட்டுவதை தவிர வேறு எதுவும் செய்ய முடியாமல் பெற்றோர்கள்.எப்ப இந்த ஸ்கூலை விட்டு நாம் ஒழிவோம் என்று இருக்கும் மாணவர்கள்.இது ஒரு பள்ளியில் மட்டும் நடக்கிற விஷயம் இல்லை. நிறைய பள்ளிகளில் நடக்கிறது.கேள்விப்படும் விஷயங்களை கேட்டு கொதித்து மட்டும் போயிருக்கும் கையாலாகாத நான்.

இஞ்சினியர்,டாக்டர் ஆகவில்லை எனினும் இந்த நல்ல உலகத்தில் நன்கு வாழலாம் என்று எப்ப தான் தெரிய போகுதோ இந்த பாழாய் போன பெற்றோருக்கு.

மழலை மொழி

2011-05-16T19:06:00.003+05:30

இருங்க கரெக்டா வச்சுக்குறேன்

ம்.ஸ்டார்ட் மியூஜிக்

என்னா லுக்?

பாட்டு போடட்டுமா?

நானா ஏறுவேனே!!

சும்மா திட்டாதீங்க..

ம்ம் அப்படி சிரிங்க

எதிர்கால மியூஜிக் டைரடக்கர்.

ஐய நல்லாவேயில்லை

சரி வரட்டா

இசக்கி என்ற ரியோ

2011-05-10T21:04:00.001+05:30

சில வருடங்களாக வாங்கணும் என்று சொல்லி கொண்டே இருந்த லேப்ரடார் வகை நாயினை இந்த லீவில் என் மகன் ரிஷி வாங்கியே விட்டான். உங்களை வளர்த்தது போதாதா என்று அலுத்துக் கொள்வதால்,லீவில் இருக்கும் போது நான் வளர்த்து விடுகிறேன் என்று அவன் கூறியதால் நான் ஒத்துக் கொண்டேன். பெயர் வைக்க 3 நாட்கள் ஆனது. கடைசியில் ரியோ என்று எல்லோரும் ஒத்துக் கொண்டோம்..

ஆனால், என் தம்பி வைத்த பெயர் இசக்கி!!

வீட்டிற்கு வந்த முதல் நாள் ரியோ வீட்டின் ஒவ்வொரு கதவின் பக்கத்தில் கொஞ்ச நேரம் அமர்ந்து என்னவோ நினைத்துக் கொண்டது போல ஓரமாய் போய் விடும்.ஏசி ரூமின் கதவிற்கு வெளியில் போய் நின்ற ரியோ உடனே அங்கேயே படுத்துக் கொண்டது. கதவின் அடியில் வந்த ஜில் காத்து தான் காரணம்.கூடவே என் தம்பியின் மகன்கள் விஷால்,சித்தார்த்தும் படுத்து கொண்டபோது க்ளிக்கியது.

"வானம்" @ சிட்லபாக்கம்

2011-05-04T10:50:00.003+05:30

எங்கள் ஏரியா பக்கத்தில் இருக்கும் சிட்லபாக்கம் என்னும் இடத்தில் வரதராஜா என்று ஒரு தியேட்டர் உண்டு.என்ன படம் போடுகிறார்கள், யார் பார்க்கிறார்கள் என்று அந்த தியேட்டரை கடக்கும் போதெல்லாம் நிமிர்ந்து பார்க்காமல் அவசரமாய் கடந்து விடுவேன். யாரோ ஒரு புண்ணியவான் கொடுத்த ஐடியாவால் + பணத்தால் இன்று அந்த தியேட்டர் ஜொலிக்கிறது. அட்டகாசமான சிட்டி தியேட்டர் மாதிரி மாற்றி விட்டார்கள். டிக்கெட் 100 ரூபாய்.ஞாயிறன்று அந்த தியேட்டரில் நாங்கள் 10 பேர் வானம் பார்த்து வந்தோம்.தியேட்டர் ஃபுல்லாகி இருந்தது. 80-களில் படம் பார்த்த மாதிரி ஒரு ஃபீலிங்.முன் வரிசையில் இருந்த கொஞ்சம் பசங்க சிம்புவை பார்க்கும் போதெல்லாம் செம சவுண்ட் விட்டு கொண்டு இருந்தனர். கொஞ்ச நேரத்தில் சத்தமே இல்லை. கதை என்று ஒன்று இருந்தால் மக்கள் அமைதியாகி விடுகின்றனர்.

பரத்,அனுஷ்கா,சரண்யா,பிரகாஷ்ராஜ்,சிம்பு-சந்தானம் என்று ஐந்து பேர்களை பற்றிய கதை.ஐவரையும் கடைசி காட்சியில் ஒன்றாக மீட் செய்ய வைத்து கதை முடிக்க பட்டுள்ளது. விமர்சனம் எதுவும் படிக்காமல் போனதால் கோ படம் மாதிரி இந்த படமும் எங்களுக்கு பிடித்து இருந்தது.

குட் சிம்பு. இந்த மாதிரி கதையில் நடித்தமைக்கு. சந்தானம் வரும் சீன்களில் மனம் விட்டு சிரிக்க முடிகிறது. பரத் ஸ்டைலிஷாக வருகிறார்.பசங்க படத்தில் வரும் பெண்ணும் அப்படியே.மற்ற அனைவரும் நன்றாக நடித்து உள்ளனர். எவண்டி உன்னை பெத்தான் பாட்டை அனுஷ்காவை பார்த்து சிம்பு பாடுவதாய் அமைத்து வேறு விதமாய் எடுத்து இருக்கலாம்.சிம்பு லவ் செய்யும் அந்த பெண்ணிற்கு இந்த பாட்டு வேஸ்ட்.

தெய்வம் வாழ்வது எங்கே, தவறுகளை உணரும் மனிதம் நெஞ்சில்---- யுவன் பாடல் அற்புதம்.அப்பாடல் படத்தில் வரும் சீன்களில் அப்படியே பொருந்துகிறது. படம் எப்படி இருக்குமோ என்று பயந்து கொண்டே படத்திற்கு போனோம்.எங்களுக்கு இனிமையான ஷாக்.எல்லோரும் பார்க்கலாம்.வீட்டிற்கு பக்கத்தில் ஒரு அருமையான தியேட்டர் கிடைத்ததும் சந்தோஷமாய் இருக்கிறது.

பாருங் ”கோ” நான் பார்த்துட்டேன்

2011-04-25T21:43:00.001+05:30

குட் ஃப்ரைடே அன்று காலையில் நகுல் மாயாஜாலில் மாலை காட்சிக்கு டிக்கெட் இருக்கு புக் செய்யட்டுமா யார் வரீங்க என்று கேட்டதும் நான் வரேன்,நான் வரேன் என்று 5 பேர் சேர்ந்து போனோம்.படம் வந்த முதல் நாளே எந்த விமர்சனமும் படிக்காமல் பார்த்ததால் படம் பார்க்க நல்லாயிருந்தது.

டைட்டிலில் வரும் ஃபோட்டாக்கள் அருமை.ராதா,அம்பிகாவிற்கு இடையில் இன்னொரு சகோதரி மல்லிகா என்று உண்டு அந்த பெண் தன் முகத்தினை எந்த பத்திரிக்கையிலும் காண்பித்தது இல்லை. கார்த்திகா அந்த பெரியம்மா போல் இருக்கிறார் போலும்.ராதா மாதிரி இல்லை.

டைரக்டருக்கு அழகான ஆண்கள் மேல் ஏதோ கோபம் போல் இருக்கிறது. கனாகண்டேன் பிரிதிவிராஜ் போல் இதில் அஜ்மல்.அஜ்மல் அசத்தி இருக்கிறார். என்னமோ ஏதோ பாட்டை இன்னும் நல்லா எடுத்து இருக்கலாம்.இந்த பாட்டில் வரும் குவியமில்லா,காட்சிப்பேழை என்றால் என்ன என்று என் அருமை புத்திரர்களுக்கு விளக்கினேன்.

ஸ்டேஜில் வெடி வெடிக்கும் போதே என் கணவர் யார் வில்லன் என்று சொல்லி விட்டார்.நான் நம்பவில்லை.ரிஷியோ அந்த ஸ்டேஜ் தன் காலேஜில்(SRM)போடப்பட்டதாய் சொல்லி பெருமைப் பட்டான்.

ப்யா சுறுசுறுன்னு இருக்காங்க.கார்த்திகா முழி முழின்னு முழிக்காங்க.

ஈ பார்த்துட்டு ஜீவா பிடித்து போச்சு.இதிலும் ஏமாற்றவில்லை.ப்யா ஜீவா நட்பு இந்த காலத்திய நட்பு.பிரகாஷ் ராஜ் கொஞ்ச நேரமே வந்தாலும் நச்.காரில் கார்த்திகா இண்டர்வியூ செய்யும் காட்சியில் நடக்கிறேன்,நடக்கிறேன், நான் நடந்தா என்னா ஆகும் என்று பார்க்கிறீயா என்று அழுத்தி சொல்வது அவருடைய ஸ்டைல்.

கடைசி சண்டை காட்சியினை கொஞ்சம் குறைத்து இருக்கலாம்.சண்டை முடிந்ததும் தீபாவளி கொண்டாடி முடிச்ச மாதிரி இருந்தது அவ்வளவு டமால்,டுமீல்.காலேஜ் பாட்டு,முதல் கெட்-டு-கெதர் பாட்டு,வெண்பனி பாட்டை தவிர்த்து இருந்தால் படத்தின் நீளமும் கம்மியாகி இருக்கும்.அமளி துமளி பாட்டினை எடுத்தவிதம் மிக அருமை.மலை விளிம்பிலேயே ஜீவா,கார்த்திகாவினை நிறுத்தி எடுத்து இருக்கிறார்கள்.ஆடும் போது கீழே விழுந்து விடுவார்களோ என்று பக் பக்கென்று இருந்தது.லொகேஷன் நார்வேயாம். வெண்பனி பாட்டு சைனாவாம்.

படம் ஆரம்பம் முதல் கடைசி வரை போர் இல்லை.ஸோ, எல்லோரும் பாருங்”கோ”.

ஒரு விஜயகாந்த் கணக்கு

2011-04-10T20:55:00.001+05:30

தமிழ்நாட்டில் இருக்கிற மொத்தம் 234 தொகுதியில போட்டியிடுற வேட்பாளர்களின் எண்ணிக்கை மொத்தம் 724 பேர்களாம்.

அதுல கிரிமினல் கேஸ் பதிவானர்கள் 140 பேர்..அம்மா,அய்யா,கேப்டன் இவர்களையும் சேர்த்து.

அதுல கொலை செய்ய முயற்சித்தவர்கள் என்று கேஸ் இருப்பவர்கள் 25 பேர்..

அதுல 5ஆப்பு வரை படித்தவர்கள் 50 பேர்கள்

அதுல 8 ஆப்பு வரை படித்தவர்கள் 150 பேர்கள்

அதுல 10ஆப்பு வரை படித்தவர்கள் 200 பேர்கள்

டிகிரி வரை படித்தவர்கள் 250 பேர்கள்

முதுகலை படித்தவர்கள் 50 பேர்கள்

வக்கீல்,டாக்டர் மீதம் உள்ளவர்கள்.

பெண் வேட்பாளர்களில் கிரிமினல் கேஸ் இருப்பவர்கள் 4 பேர்

இவர்களில் யாரை தேர்ந்தெடுப்பது?

இப்ப மதுரை மேற்கு எடுத்துகிட்டீங்கன்னா போட்டியிடும் மூவருமே கிரிமினல் கேஸ் பதிவானவர்கள். அதில் இருவர் 10-ஆவதும் ஒருவர் டிகிரியும் படித்து உள்ளனர். அதில் கொலை முயற்சி வழக்கு யார் பேரில் இல்லையோ அவரை தேர்ந்தெடுக்கலாம்.ஆனால்,டிகிரி முடித்தவர் பேரில் கொலைமுயற்சி வழக்கு உள்ளது.எனவே 10 ஆப்பு படித்தவர் தான் ஜெயிப்பாரோ.

அதுவே மதுரவாயல் தொகுதியினை எடுத்துக் கொண்டால் போட்டியிடும் மூவரில் இருவர் செக்‌ஷன் 302(மர்டர் கேஸ்), ஒருவர் செக்‌ஷன் 307 கொலை முயற்சி வழக்கும் பதிவாகி உள்ளது. மர்டரை விட அட்டம்ட் மர்டர் பரவாயில்லை என்பதால் செக்‌ஷன் 307 பதிவாகி உள்ளவருக்கு ஓட்டு போடலாமோ.

அதுவே நாகப்பட்டிணம் தொகுதியினை எடுத்துக் கொண்டால் ஒருவர் அட்மட் மர்டர்,மர்டர் அது இது என்று 10 கிரிமினல் கேஸ்களில் சிக்கி உள்ளார். நல்லவேளை அவர் 10 ஆவது தான் படித்து உள்ளார். எனவே 10 கேஸ்கள் மட்டுமே.இன்னும் படித்து இருந்தால்??

ஆகா, தாம்பரம் தொகுதியில் போட்டியிடும் பெரிய கட்சியினை சேர்ந்த மூவருமே கிரிமினல் வழக்குகளில் சிக்கவில்லை. இப்படி மூவருமே நல்லவங்கன்னாலும் குழப்பம் தான்.அதனால்,ரோடு போட்டது யாரு?அந்த ரோடை பாழாக்கியது யாருன்னு தேடணும்.

வேலூர் பரமாத்தி தொகுதியில் போட்டியிடும் ஒருவரின் மேல் 36 கிரிமினல் கேஸ்கள்.மனிதர் எம்.ஏ.பொலிட்டிகல் சயின்ஸ். அடகொக்கமக்கா!!!

அம்மா மேல் 10 கேஸ்கள்.படித்தது 10ஆப்பு.

அய்யா மேல் 1 கேஸ்-எதிர்த்து போட்டியிடுபவர்கள் மேல் ஒரு கேஸும் இல்லை.அய்யாவும் 10 ஆப்பு பாஸ்

கேப்டன் மேல் 1 கேஸ்.இவரும் 10 ஆப்பு பாஸ்

ஸ்டாலின் மேல் நோ கேஸ்-டிகிரி ஹோல்டர்.

இப்படியே பார்த்தோமானால் யாருக்கு ஓட்டு போடறதுன்னே தெரியலை. முதல் முறையாக ஓட்டு போடப்போகும் என் மகன் என்னை கேட்கிறான் யாருக்கும்மா ஓட்டு போடறதுன்னு? ஏண்டா இப்படி ஒரு கேள்வி என்னை பார்த்து கேட்ட?இதற்கு பதில் சொல்றது எவ்வளவு கஷ்டம்டா.எக்ஸாம்னா சாய்ஸில் இந்த கேள்வியினை விட்டுடலாம்.

இந்த கணக்கெல்லாம் தோராயமாக எடுக்க உதவிய தளம் இதோ http://myneta.info/tamilnadu2011

அசத்தும் அஞ்சறைப் பெட்டி-9

2011-04-04T21:25:00.001+05:30

அஞ்சறைப் பெட்டி பொதுவா நம் வீட்டு சமையலறையில் ஒன்றே ஒன்று இருக்கும்.

படம் பதிவர் சங்கவியிடம் சுட்டது!!

மஸ்கட்டில் இருக்கும் சுஜாதா சங்கர் (யாரோ) என்பவர் வீட்டில் இருப்பதோ ஒன்பது அஞ்சறைப்பெட்டிகளாம்.

1. ரூம் ஷெல்ஃபில்: மாத்திரைகள் போட்டு வைக்க.

2. ட்ரஸ்ஸிங் டேபிளில்: சேஃப்டி பின்,பொட்டு,சின்ன சின்ன தோடு, ரப்பர் பேண்ட்,ஹேர் பின் வைக்க.

3. ஷெல்ஃபில்: கலர் கோலப்பொடி வைக்க.

4. டைனிங் டேபிளில்: பாதாம்,முந்திரி, திராட்சை,அக்ரூட் வைக்க

5. சாமி ரூமில்: விபூதி, குங்குமம்,சந்தணம்,மஞ்சள் பொடி,சாம்பிராணி, சூடம் வைக்க.

6. ஃப்ரிட்ஜில்: சுத்தப்படுத்தி பொடியாய் நறுக்கிய கறிவேப்பிலை,மல்லி,புதினா இஞ்சி,பூடு,ப.மிளகாய்.

7. ஸ்டடி டேபிளில்: ஷார்ப்னர்,ரப்பர்,குண்டூசி,சிறிய கம் பாட்டில்,க்ரேயான் பென்சில்.

8. ஹால் ஷெல்ஃபில்: சில்லறை காசுகளுக்கு.

9. சமையலறையில்: இது வழக்கமாய் வைக்கும் பொருட்கள்.

என் வீட்டில் மூன்று உள்ளது. கலர் கோலப்பொடிக்கு பிளாஸ்டிக்கில் ஒன்று,சமையலறை,சாமி ரூமில் எவர்சில்வரில் இரண்டு.

மங்கையர் மலரில் படித்தது. நல்லாயிருக்குல்ல இந்த ஐடியா. ஃபாரினில் இருக்கும் சகோதரிகள் தேவைன்னா சொல்லுங்கோ அஞ்சறைப்பெட்டி எக்ஸ்போர்ட் செய்திடலாம்.(பிசினஸ் மைண்ட்!)

இந்த “க” படும் பாடு

2011-03-29T08:56:00.002+05:30

நம் தமிழில் சில சொற்களை பேசும் போது நம்மை அறியாமல் உபயோகப்படுத்தும் எழுத்துகளில் இந்த “க”விற்கு முக்கிய பங்கு உண்டு.

சம்பளம்,கிம்பளம்- சம்பளம் சரி, கிம்பளம்-லஞ்சம் என்றாகிறது. ஆனால் எதற்கு கி? சிம்பளம் ஆகி இருக்கலாமில்ல?

இங்க டப்பா,கிப்பா ஒன்றையும் காணோம் என்போம் எதாவது தேடும் போது.

பாத்து போ பஸ்ஸில,கிஸ்ஸில அடிப்பட்டுட போற? என்போம்.பஸ்ஸில சரி, கிஸ்ஸில அடி எப்படி படும்?

குழந்தை நோட்டு,கீட்டை கிழிச்சிட போகுது.நோட்டு சரி.அது என்ன கீட்டு.

பாத்துப்போ பள்ளம்,கிள்ளம்,மேடு,கீடு இருக்கப்போகுது.வாட் கிள்ளம்,கீடு.

பாத்து டேபிளை நகர்த்து.டீவியை,கீவியை உடைச்சுட போற. பாருங்க மக்களே டிவி என்ற ஆங்கில வார்த்தைக்கே கீ போடுறோம் நாம. இன்னைக்கு ஃபோன்,கீன் வந்துச்சா இல்லையா?

எக்ஸாமுக்கு போறியா பேனா,கீனா,ரப்பர்,கிப்பர் இருக்கா செக் செய்தியா?

இப்படியே யோசித்து இதை மாதிரியே பின்னூட்டம்,கின்னூட்டம் போட்டுட்டு போங்க..

வெரைட்டி-பங்குனி-2011

2011-03-28T14:20:00.016+05:30

நேற்று எலக்ட்ரிக் ட்ரையினில் மாம்பலம் போகும் போது ரொம்ப நாள் கழித்து சந்தித்த நண்பர் பேசிக் கொண்டு இருக்கும் போது என்னிடம் நீங்க என்ன கார் வைத்திருக்கீங்க என்று கேட்க நான் சொன்ன பதில் கடைசியில்.

எப்பவும் ஏப்ரல், மே மாதங்களில் சென்னையில் நாங்கள் இருக்கும் நாட்கள் குறைவு.குடும்பத்துடன் எங்காச்சும் 10 நாட்கள் எஸ்ஸாயிடுவோம்.ஆனால், இந்த முறை இங்கு தான் வேறு வழியே இல்லை. வீடு கட்ட ஆரம்பித்து இருக்கிறோம். சோ டப்பு நஹி ஃபார் ஊர் சுத்தல்.

போனவாரம் வடபழனி கமலா தியேட்டர் வழியாக நடந்து சென்ற போது தியேட்டர் வாசலில் வாங்க வாங்க லத்திகா ஃப்ரீ ஷோ படம் பார்க்க வாங்க என்று ஒரே அழைப்பு. கொஞ்சம் அசந்தால் தூக்கிட்டு போய் தியேட்டர் உள்ளே விட்டுவிடுவார்களோ என்று அரண்டு பறந்து அந்த இடத்தினை வேகமாய் க்ராஸ் செய்தேன்.இந்த வாரம் அந்த பக்கம் போகணும். இம்முறை பணமும் கொடுத்து படமும் ஃப்ரீயாய் இருக்குமோ என்னவோ. ரூட்டை மாற்றி போகணும்.என்ன கொடுமை ஸ்ரீநிவாசா?

வடிவேலுவிற்கு அழகிரி பெரிய ரசிகர் போலும்.திருவாரூர் முதல் பிரச்சாரத்தில் வடிவேலு பேச பேச அழகிரி சிரித்துக் கொண்டே இருந்தார். இப்பொழுது எல்லாம் ஒவ்வொரு கட்சிக்கும் வில்லன்,கதாநாயகன் மட்டுமின்றி நிஜ காமெடியனும் அவசியம் போலும்.

மே மாதம் 27-என் பசங்களின் பெரியப்ப மகன் டாக்டர்.சுசுருதன் திருமணம்.பெண்ணும் எம்.டி கைனாகலிஜிஸ்ட்.சென்னையில் திருமணம்.என் இரு பசங்களும் அண்ணா(மாப்பிள்ளை) எப்ப எப்ப ட்ரஸ் மாத்துவாரோ அப்போதெல்லாம் மாற்ற போகிறார்களாம்.முதல் நாள் வெயிஸ்ட் கோட், திருமணம் அன்று பட்டு வேஷ்டி,சட்டை என்று செலவு வைக்கிறார்கள். கேட்டால், நாங்கள் பெண்ணாய் பிறந்து இருந்தால் எத்தனை பவுன் செய்திருக்கணும் என்று பதில் கேள்வி கேட்கிறார்கள்.

5 வயதில் என் சின்ன பையன் ரிஷி பெரியவனாகி என்ன செய்ய போகிறாய் என்று கேட்டால் 6 ஆப்பு படிச்சுட்டு மினிஸ்டர் ஆவேன் என்பான். மினிஸ்டர் சரி அதற்கு 6 ஆப்பு போதும் என்று யார் சொல்லி கொடுத்தார்கள் என்பது இன்று வரை மர்மமாய் இருக்கு! வீட்டில் வாங்கும் ஜூனியர்விகடன், துக்ளக் புக் எடுத்து வைத்து நூ(மூ)ப்பனார், சசிக்கலா, ஜெயலலிதா, ஸ்டாலின் என்று கரெக்டா படம் பார்த்து பெயர் சொல்லுவான்.பயந்து போய் அந்த புத்தகங்கள் வாங்குவதை நிறுத்தி விட்டேன்.பேசாமல் அந்த புத்தகங்கள் வாங்கி இருந்தால் ஜி.கே வளர்ந்து அவனும் அரசியல்வாதியாகி இருப்பானோ.சே,தப்பு செய்துட்டேனே.

வீட்டுக்கார்! எப்பூடி? நண்பர் பதிலே சொல்லாமல் வேற சீட்டிற்கு மாறி போய் உட்கார்ந்து கொண்டார்.

ஸ்க்ரூ ட்ரைவர் குடிச்சு இருக்கலாமோ??

2011-03-24T19:25:00.001+05:30

2009, மே 16, நள்ளிரவு 12 மணிக்கு மலேஷியா போக ஃப்ளைட் எனக்கு. தாம்பரத்திலிருந்து பக்கத்தில் தானே திரிசூலம் ஏர்போர்ட் என்று பெரியவன் நகுலுடன் டூவீலரில் இரவு 9 மணிக்கு ஏர்போர்டிற்கு கிளம்பினேன். திரிசூலம் பாலத்திற்கு பக்கத்தில் போகும் போது திடீரென்று எதிர்பாராத பெரிய மழை. செம மழை. பாலத்தின் அடியில் கொஞ்ச நேரம் நின்று பார்த்தோம். மழை விடுவதாயில்லை. சரி என்று ஒரு ஆட்டோவில் ஏறி ஏர்போர்ட் கேட்டில் இருந்து இண்டர்நேஷனல் ஃப்ளைட் புறப்படும் இடம் போக ரூபாய் 40 தண்டம் அழுது விட்டு வெற்றிகரமாய் உள்ளே நுழைந்து விட்டேன்.

செக்கிங் எல்லாம் முடித்து ஒரு அரை மணிநேரம் கழித்து நகுலுக்கு ஃபோன் செய்தால் அம்மா இங்கேயே தான் நிற்கிறேன் என்றான். மழைக் கொட்டுது. வீட்டிற்கு ஃபோன் செய்தால் அங்கு மழையே இல்லை என்கிறான் சின்னவன் ரிஷி.11 மணிக்கு திரும்ப நகுலுக்கு ஃபோன் செய்தால் இப்ப தான் மழை கொஞ்சம் விட்டது வீட்டிற்கு கிளம்பிட்டேன் என்றான். சரி என்று நிம்மதியாக இருந்தது. கொஞ்ச நேரத்தில் என் விமானத்திற்க்கான அழைப்பு வந்ததால் அதில் ஏறி உட்கார்ந்து விட்டேன். முதல் வெளிநாட்டு பயணம் என்று சந்தோஷம் இருந்தாலும் மகன்கள் இருவரையும் விட்டு செல்கிறோமே என்று ஃபீலிங்கும் இருந்தது. அன்று முழு நாளும் வெளியில் சுற்றியதால் விமானத்தில் ஏறி அமர்ந்ததும் தூங்கி விட்டேன். ஒரு மணிநேரம் கழித்து ஏதோ சத்தம் என்று முழித்து பார்த்தால் விமானம் அங்கேயே நிக்குது. கல்கத்தா விமானம் மழையால் லேட்டாய் வந்ததால் அந்த பயணிகளுக்காக நாங்கள் அங்கேயே ஒரு மணிநேரம் காத்து இருந்து இருக்கிறோம். எல்லாம் முடிந்து ஒன்றரை மணி நேரம் லேட்டாய் தட தடவென்று எங்கள் விமானம் ஏதோ கார்ப்பரேஷன் வண்டி போல் ரன்வேயில் ஓட ஆரம்பத்தது.

நான் திரும்பி தூங்க முயன்றேன். 20 நிமிஷத்தில் சாப்பாடு வேண்டுமா என்று எழுப்பி விட்டார்கள். அட நிம்மதியா தூங்க விடமாட்டார்கள் போல, சரி சத்தாய் மலேஷியா போய் இறங்கலாம் என்று சாப்பிட கொடுத்தில் ஃப்ரூட் சாலட்ட்டும், ஒரு கேக்கும் நடு ராத்திரியில் சாப்பிட்டேன். பக்கத்தில் இருந்த ஒரு வட இந்திய பெண்மணி ஸ்க்ரூ ட்ரைவர் என்ற ஒரு வஸ்துவை வாங்கி வாங்கி குடித்துக் கொண்டு இருந்தார். தூக்க கலக்கத்தில் ஜூஸ் பெயர் நல்லாயிருக்கே, அது கொடுக்கப்பட்ட க்ளாஸும் நல்லாயிருக்கே நாமும் ஒரு க்ளாஸ் வாங்கி அடிக்கலாமா என்றால் கொஞ்சம் ஆல்கஹால் ஸ்மெல் வரவும் நன்கு முழித்துக் கொண்டு வேண்டாம் என்று சொல்லி விட்டேன்( தமிழ் பெண் கலாச்சாரம் என்னாவது?)

ஆச்சு தூங்கியும் தூங்காமலும் காலை 6.30க்கு மலேஷியா போய் விட்டேன்.என் கணவர் அவர் இருக்கும் இடத்தில் இருந்து கோலாலம்பூர் வர வேண்டும் என்றால் தான் ரொம்ப தூரம் அலைய வேண்டும் என்பதால் வெளியே வந்து ஒரு டாக்சி வைத்து வீட்டிற்கு தனியே வந்து விடு வந்துடுவேல்லே, இல்லை நான் ஏர்போர்ட் வரணுமா என்று இரண்டு முறை அழுத்தி கேட்டார். நான் இல்லப்பா நானே வந்துடுவேன் என்று சொல்லிட்டேன். அவர் அனுப்பிய அவர் தங்கியிருந்த வீட்டிற்கு செல்லும் வழியின் வரைபடத்தை பிரிண்ட் எடுத்து கையில் வைத்து இருந்தேன்.

மலேஷியா ஏர்போர்ட்டை பார்த்ததும் நான் பட்டிக்காட்டாண் பட்டிணம் லுக் விட்ட மாதிரி லுக் விட்டுட்டே, ஜாக்கிரதையா அந்த ஸ்க்ரூ ட்ரைவர் பெண்+என் விமானத்தில் இருந்து வெளிவந்த கூட்டத்தை தொடந்து தேமேன்னு இந்த ட்ரையினில் ஏறி போனேன். வெளியே லாபியில் இமிகிரேஷனுக்கு ஒரு பெரிய கியூ இருக்கவே நானும் அதில் நின்று கொண்டேன். அங்கு 5 கவுண்டர்கள் இருந்தது. அதில் ஒரு பெண் நெற்றியில் விபூதியுடன் இருந்தார்.ஆகா தமிழ் பெண் அல்லவா, அவரிடம் தான் நான் செக் செய்ய வேண்டும் என்று ஏழுக்கொண்டலவாடாவை வேண்டி கொண்டு வேண்டும் என்றே அவரிடம் போவதற்காக கியூவில் கொஞ்சம் அட்ஜெஸ்ட் செய்து விபூதி பெண் கவுண்டர் காலியானதும் அவரிடம் சென்றேன். தேவையில்லாமல் தேவுடாவை டிஸ்டர்ப் செய்த பாவத்தை பின்னர் அனுபவித்தேன். மற்ற கவுண்டர்களில் ஆண்கள் செக் செய்து கொண்டு இருந்தனர்.

அந்த பெண் என் முகத்தையே கொஞ்ச நேரம் பார்த்துக் கொண்டு இருந்து விட்டு எதற்காக மலேஷியா வந்திருக்கீங்க என்றார். டூரிஸ்ட்டாக வந்து இருக்கிறேன் என்றேன்.எவ்வளவு பணம் ஹாண்ட்பேக்கில் இருக்கிறது என்றார். என்னிடம் சென்னை ஏர்போர்டில் ரூபாய் 5000க்கு மாற்றிய 335 ரிங்கட் இருந்தது. அதை எடுத்து காண்பிக்க சொன்னார். இதில் எப்படி டூர் போக முடியும் என்றார். நான் என் கணவர் இங்கு இருப்பதாய் சொன்னேன்.அவர் இருக்கும் வீட்டில் தங்க போகிறேன் என்றேன். அவர் நேராய் ஒரு இமிகிரேஷன் ஆஃபிசர் ரூமை காண்பித்து அங்கு போய் நீங்க செக் செய்துட்டு போகணும் என்று உன் வழி தனி வழி என்று சொல்லி விட்டார். அங்கே போனால், பல நாட்டுக்காரர்களும் அங்கு சந்தேகத்தின் பேரில் பிடித்து உட்கார வைக்கப்பட்டு இருந்தனர்.அந்த கூட்டத்தில் நான் மட்டும் தான் பெண். ஒரு முரட்டு மலேஷிய பெண்மணி மிக அலட்டலாக அங்கு இருந்தார்.என்னை வெயிட் செய்ய சொன்னார். அங்கிருந்த சேரில் சுற்றிலும் ஒரு சுற்றி பார்த்துட்டு பாவமாய் உட்கார்ந்து கொண்டேன்.அவர் என் முறை வந்ததும் என்னை அழைத்தார். ஒரு ஃபோன் நம்பரை கொடுத்து இந்த நம்பருக்கு உன் கணவரை ஃபோன் செய்ய சொல் அப்ப தான் உன்னை வெளியில் விடுவோம் என்று சொல்லி விட்டார். அங்கேயே காயின் போட்டு செய்யும் ஃபோன் இருந்தது. ஆனால், என்னிடம் மலேஷியா காய்ன் இல்லை. அந்த பெண் லாபியில் இருக்கும் கடைகளில் சில்லறை வாங்கி வா என்று சொல்லி விட்டு என் பாஸ்போர்ட்டை தன் பக்கத்தில் ஒரு ட்ராயரில் போட்டு பூட்டிவிட்டார்.

சரி என்று என்னிடம் இருந்த மலேஷிய பணத்திற்கு சில்லறை கேட்டு சென்றேன், சென்றேன்,ஏர்போர்டின் இறுதிக்கே சென்றேன்.அங்கு அதிக புஷ்டியுடன் இருந்த இரு கருப்பு நாய்களை பிடித்துக் கொண்டு அதே போல் புஷ்டியாய் இருவர் நின்று போற வரவங்களை கண்ணால் எக்ஸ்ரே எடுத்துக் கொண்டு இருந்தனர். திரும்ப ஏழுக்கொண்டலவாடுவை நினைத்துக் கொண்டு இந்தியா வந்ததும் ஏழுமலை நடந்தே ஏறி வருகிறேன். பிரச்சனை இல்லாமல் என்னை ஊருக்குள் விட்டுவிடு என்று வேண்டிக் கொண்டேன். சில்லறை எங்கும் கிடைக்கலை.

ஆனது ஆவட்டும் என்று யாரும் சில்லறை கொடுக்க மாட்டேங்கிறாங்க என்று அந்த பெண்ணிடமே நேரே சென்று சில்லறை கேட்டேன். என்னை ஒரு மாதிரி லுக் விட்டுட்டு அந்த பெண் அணிந்து இருந்த கோட்டில் கை விட்டு கொஞ்சம் சில்லறை எடுத்துக் கொடுத்தார். அந்த காசை வைத்து என் கணவருக்கு ஃபோன் செய்தால் முதல் இரண்டு முறை கட் ஆகி விட்டது. என்னிடமோ 4 காசுகள் தான் இருந்தது. அது எவ்வளவு என்றும் பதட்டத்தில் தெரியவில்லை. நல்லவேளை என் கணவர் திரும்ப அந்த நம்பருக்கு ஃபோன் செய்யவும் விஷயத்தினை சொல்லி அந்த பெண்ணின் நம்பர் கொடுத்தேன். அவர் ஃபோனில் சிரிக்கிறார். மகனே இரு உன்னை வந்து கவனித்து கொள்கிறேன் என்று மனதிற்குள் நினைத்துக் கொண்டு பாவமாய் முகத்தினை வைத்துக் கொண்டு,கையில் இருந்த மீதி காசை என் பக்கத்தில் இருந்த என்னை மாதிரி ஒரு பாவப்பட்ட நண்பருக்கு கொடுத்து, அவருக்கு எப்படி அந்த ஃபோன் யூஸ் செய்யணும் (கவனிக்கவும், இங்கே கூட உதவி!) என்று சொல்லி தந்து விட்டு, அவரின் நன்றிக்கு தலையசைத்துக் கொண்டு அந்த பெண்ணை பார்க்காதது மாதிரி பார்த்துக் கொண்டு இருந்தேன். அசால்ட்டாய் இருப்பது மாதிரி. அந்த பெண் தன் பக்கத்தில் இருந்த ஒரு ஃபோன் அட்டெண்ட் செய்ததும் என்னை கூப்பிட்டு என் பாஸ்போர்டை என்னிடம் கொடுத்து இப்ப நீங்கள் வெளியில் போகலாம் என்றார். தேவுடா விட்டது சனியென்று லக்கேஜ் இருக்கும் இடத்தில் அனாதையாக கிடந்த என் சூட்கேஸை எடுத்துக் கொண்டு, அந்த விபூதி பெண் யாருடனோ சிரித்து சிரித்து பேசிக் கொண்டிருந்ததை, என்ன சிரிப்பு வேண்டி இருக்குது என எரிச்சலுடன் பார்த்துக் கொண்டே,டாக்ஸி ஸ்டாண்டிற்கு வந்து டாக்ஸியின் சைனாக்கார ட்ரைவரிடம் சைகையில் சூப்பராய் பேசி, என் கையில் இருந்த வரைப்படத்தினை காண்பித்து ஏறி உட்கார்ந்தேன். 100, 120 அடுத்து 150 என்ற ஸ்பீடில் அவர் போனார். நான் அதன் பிறகு எவ்வளவு ஸ்பீடு என்று பார்க்கவில்லை. ஏனெனில், இனி அதை பார்த்தால் திரும்ப சாமி கும்பிடணும்.எப்படியோ என்னை கொண்டு போய் என் கணவர் இருக்குமிடம் சேர்த்தால் போதும் என்று வெளியில் வேடிக்கை பார்க்க ஆரம்பித்தேன்.

இப்படியெல்லாம் பணம் செக் செய்வார்கள் என்று தெரியாது. இல்லையெனில் இன்னும் ரிங்கட் கையில் எடுத்து வர சொல்லி இருக்க மாட்டேனா என்று சொன்னார். என் பசங்களிடம் ஃபோனில் மலேஷியா போறேன்னு, மலேஷியா ஏர்ப்போர்ட் மட்டும் பார்த்து வந்து இருப்பேண்டா, நல்ல வேளை அந்த பெண் என்னை உள்ளே விட்டாள் என்று சொன்னால் சத்தமா சிரிக்குது இரண்டும்.இரண்டும் அவர்களின் அப்பாக்கு அம்மாவை ஏர்போர்டில் போய் கூப்பிடும் படியாக சொல்லி இருக்குதுங்க எனக்கு தெரியாமல்.(பாசக்கார பையபிள்ளைக).

ஊரில் இருந்து கிளம்பும் முன்னால், ஆத்தா நான் பாசாயிட்டேன் ரேஞ்சில்! ஒரு 20 பேரிடமாவது மலேஷியா, சிங்கப்பூர் போறேன் என்று ஃபோனில் சொல்லிட்டு கிளம்பினோமே. இப்ப இப்படி ஒரு மணிநேரம் ஏர்போர்டிலேயே சுற்றுகிறோமே என்று தான் ஒரே கவலையாய் இருந்தது. (கண்ணு போட்டுட்டாங்க).அடுத்து எங்காச்சும் ஃபாரின் போகும் முன்னால் திருப்பதி மலை நடந்து போய்டுங்கம்மா இல்லைன்னா சாமி அங்கும் ஏர்போர்டில் பழி வாங்கும் என்று சொல்லிட்டே இருக்குதுங்க பசங்க.
முன்னால் வேண்டுதலே இல்லாமல் நிறைய முறை நடந்து ஏறி இருக்கிறேன். மலேஷியா போய் வந்த பின் ஏனோ போக முடியவில்லை. ஆனால், கட்டாயம் போயிடணுப்பா.

டிஸ்கி: பக்தியாய் விபூதி, ஏழுக்கொண்டலவாடான்னு நான் போனால் இப்படி ஒரு சோதனை. அந்த ஸ்க்ரூ ட்ரைவர் பெண்ணும் தனியாய் தான் வந்திருந்தார். அவரை யாரும் சந்தேகப்படலையே? பேசாமா நானும் ஒரு பெக் ஸ்க்ரூ ட்ரைவர் போட்டு இருக்கணும் போல.

18 வருடமாய் ஏர்போர்ட்டில்

2011-03-23T15:00:00.001+05:30

அரை மணிநேரம் ரயில்வே ஸ்டேஷனில் வெயிட் செய்யணும் என்றாலே லொள், லொள்ளுன்னு கூட இருப்பவர்கள் யாரிடமாவது எறிந்து விழுவோம். மேலே இருக்கும் இந்த மனிதர் பாரீஸில் இருக்கும் Charles de Gaulle ஏர்போர்ட்டில் 1988-லிருந்து 2006 வரை வாழ்ந்து இருக்கிறார். Mehran Karimi Nasseri என்ற இந்த மனிதர் லண்டனில் வாழ்வதற்காக ஃப்ரான்ஸ் வழியாக ஈரானிலிருந்து செல்லும் போது அவருடைய சூட்கேஸை தவறவிட்டார்.அதில் அவருடைய பாஸ்போர்ட்டும், ஐக்கிய நாட்டு சபை அளித்து இருந்த அகதிக்கான ஐடியும் இருந்தது.

பெல்ஜியத்தில் வாழ்வதற்காக அவருக்கு அகதி அட்டை வழங்கப்பட்டிருந்தது. அவருக்கு லண்டனில் வாழதான் விருப்பம். ஃப்ரான்ஸ் ரயில்வே ஸ்டேஷனில் பெட்டியினை தவற விட்ட இவர் இங்கிலாந்திற்கு எப்படியோ சென்றும் இருக்கிறார். ஆனால், பாஸ்போர்ட் இல்லாததால் ஃப்ரான்ஸிற்கு திரும்ப அனுப்பி உள்ளனர். முதலில் ஃப்ரென்ச் போலீஸ் இவரை கைது செய்தது. அதன்பிறகு இவர் ஏர்போர்ட்டிற்கு நுழைந்தது குற்றமில்லை என்று விடுவித்தது. ஈரானுக்கு திரும்பி செல்ல முடியாததால் ஏர்போர்ட்டிலேயே தங்கி விட்டார். கிட்டதட்ட 18 வருடங்கள். கோர்ட்டும் இவர் ஃப்ரான்ஸ் உள்ளே நுழைய தடை விதித்தது.

ஜூலை 2006-ல் அவர் உடல்நிலை சரியில்லாமல் போகவே ஒரு வருடம் ஃப்ரான்சில் ஹாஸ்பிட்டலில் இருந்து இருக்கிறார். அதன் பிறகு எம்மாஸ் என்ற ஃப்ரான்ஸின் சமூக அமைப்பில் இருந்து இருக்கிறார்.

ஏர்போர்ட்டில் இருந்த போது அவரது லக்கேஜ்களை பக்கத்தில் வைத்துக் கொண்டு எழுதுவது, படிப்பது என்று பொழுது போக்கி உள்ளார். சாப்பாடு, புத்தகங்கள் ஏர்ப்போர்ட்டில் வேலை செய்பவர்கள் தந்து உள்ளனர்.
சர் ஆல்ஃப்ரெட் என்றும் அழைக்க படுகிறார்.
1999-ல் இவருக்கு ஃப்ரான்ஸில் தங்குவதற்கு அடையாள அட்டை வழங்க பட்டது.

Lost in transit என்ற ஃப்ரென்ச் படமும்(1993), The Terminal(2004) என்ற ஆங்கில படமும் இவரின் கதையினை போல எடுக்கப்பட்ட படங்கள். டெர்மினல் ஸ்டீஃபன் ஸ்பீல்பெர்க் எடுத்து உள்ளார்.

The Terminal படத்தை z-studio சானலில் இந்த வாரம் பார்த்து விட்டு ஃபோட்டாவிற்க்காக நெட்டில் தேடிய போது இது உண்மை கதை என்று தெரிந்தது.

Cast Away, Forrest Gump படங்களில் நடித்த Tom Hanks இதில் நடித்து உள்ளார். நகைச்சுவை கலந்து இந்த படம் எடுக்கப்பட்டிருக்கிறது. க்ரோகோச்லேவியா (கற்பனை நாடு) என்ற ஐரோப்பிய நாட்டிலிருந்து நியூயார்க் JF Kennedy ஏர்போர்ட்டிற்கு வருகிறார் நாவோஸ்கி (டாம்). அவர் விமானத்தில் இருக்கும் போது அவரின் நாட்டில் கலவரம் ஏற்பட்டு அவரின் நாடு தனிமை படுத்தப்படுகிறது. அங்கிருந்து வருபவர்களை அமெரிக்கா உள்ளே நுழைய தடை விதிக்கிறது. ஆங்கிலம் தெரியாமல் அவர் கஷ்டப்படுவதை நகைச்சுவையாக காண்பித்து உள்ளனர். கேட் 64-ல் தங்கிக் கொள்ள அனுமதிக்கப் படுகிறார். விமான பயணிகளுக்கு உதவி செய்து கிடைக்கும் சில்லறையில் உணவு வாங்கி உண்கிறார். தன் நாட்டினை பற்றி டிவி வாயிலாக அறிந்து கொள்கிறார். ஒரு காதல் ஜோடிக்கு காதல் தூதுவராய் பணிசெய்கிறார். அதில் பணமும் கிடைக்கிறது.

மேலதிகாரியாக Stanley Tucci அருமையான நடிப்பு.

ஒரு விமான பணிபெண்ணின் கதையினை கேட்டு அவருக்கு காதலும் வருகிறது. பணியாளர்கள் இவரை CIA என்று சந்தேகப்படுகிறார்கள். ஏர்போர்ட்டின் மேலதிகாரியினை தவிர அனைவரிடமும் நண்பராகிறார். ஏர்போர்டினை விட்டு ஒரு முறையும் தப்பிக்க ஹீரோ நினைப்பதில்லை. இன்னும் அருமையான காட்சிகள் படம் முழுவதும். எதற்காக அமெரிக்கா வந்தார், வந்த வேலையினை அதன் பின் முடித்தாரா?

முடிவினை படம் பார்த்து தெரிந்து கொள்ளுங்கள்.

டாமின் அசத்தலான நடிப்பிற்க்காக இதை இன்னொரு முறை டிவியில் பார்க்கணும். திரும்ப ஒலிப்பரப்பாகும். நீங்களும் பாருங்கள். 9 மாதங்கள் இவர் ஒரு டெர்மினலில் காலம் தள்ளுவதாய் கதை.

ஆனால், ஒருவர் நிஜத்தில் எப்படி 18 வருடங்கள் ஏர்போர்டில் காலம் தள்ளினார் என்று நினைத்தாலே கலக்கமாய் உள்ளது.

2 B,காந்திநகர்,திருநெல்வேலி-8.

2011-03-21T12:30:00.001+05:30

உலகத்திலேயே எனக்கு பிடித்த இடங்களில் ஒன்று நெல்லையில் இருந்த போது 5 வருடங்கள் வாழ்ந்த காந்தி நகர்.நான் அப்போது 7 ஆம் வகுப்பு முதல் 11 வரை அங்கிருந்து தான் படித்தேன். நெல்லை டவுணில் இருந்து லாலா சத்திர முக்கு,வழுக்கோடை வழியாக பழைய பேட்டை தாண்டி குற்றால ரோடில் சென்றால் வரும் ஒரு காலனி தான் காந்தி நகர்.நாங்கள் அப்ப இருந்த போது மொத்தமே 5 தெருக்கள் தான் அந்த நகரில்.நகரின் எதிரில் ராணி அண்ணா பெண்கள் கலை கல்லூரி இருக்கும். ஆடி மாதமானால் அடிக்கும் காற்றில் அம்மியும் பறந்து போகும்.குற்றால சீசன் வந்தாச்சுன்னு இங்கேயே தெரிந்திடும்.அப்படியே பறந்து போனால் கொஞ்ச தூரத்தில் நெல்லை ரேடியோ ஸ்டேஷன் இருக்கும்.

தனி தனியே தோட்டத்துடன் கூடிய வீடுகள்.16 செண்ட்டில் தோட்டமும் வீடும் இருக்கும். ஒவ்வொரு வீட்டிலும் ரோஜா,டிசம்பர் பூக்கள், கனகாம்பரம், கொன்றைப் பூ,பால்ஸம், செம்பருத்தி, மருதாணி,வாழை,மாமரம்,வேப்பமரம் என்று பூத்துக் குலுங்கும்.தலையில் ரோஜா வைக்காமல் ஸ்கூல் சென்றதில்லை.நாங்கள் இரண்டாவது தெருவில் 2 B வீட்டில் வசித்து வந்தோம்.ரவுடி தெரு அது தான். அங்கு தான் ஒரு கிரவுண்ட் இருந்தது. அதில் இருந்த ஒரு பெரிய மரத்தின் கிளைகளில் ஏறி அமர்ந்து பேசிக் கொண்டிருப்போம். மாலை 4-லிருந்து இருட்டும் வரை விளையாடுவோம். பிறகு அவர் அவர் வீட்டிற்கு மனசேயில்லாமல் படிக்க போய் விடுவோம். 6 மணிக்கு முன் வராவிட்டால் அம்மா வீட்டின் உள்ளே விட மாட்டார்கள். என் தம்பி, தங்கைகள் பயந்து கொண்டு போய் விடுவார்கள். நான் (மூத்த பெண்!!)நிறைய நாட்கள் 6 மணிக்கு பிறகு வந்து திட்டு வாங்குவேன். வெள்ளி மாலையில் அனைவரும் ஒன்றாக அங்கு இருந்த பிள்ளையார் கோயிலுக்கு போய் விடுவோம்.அன்று மட்டும் 6 மணி கணக்கு கிடையாது.

சனி, ஞாயிறுகளில் சாப்பிட்டு, சாப்பிட்டு விளையாட்டு தான்.பகல் வேளைகளில் எல்லோரும் பசங்களிடம் சைக்கிள் ஓட்ட கத்துக் கொள்வோம். ஏன்னா அவர்களிடம் தான் சைக்கிள் இருக்கும்.என் சைக்கிள் புறப்படம்னா என் இடது கால் பக்கத்தில் ஒரு மேடு அல்லது கல் இருக்கணும். அதில் ஏறி தான் சைக்கிளில் உட்காருவேன்.

வீட்டின் இருந்த மாதுளை மரத்தில் அம்மா அணிலிடம் இருந்து மாதுளை பழங்களை காப்பதற்காக ஒவ்வொரு பழத்தினை சுற்றியும் வெள்ளை துணியினை கட்டி முடிச்சு போட்டு இருப்பார்கள்.காற்றில் அது ஆடிக் கொண்டு இருக்கும். இரவில் வீட்டிற்கு வரும்போது மரம் எல்லாம் சின்ன சின்ன ஜெகன் மோகினிகள் தொங்குவதாய் பயந்து கொண்டு அந்த பக்கம் பார்க்க கூடாது என்று நினைத்தாலும் பார்த்துக் கொண்டு பயந்து ஓடுவோம்.

என் பக்கத்து வீட்டில் இருந்த சுந்தரேஷன் என்பவர் ரேடியோ ஸ்டேஷனில் வேலை பார்த்தார். அவரிடம் எங்களுக்கு பிடித்த பாடல்களை சொல்லி விட்டு இப்படி ஒரு ரேடியோவில் இரவில் கூட்டமாய் அமர்ந்து கேட்போம். ஒருத்தர் வீட்டில் மட்டுமே அப்ப டி.வி இருந்தது.இரவு இலங்கை ரூபவாகிணி ஒலிப்பரப்பும் அருத பழசு தமிழ் சினிமாவை பார்ப்போம். சில சமயம் இருட்டினதும் ஒரு வீட்டின் முற்றத்தில் அனைவரும் அமர்ந்து பேய் கதை, சினிமா கதை பேசிக் கொண்டு இருப்போம். சினிமாவில் வில்லன் என்றே சொல்ல தெரியாது, கொள்ள கூட்ட தலைவன் என்றோ,பாஸ் என்றோ தான் சொல்வோம். பொங்கல் சமயம் கரும்பு தின்பதற்கு போட்டியே நடக்கும்.எதாவது ஒரு நாள் அம்மாக்கள் பிள்ளைகள் அனைவரும் ஒன்றாக டவுணில் சினிமா பார்க்க போவோம்.

காந்திநகரில் தீப்பெட்டி தொழில்சாலை ஒன்று அப்போது அங்கு இருந்தது. அங்கு வேலைக்கு வரும் வயசு பிள்ளைகள் மாலையில் வீட்டிற்கு போகும் போது எங்காவது ஜோடியாய் நின்று பேசிக் கொண்டு இருந்தால் அதை கெடுப்பதற்காகவே நாங்கள் அங்கு கூட்டமா சும்மாவாச்சும் போய் வருவோம்.அக்கா, அண்ணா என்று சும்மா பேச்சுக் கொடுத்து வருவோம். அவர்களை பார்க்கவே ஏனோ எங்களுக்கு வெட்கம் வெட்கமாய் இருக்கும். ஆனாலும், போவோம். மொட்டை மாடிக்கு போய் அப்படி யார் எங்கு நிற்கிறார்கள் என்று உளவு பார்ப்பது பசங்க வேலை.

முதல் தெருவில் தங்கம் இல்லம் என்று ஒரு வீடு இருக்கும். அங்கு பேய் நடமாட்டம் இருப்பதாய் நம்பினோம். பாதி நேரம் அந்த வீடு பூட்டியே இருக்கும். நெல்லையப்பர் தேர் திருவிழா, அரசு பொருட்காட்சி ஒன்றாய் போய் வருவோம்.

காந்திநகரில் வருடம் ஒரு நாள் ஆண்டுவிழா நடக்கும் அதற்கு டான்ஸ்,ட்ராமா, பாட்டு என்று கலக்குவோம்.சினிமா பாடல்களுக்கு கோரியாகிராஃப் செய்து ஆடினோம்(!).உஸ், அப்பாடா சொல்லும் போதே கண்ணை கட்டுதே.பெண் குழந்தைகள் ப்ராக்டிஸ் செய்யும் வீட்டிற்கு(தினம் ஒரு வீடு)வந்து கலாட்டா செய்யும் பசங்களை துரத்தி விட காவல் வைப்போம்.

தாயம்,பரமபதம்,கார்ட்ஸ்,பாண்டி,கல்லா-மண்ணா,கொ-கோ,பிசினஸ் கார்ட்ஸ், பல்லாங்குழி,கண்கட்டி விளையாடுவது,ஒளிந்து விளையாடுவது, கோலி, கேரம், ஊஞ்சல் ஆகா எத்தனை விளையாட்டுகள் விளையாடி இருக்கிறோம். மாலையில் செல்வி வீட்டு கோழி கூண்டிற்கு வரலைன்னா அதை தேடி போவோம். ஒரு கோழியினை 6 பேர் துரத்தி பிடிப்போம். மாலையில் பூக்கள் பறித்து அம்மாக்களிடம் கட்டுவதற்கு கற்றுக் கொள்வோம்.

சில வருடங்கள் கழித்து பார்த்தால் நாங்கள் சேர்ந்தே விளையாடிய ஆம்பளை பசங்களுடன் பேசுவது இல்லை. எப்ப பேச்சை நிறுத்தினோம் என்றே தெரியவில்லை. எல்லாம் பெரிய மனுஷங்களாகி விட்டார்களாம்.பேச ஆசையாய் இருந்தாலும் பேசவில்லை.வெட்கத்துடன் குனிந்துக் கொண்டார்கள். போங்கடா நீங்களும் உங்கள் கலாச்சாரமும் என்று இருக்கும். அப்புறம் காந்திநகரில் அந்த வாடகை வீட்டினை விட்டு நாங்கள் டவுணில் எங்கள் சொந்த வீட்டிற்கு வந்தோம்.பள்ளி, கல்லூரி, கோயில்,சினிமா செல்வதற்கு மட்டுமே வெளியில் வருவோம். விளையாட இங்கு இடமில்லை, மனிதர்களுக்கு மனமுமில்லை.

சில வருடங்களுக்கு முன்னால் என் பசங்க இருவரையும் காந்திநகருக்கு கூட்டிச்சென்று பேய் வீடு தங்கம் இல்லம்,நாங்கள் விளையாடிய கிரவுண்ட், போன கோயில், தீப்பெட்டி தொழில்சாலை இருந்த வீடு என்று அனைத்தையும் காட்டி வந்தேன். இப்பவும் அவ்வப்போது என் பசங்களுக்கு காந்திநகர் கதையினை சொல்லிக் கொண்டே இருப்பேன்.இன்னைக்கு நீங்களெல்லாம் மாட்டினீங்க!!!!

என்ன பாவம் செய்தாள்?

2011-03-14T21:15:00.001+05:30

கலா போன வருடம் பார்த்த போதும் இளைத்து தான் காணப்பட்டாள்.அவளின் பெண் குழந்தை அவளிடம் அமுதா என்னோட ஃப்ரெண்ட், உனக்கு ஃப்ரெண்ட் இல்லை என்ற போது ஆமாம், ஆமாம் நான் உன்னோட ஃப்ரெண்ட் தான் நந்தினி என்று அவசரமாய் தலையாட்டி வைத்தேன்.இல்லைனா எனக்கு அடி விழும் என்ற பயம் தான்.

13 வயது ஆகும் நந்தினி வயதிற்கு மீறிய வளர்ச்சியுடன் இருந்தாள்.என்னை நன்கு தெரிகிறது. நீ அமுதா தானே என்று கேட்கும் போது சந்தோஷமாய் இருந்தது.நந்தினி தூங்கியதும் கலா சொன்னது கேட்டு மிக கவலையாய் இருந்தது.சொந்தக்கார லேடி டாக்டர் நந்தினியின் யூட்ரஸை இன்னும் ஒரிரு வருடங்களில் ஆபரேஷன் செய்து எடுத்து விடலாம் என்று சொல்லி இருக்கிறார்.

இதை என்னிடம் சொல்லிட்டு அழுத கலாவினை என்னால் சமாதானம் செய்ய இயலவில்லை. கடவுள் மேல் கோபமாய் வந்தது. கலா பார்ட்டைம் வேலையாக ரேடியோ ஸ்டேஷனில் வேலை செய்கிறார்.நந்தினியினை ஹாலில் டி.வி போட்டுட்டு ஹாலோடு அட்டாச் ஆக இருக்கும் டாய்லெட்டை ஓபன் செய்துட்டு, ரூம், கிச்சனை பூட்டி விட்டு, ஹாலின் வெளி கதவினை பூட்டி விட்டு வேலைக்கு சென்று விடுவாள்.4 மணிநேரம் கழித்து வரும் போது நந்தினி டி.வி. பார்த்து விட்டு ஏனோ தானோ என்று படுத்து தூங்கி இருப்பாள். டி.வி ஓடிக் கொண்டே இருக்கும். இப்படி தான் கடந்த 5 வருடங்களாக நடக்கிறது. சின்ன குழந்தையாக இருக்கும் வரை வேறு பிரச்சனைகள் இல்லை.இனிமேல் வயதிற்கு வந்து விட்டால் வரகூடிய பிரச்சனைகளை சமாளிப்பது கஷ்டம் என்று அந்த டாக்டர் இப்படி கூறி இருக்கிறார். ஏற்கனவே இரண்டு கண்களிலும் ஆபரேஷன் செய்து அவளை ஆஸ்பத்திரியில் வைத்து சமாளிக்க முடியாமல் கஷ்டப்பட்டதையும் சொன்னாள். கலாவிற்கு ஏனோ இப்ப டாக்டர் கருத்துடன் ஒத்துப் போக முடியவில்லை.

நந்தினிக்கு வயதிற்கு வருவதை பற்றியும், எப்படி பேட் யூஸ் செய்யணும் என்றும் அந்த வயதுகளில் பெண் குழந்தைகள் வைத்திருக்கும் அம்மாக்கள் போலவே தன் குழந்தைக்கும் தினம் தினம் சொல்லி சொல்லி புரிய வைத்து விட்டாள்.நான் போய் வந்த அடுத்த மாதத்திலேயே அந்த குழந்தை பெரிய மனுஷியும் ஆகிவிட்டாள்.முதல் 3 மாதங்கள் பாடாய் படுத்தி விட்டு இப்பொழுது பழகி விட்டது. ஆனால், மிகவும் கஷ்டப்படுகிறது.ரொம்ப முரடாகி வருகிறது.

இந்த வாரம் கலாவினை ஃபோனில் கூப்பிட்ட போது மிகவும் முரடாக இருக்கும் அவளை அடக்க எனக்கு சக்தியே இல்லை அமுதா என்ற போது என்ன பாவம் செய்தாள் கலா என்று எனக்கு இயலாமையாக இருந்தது.

இப்ப முன்னேற்றம் என்ன என்று கேட்ட போது இப்ப தமிழ் எழுத்து கூட்டி படிக்க தெரிகிறது. ஏற்கனவே, பணம் பற்றி கூறி கொஞ்சம் புரிகிறது அந்த குழந்தைக்கு, 100 ரூபாய் வரை தெரிகிறது. அதற்கு மேல் அவளிடம் கொடுப்பதில்லை. சில சமயங்களில் கிழித்து விடுவாள். பக்கத்து கடைகளுக்கு பேப்பரில் சாமான் பெயர்களை எழுதி அவளை அனுப்பி வாங்கி வந்ததை இப்ப வயதிற்கு வந்ததும் நிறுத்திக் கொண்டேன் என்றாள். சில சமயம் பிடித்தவர்களை ஆணோ, பெண்ணோ அணைத்து கட்டிக் கொள்கிறாள். எனவே, நான் இல்லாமல் அவளை வீட்டின் வாசப்படி தாண்ட விடுவதில்லை என்றாள்.

என் மாமா பெண் திருமணம் மதுரையில் நடந்த போது அவளை வரச்சொன்னேன் நந்தினியுடன். நந்தினிக்கு கல்யாண சாப்பாடு, இலை போட்டு பந்தியில் உட்கார்ந்து சாப்பிட பிடிக்கும் என்ற ஒரு காரணத்திற்க்காகவே. சாப்பிடும் போது நந்தினி முகத்தில் அப்படி ஒரு வெட்கம். பட்டுப் பாவாடை கட்டி,அதனை ஒரு கையால் முழங்கால் வரை தூக்கிக் கொண்டு வந்தாள் அந்த செல்லக்குழந்தை. மேடம் பாவாடை பாழாகாமல் பத்திரமாய் இருக்காங்களாம்.

இவளுக்காகவே இன்னொரு குழந்தை பெற்றுக் கொள்ள மாட்டேன் என்று கலா மறுத்து விட்டாள்.எத்தனையோ பேர் அட்வைஸ் செய்தும் மிக பிடிவாதமாய் மறுத்து விட்டாள்.

அவளின் கணவர் அவளுக்கு சொந்தம் கிடையாது.கணவர் வீட்டில் யாரும் இப்படி குறையுடன் இல்லை. இவளின் சொந்தத்திலும் இப்படி யாரும் இல்லை. திருமணம் முடிந்து 5 வருடங்கள் கழித்து நந்தினி பிறந்தாள்.அந்த பெண் குழந்தையை ஸ்கூலில் சேர்க்கும் வரை பிரச்சனை எதுவும் தெரியவில்லை.அதன் பிறகு தான் அந்த குழந்தையின் நடவடிக்கை வைத்து MR (mental retardation) என டாக்டர் கூறினார்.

கலாவை, நந்தினியினை எப்ப மதுரை போனாலும் சந்தித்து வருவேன். வெளியூரில் யார் வீட்டிற்கும் அவளை அழைத்து போவதில்லை. மதுரையில் யார் வீட்டிற்கு போனாலும் இரவு அவர்கள் தங்குவதில்லை.நான் எப்ப மதுரை போனாலும் மூவரும் மீனாட்சி கோயிலுக்கு,இரவு சாப்பிட ஒரு ஹோட்டலுக்கு விசிட் செய்வது வழக்கமாய் வைத்து இருக்கிறோம்.
நான் தவறாமல் அவளை பார்க்கப்போவது கலாவிற்கு மிக மகிழ்ச்சி. இதை தவிர வேறு எந்த மகிழ்ச்சியும் என்னால் கலாவிற்கு தர முடியவில்லை.

பெயர்

2011-03-11T21:09:00.000+05:30

இந்த தொடர் பதிவிற்கு என்னை அழைத்தவர் சுசி. அவருக்கு என்னுடைய நன்றிகள்.

என் அப்பா தான் எனக்கு பெயர் வைத்தார். ஒரு ரைமிங்காக இருக்கும் என்று என் தங்கைக்கு வைத்த பெயர் குமுதா.நிறைய உறவுகள் என்னை குமுதா என்றும் அவளை அமுதா என்றும் மாற்றி மாற்றி சொல்வார்கள். இல்லை என்று மறுக்காமல் உம் போட்டு வருகிறோம். அமுதா என்பது தமிழ் பெயர். நிறைய பழைய தமிழ் படங்களில் இந்த பெயர் வருகிறது. ஆந்திராக்காரங்க என் பெயரை அமிர்தாவா என்பார்கள். அன்பே அமுதா நீ பாலமுதா, சுவை தேனமுதா என்று ஒரு பாடல் சிலோன் ரேடியாவில் அடிக்கடி ஒலிப்பரப்பாகும். டி.எம் செளந்தர்ராஜன் பாடியது. எனக்கு ஏனோ அந்த பாடலை கேட்டதில் இருந்து என் பெயர் பிடிக்கவில்லை அப்போது.என் அப்பா அமுதா தேவி என்று என் பெயரை மாற்றிக் கொள்ள சொன்னார். அவரின் பாட்டியின் பெயர் ஸ்ரீதேவி. அப்பவே எப்படி மாடர்ன் பெயர் என்று பெருமை அடித்துக் கொள்வார்.என் அத்தையின் பெயர் தேவி என்பதால் ரிப்பீட்டுக்கு நான் அந்த பெயரை இணைத்துக் கொள்ள ஒத்துக்கொள்ளவே இல்லை.

என்னுடைய சின்ன வயதில் ரொம்ம்ப சேட்டை செய்வேன். அடங்கா பிடாரி, குறத்தி, டிங்கு ராணி,வாயாடி,பத்ரகாளி,ராட்சசி எனவும் கூப்பிடப்பட்டேன். ஆனாலும், அப்படி கூப்பிட்டவர்களை போங்கடா என்று சொல்லிட்டு நான் செய்ற சேட்டைகளை தான் செய்வேன்.அப்புறம் காலப்போக்கில் எல்லோருக்கும் அம்முவானேன். என்னுடைய மகன்கள் கூட பேச ஆரம்பிக்கும் போது அம்மு என்றே அழைத்தனர். அப்புறம் தான் அம்மா, மம்மி என்று மாறினர். என் உடன்பிறப்புகள் யாரும் அக்கா என்று என்னை ஒரு நாளும் அழைத்ததே இல்லை.

திருநெல்வேலியில் என்னுடன் படித்த பெண்கள் வடிவு, கோமதி, ஆவுடையம்மாள், காந்திமதி, மீனாட்சி, சரஸ்வதி, லெக்‌ஷ்மி என்று அம்மன்களாக தான் இருப்பர். எனவே என்னுடைய பெயர் அங்கே மாடர்னாக இருந்தது. பையன்கள் என்றால் சுப்ரமணி, மணிகண்டன், நாதன்,திருநாவுக்கரசு,குமார் என்று சைவப்பெயர்கள் தான் அதிகம் இருக்கும். என் தம்பிகளின் பெயர் மதுசூதனன், பிரபு என்று மாடர்னாக இருக்கும்.

மேலும் திருநெல்வேலியில் பாட்டி, தாத்தா பெயர் தான் வழி வழியாக வைப்பார்கள். திண்டுக்கல்லில் ஒன்பதாம் வகுப்பு படிக்கும் போது தான் இன்னொரு R.அமுதாவுடன் மோதிக் கொண்டேன். இருவரும் ஒரே செக்‌ஷன். இருவருக்கும் ஆர் தான் இன்ஷியல், எனவே,அந்த வருடம் மட்டும் அவள் அமுதா ரத்தினமாகவும், நான் அமுதா ராமசாமியாகவும் அப்பாவின் பெயருடன் சேர்த்து அழைக்கப்பட்டோம்.

அதன் பின் என் பெயரோடு மோதிக் கொண்டது இந்த பதிவுலகத்தில் தான். அமுதா என்று இன்னொரு பதிவர் இருந்ததால் நான் முதலில் அப்பாவி அமுதா என்று தான் பெயர் வைத்தேன். யோசித்ததில் எப்பவும் அப்பாவியாக நான் இருப்பது இல்லை சில சமயம் அடிப்பாவி! என்னும் படியாகவும் இருப்பதால் அந்த அப்பாவியினை கடாசி விட்டு கணவரின் பெயரில் (கிருஷ்ணமூர்த்தி-அவர் எட்டாவதாய் பிறந்ததால் அவருக்கு இந்த பெயர்) கிருஷ்ணாவினை சேர்த்து அமுதா கிருஷ்ணாவானேன். அமுதா.K.மூர்த்தி (அமுதாக்கே மூர்த்தி!) என்றும் சில இடங்களில் சொல்லி இருக்கிறேன்.

அம்மு என்பது அமுதா என்பதின் சுருக்கம் என்றே நினைத்து வந்தேன். ஒரு முறை என் தம்பிக்கு பெண் பார்க்க போன போது என் அம்மா என்னை அம்மு என்று எதற்கோ எதார்த்தாமாய் அழைக்க அந்த பெண்ணின் அம்மா பதறி போனார். என்னுடைய பெண்ணையும் அம்மு என்று தான் அழைப்போம்.( அவரின் பெயர் அமுதா இல்லை) நீங்கள் எல்லோரும் இவரை(என்னை சுட்டிக்காட்டி)அம்மு என்று தான் கூப்பிடுவீர்களா என்று தேவை இல்லாமல் ஓவராய் பதறினார். அதாவது அவர் மகளை மட்டும் தான் இனி அம்மு என்று நாங்கள் அழைக்க வேண்டும் என்று நேரடியாக சொல்லாமல் ஒரு உத்தரவு போட்டார்.
அதுவும் இல்லாமல் துபாயில் அப்போது நல்ல வேலையில் இருந்த என் தம்பியினை திருமணத்திற்கு பிறகு கட்டாயம் இந்தியா வர வேண்டும் என்றும் கூறினார். இத்தனைக்கும் அந்த பெண்ணின் சம்பளம் கம்மி தான். எங்களுக்கு அந்த பெண் ரொம்ம்ம்ப குண்டாக வேறு இருந்ததால் முதலிலேயே பிடிக்கவில்லை. இதில் இப்படி ஒரு தேவையில்லாத பிரச்சனை வேறு. அம்மா தாயே நீங்களே அம்மு,அம்முன்னு சொல்லிக்கோங்க என்று ஓடி வந்து விட்டோம். இந்த அம்மு பிரச்சனைக்காக ஓடி வரவில்லை மக்களே.அவர்கள் சொன்ன கண்டிஷன்கள்+குண்டு பிடிக்காமல் வந்தோம்.

ஸ்கூல், காலேஜில் எப்பவும் அட்டெண்ட்டெண்சில் முதல் பெயர் என்னுடையது தான்.(படிப்பில்? என்ன கேட்டீங்க காதில் சரியாய் விழலைப்பா?)

AMUTHA என்று தான் எழுதுவேன் யாராவது AMUDHA என்று எழுதினால் நிறைய ஸ்பெல்லிங் மிஸ்டேக் மாதிரி தோணும்.

யாரை மாட்டிவிடலாம்??

பிரபு எம்

அன்புடன் அருணா

கீதா ஆச்சல்

மங்குனி அமைச்சர்

பிடித்து சுட்டது

2011-03-09T20:40:00.001+05:30

சிங்கப்பூர் சிங்கம் தண்ணீ துப்புவதில் கவனமா இருக்கே! திரும்புவதற்குள் ஒரு ஃபோட்டோ அப்பாடா சுட்டாச்சு!!!

தண்ணீ அடிக்கும் யானை?

குருவாயூர்

தாஜ்மகாலுக்கு கோபமா லைட்டா லெஃப்ட்ல ஒதுங்கிடுச்சு.

அடுத்த தடவை அந்த உச்சிக்கு போயிடணும். ஜில்லுன்னு காஷ்மீர் சோன்மார்க்

தாம்பரம் ரயில்வே காலனியில் நாங்கள் இருந்த வீடு.

ஒரு போட் மட்டும் கோபமாய் போகுதே. ஊட்டி பைக்காரா.

போ(ர்)ட் மீட்டிங்கா?காஷ்மீர் தால் ஏரி.

என்னிடம் சுட்ட மேங்கோ ஜீஸுடன். குடிச்சுட்டு கொடுத்தா மூடி திறந்து குடிக்கலாம்னு இருந்தேன்.ஆனா, மிஸ்டர் ஃபுல்லா குடிச்சுட்டு தான் பாட்டிலை கடாசினார்.ஜம்மு வைஷ்ணவி தேவி கோயில் போகும் வழி.

தூத்துக்குடி ஆயின

2011-03-04T14:50:00.002+05:30

உறவுகள் நல்லது கெட்டதுன்னு ஒன்னு கூடும்போது அதற்கு வந்திருக்கும் சிலரை பெயர் இல்லாது நம் வீட்டு பெரியவர்கள் இப்படி மற்றவர்களிடம் சொல்வதுண்டு.எங்கள் வீட்டில் எப்படின்னா? தூத்துக்குடி ஆயின, வாங்கல் ஆயின,திருச்சி ஆயின,மதுரை ஆயின,மெட்ராஸ் ஆயின. ஆயின தெலுங்காம்!!. முறையே தூத்துக்குடிக்காரர், வாங்கல்காரர்,திருச்சிக்காரர்,மதுரைக்காரர், மெட்ராஸ்காரர்.

அவர்களுக்கு என்ன பெயர் என்றே தெரியாது. அந்த ரூமில திருச்சி ஆயின உட்கார்ந்து இருப்பார் அவரை கொஞ்சம் இங்க வர சொல்லு என்றதும் அவரிடம் சென்று எங்க தாத்தா கூப்பிடுறாங்க என்று சின்ன வயதில் சொல்லி சென்றதுண்டு.அவர் பெயர் என்ன என்று தெரிந்துக் கொள்ள முயன்றதில்லை. எப்பவும் அவர் திருச்சி ஆயின தான். திருச்சி மாமா என்று சின்னவர்களும், திருச்சி ஆயின என்று பெரியவர்களுக்கும் பழக்கம். என்னவோ அவர் ஒருவர் தான் திருச்சியில் இருப்பது மாதிரி.

அப்பொழுதெல்லாம் தெரியாத உறவுகளில் ஆண் என்றால் மாமா,பெண் என்றால் அத்தை என்று தான் சொல்றது வழக்கம். இப்ப ஆங்கிலத்தில் சொல்கிறார்கள்.

ஒரு முறை கருமாதி பத்திரிக்கை பார்த்து அதில் இருந்த ஃபோட்டோ பார்த்து தான் தூத்துக்குடிக்காரர் பெயர் ராமகிருஷ்ணன் என்றே எனக்கு தெரியும். அவர் செத்த பிறகு தான் அவரின் பெயர் தெரிந்துக் கொண்டோம்.

ஊரின் பெயரை தங்களுடன் விரும்பி இணைத்து கொண்டவர்கள் உண்டு.அரசியல்வாதிகள் தான் பெரும்பாலும் அப்படி செய்வார்கள். ஆனால், உறவுக்காரர்களால் ஒரு அடையாளத்திற்கு வைக்கப்பட்டு பிறகு அதுவே நிலைத்தும் விடுகிறது. திருச்சியில் இருந்து 4 உறவுக்காரர்கள் வந்தாலும் அது ஏனோ ஒருவருக்கு மட்டுமே திருச்சிக்காரர் என்ற பெயர் வைக்கப்படுகிறது.பெரும்பாலும் ஆண்களுக்கு மட்டும் தான் வைக்கப்படுகிறது.இன்னும் சிலர் அவர் வேலை செய்யும் இடத்தினை வைத்து அழைக்கப்படுவதும் உண்டு.ரயில்வேக்காரர், பேங்க்காரர்,மிலிட்டரிக்காரர் இப்படி.

உங்கள் உறவுகளில் இப்படி ஒருவர் நிச்சயம் இருப்பார் என்ற நம்பிக்கையுடன்.

ஒரே டெர்ரரா இருக்கே..

2011-02-25T19:00:00.001+05:30

ம்மா டெர்ரர் ஃபேமிலி ஒரு கடை ஆரம்பிச்சு இருக்காங்கம்மா. மாலையில் வீட்டிற்குள் வரும் போதே நகுல் சொல்லிக் கொண்டே வந்தான். டெர்ரர் ஃபேமிலி?

எங்கள் தெருவின் கார்னர் வீட்டில் இருப்பவர்கள் எல்லாரும் குண்டாக(குண்டாக இருப்பவர்கள் எல்லாம் திட்டாதீங்கப்பு) இருப்பார்கள். ஒவ்வொருவரும் எப்போதும் ஒரு 15 அல்லது 20 பவுன் நகை போட்டிருப்பார்கள். தண்டி தண்டியாக செயின், ப்ரேஸ்லெட், மோதிரம் என்று ஆண்களும் நகை போட்டு இருப்பார்கள்.அந்த வீட்டு ஆண்கள் எல்லாம் மிக பெரிய மீசை வைத்து இருப்பார்கள். அவர்கள் குடும்பத்திற்கு நகுல் வைத்த பெயர் தான் டெர்ரர் ஃபேமிலி.அடுத்த நாள் இந்த முட்டைகள் டெர்ரர் கடையில் வாங்கி வந்தான்.

ஐயோ, இன்னைக்கு டெர்ரர் குழம்பா நான் வெளியில் சாப்பிட்டுக்றேம்மா. இது ரிஷி.டெர்ரர் குழம்பு-புளிக்குழம்பு. கலர் பார்க்க டெர்ரரா இருக்காம்.

இப்படி இரண்டு டெர்ரர்களிடம் மாட்டிக் கொண்ட நான் கீழே நடுவில்.

10 வருடங்களுக்கு முன்னால் இந்த இரண்டு டெர்ரரும் சேர்ந்து ஒரு கருப்பு குட்டி நாயினை தெருவில் இருந்து தூக்கி வந்துச்சுங்க. டாக்டரிம் கூட்டி போய் ஊசி போடும் போது தான் அந்த நாய் பெண் என்றே தெரிந்தது. கார்டில் பெயர் எழுத நாய் பெயர் டாக்டர் கேட்டால், ஓ பெயரே இன்னும் முடிவு செய்யலையே.ஆனால், உடனே ஒரு பெயர் வைச்சுதுங்க.

RINA..RI for Rishi..Na for Nagul.

ஆனால் இப்போ இப்ப மருவி ரீனாவாகி போச்சு. அதிலும் ரிஷி அதற்கு R.ரினா என்று வைக்கணும் என்று ஒரே வம்பு. அவன் பெயர் தான் இன்ஷியலாம். தல அப்ப ப்ரைமரி ஸ்கூலில் இருந்தார்.

உத்திரகோசமங்கை

2011-02-21T20:45:00.001+05:30

புறப்படும் போதே நகுல் சொன்னான் இந்தியா மேப்பிலேயே இல்லாத ஊருக்கு அவ்வாவும், நீங்களும் கிளம்பிடுவீங்களே என்று. என் அம்மா பார்க்க ஆசைப்பட்ட அந்த கோயிலுக்கு போகணுமே என்று கிளம்பியாச்சு.

இந்த மாதம் 14-ல் மதுரையில் கார் எடுத்துக் கொண்டு காலை 7 மணிக்கு உத்திரகோசமங்கை கிளம்பினோம்.
மதுரை-திருபுவனம்-மானாமதுரை-பரமக்குடி-வழியாக இராமநாதபுரம் காலை 9.30க்கு போயாச்சு.அங்கு ஒரு ஆட்டோ ட்ரைவரிடம் உத்திரகோசை மங்கைக்கு எப்படி போகணும் என்று விசாரித்தால் அவர் ட்ரைவரிடம் ஏம்பா ராமநாதபுரம் வந்த? 20 கி.மீ திரும்பி போ விளக்கு ரோடு வழியே லெஃப்ட்டில் ரயில்வே லைன் க்ராஸ் செய்து 10 கி.மீ போகணும் என்று ரொம்ப அன்பா(!) வழி சொன்னார். சரியென்று வந்த வழியே திரும்பினோம். எனக்கு எதுக்கும் இன்னொரு ஆளிடம் கேட்கலாம் என்று தோன்றவே கொஞ்ச நேரம் கழித்து இன்னொரு ஆட்டோக்காரரிடம் கேட்க அவர் ராமநாதபுரத்திலிருந்து போகலாமே ஏன் திரும்பி போறீங்க இப்படியே கீழக்கரை ரோடுல ஒரு 8 கி.மீ போனீங்கன்னா திருப்புலானி வரும், அங்கிருந்து 8 கி.மீட்டரில் உத்திரகோசமங்கை வரும் என்று சொல்லவும் வண்டியினை திருப்பினோம்.

திருப்புலானியில் பெருமாளுக்கு ஹலோ சொல்லிட்டு உத்திரகோசமங்கை நோக்கி பயணம். நாங்கள் மட்டும் தான் போய் கொண்டிருந்தோம் அந்த ரோட்டில். ஆடு, மாடு மேய்ப்பவர்கள் மற்றும் யாரேனும் சைக்கிளில் போய் கொண்டு இருந்தார்கள். நடுவில் களரி என்று ஓர் ஊர் மட்டும் வந்தது. அதன் பிறகு உத்திரகோசமங்கை வந்தது. தனி தனி சன்னதிகள் மங்களநாதர்(லிங்கம்), மற்றும் மங்களேஷ்வரிக்கு. மரகத நடராஜருக்கு தனி சன்னதி. சிதம்பர கோயிலுக்கு முன்பே தோன்றியது. எனவே, ஆதி சிதம்பரம் என்கின்றனர்.

அம்மனுக்கு பிரணவம்(வேதம்) ரகசியமாய் உபதேசித்த இடமாம்.உத்திரம் எனில் உபதேசம்,ஓசம் எனில் ரகசியம்.மங்கைக்கு ரகசியமாய் உபதேசித்த இடமானதால் உத்திரகோசமங்கை எனப்பெயராம். ஈசன் உமையவளுக்கு மட்டும் ஆடி காட்டியதும் இங்கு தான். மாணிக்கவாசகர் இந்த ஸ்தலம் பற்றி 9 பாடல்கள் பாடி இருக்கிறார்.

வெளி கோபுரம்

பெரிய தெப்பகுளம். வருடம் முழுவதும் வற்றாத தண்ணீர் சிறிது உப்பாக இருந்தது.

கோயில் கோபுரங்கள் இப்படி பளிச்சென்று இருந்தன.இது உள்ளே உள்ள கோபுரம்.

போனவருடம் கும்பாஷேகம் நடந்துள்ளது. மார்கழி திருவாதிரை நாளில் இங்கு இருக்கும் மரகத நடராஜர் ஆருத்ர தரிசனம் மிகவும் ஃபேமஸ். அச்சமயம் இங்கு லட்சகணக்கில் மக்கள் வருவார்களாம். நாங்கள் போன போது நாங்கள் மட்டுமே.

வருடம் முழுவதும் சந்தனம் பூசப்பட்டு இருக்கும் நடராஜருக்கு மார்கழி திருவாதிரை அன்று மட்டும் சந்தனம் கழையப்பட்டு அபிஷேகம் நடக்கும். ஐந்தரை அடி உயரமுள்ள மரகத நடராஜர் சிரித்த முகமாய் இருந்தார்.எப்பவும் சந்தனம் பூசப்பட்டு இருந்ததால் தான் ஆங்கிலேயர்கள் அது மரகதம் என்று தெரியாமல் தங்கள் ஊருக்கு கடத்தாமல் இருந்தார்கள் போலும். இல்லையெனில் கோஹினூர் வைரம் போல் இப்போது லண்டன் மியூசியத்திற்கு இந்த சிலையும் பறந்து இருக்கும். உலகத்திலேயே பெரிய மரகத கல் இதுவாக தான் இருக்கும்.

இராவணன் மனைவி மண்டோதரி இங்கு வந்து வழிப்பட்டதாய் சொல்கிறார்கள்.3000 ஆண்டுகள் பழமையான இலந்த மரம் இங்கு .மரத்தின் அடி இப்படி உள்ளது. சகஸ்ரலிங்கத்திற்கு ஒரு சன்னதி.
இலந்த மரம்

ஒரு மணிநேரம் அங்கு இருந்து விட்டு அங்கிருந்து இராமநாதபுரம் வராமல் 10 கி.மிட்டரில் இருக்கும் சத்திரக்குடி என்ற ஊரின் வழியே பரமகுடி வந்து மதுரை வந்தடைந்தோம்.வரும் வழியில் உப்பளங்கள் நிறைய இருந்தன.

கோயில் வெளியில் இருந்த ஓர் போர்டு.

இதோ கோயிலுக்கு மேப் இருக்குடா என்று நக்கல் செய்யும் நகுலுக்காக எடுத்தேன் இந்த படத்தை.

நான் சாதித்தது(சும்மா ஒரு விளம்பரம் தான்)

2011-02-16T18:23:00.001+05:30

விக்னேஷ் 10 ஆவது வகுப்பு 2009-ல் அவனின் ஊரில் ஒரு லூஸ் நடத்தும் ஸ்கூலில் படித்து வந்தான். 2008 டிசம்பர் மாதம் விக்னேஷுடன் சேர்த்து 20 மாணவர்களை டி.சி வாங்கி கொண்டு போகும் படி சொல்லியது பள்ளி நிர்வாகம். அனைவரும் one digit மார்க் எடுக்கும் கண்மணிகள். எனக்கு ஏனோ இந்த மாணவர்களை தான் மிகவும் பிடிக்கும்.

9 ஆவது படிக்கும் போது ஃபெயில் ஆக்கினால் அடுத்த வருட ஃபீஸ் வசூலிக்க முடியாது என்பதால் பெற்றோரிடம் என் மகனின் டிசியினை நான் விருப்பபட்டு வாங்கிக் கொள்கிறேன் என்று அந்த மாணவர்கள் 9 ஆவது படிக்கும் போதே கையெழுத்து வாங்கிக் கொண்டு விட்டார்கள். 10 ஆவது ஃபீஸினை மொத்தமாக வாங்கி கொண்டு பொது பரிட்சைக்கு இன்னும் மூன்று மாதங்களே இருக்கும் நிலையில் டிசி வாங்க சொல்லி வற்புறுத்தினார்கள். 2009 டிசம்பரில் விக்னேஷ் எனக்கு ஃபோன் செய்து என்னை ஸ்கூலிற்கு இனிமேல் வர வேண்டாம் என்று சொல்கிறார்கள் என்று கூறவும் அடித்து பதறி நான் ஸ்கூலிற்கு சென்று அந்த லூஸை சந்தித்தேன். கலெக்டரை கூட உடனே சந்திக்க முடியும் போல. அந்த லூசினை நான் ஒரு மணி நேர காத்திருப்பிற்கு பிறகு சந்தித்தேன்.

விக்னேஷின் படிக்காத அம்மாவிடம் வாங்கி வைத்து இருந்த கடிதத்தினை என்னிடம் காண்பித்து டிசி வாங்கி கொண்டு செல்லுங்கள், அவனின் தாய் ஒத்துக் கொண்டதற்கு பிறகு நீங்கள் யார் என்று என்னை கேட்டார்கள். நான் தான் அவனுக்கு ஃபீஸ் கட்டுகிறேன் அந்த உரிமையில் கேட்கிறேன். அவனை இந்த மூன்று மாதத்தில் நான் படிக்க வைக்கிறேன்.ஸ்கூலில் வைத்து கொள்ளுங்கள் என்று கேட்டதற்கு முடியவே முடியாது என்று மறுக்கவும், தனி தேர்வர்கள் அப்ளை செய்வதற்கு 10 நாட்களே இருக்கும் நேரத்தில் என் குடும்பத்தினை விட்டு வேறு ஊரில் போய் இருந்து அந்த லூஸ்களிடம் போராட முடியாது என்ற நிலையில் வேறு வழியில்லாமல் டிசி வாங்கிக் கொண்டு அவனை 300 மார்க் வாங்க வைத்து காண்பிக்கிறேன் (என்ன என் தன்னம்பிக்கை) என்று சவால் விட்டு என் வீட்டிற்கு சென்னைக்கு கூட்டி வந்தேன். ஜனவரி 10-ல் என்னுடம் மவுனமாக வந்த அவனுக்கு அந்த வருட ஏப்ரல் 5-ல் 10 ஆம் வகுப்பு பொது தேர்வு.

சென்னை வந்த உடன் தமிழக அரசியல், ஜூனியர் விகடன் புத்தக அலுவலகத்திற்கு அந்த ஸ்கூல் பற்றி ஃபோனில் கூறினேன். அவர்களும் அந்த ஊர் நிருபர்கள் மூலமாய் ஒரு பக்கத்திற்கு அந்த ஸ்கூல் பற்றி அடுத்த மாதமே தங்கள் புத்தகத்தில் எழுதினார்கள்.எழுதி ஒரு வெங்காயமும் இல்லை. எதோ எனக்கு ஒரு திருப்தி.

அவனை திட்டாமல், கடிந்துக் கொள்ளாமல், ஒரேடியாய் படி படியென்று தொணத்தாமல், அவமானத்தால் பேசவே கூச்சப்பட்டு கொண்டிருந்த அவனை சிரிக்க வைத்து, நடு நடுவில் டிவி, சினிமா என பார்க்க வைத்து, கடைசி 20 நாட்கள் அவனின் ஊருக்கு கூடவே சென்று, எக்சாம் சமயம் கூடவே இருந்து, அவனை கூலாய் எக்சாம் எழுத வைத்து, அப்பாடி 248 மார்க் வாங்க வைத்தேன்.

இத்தனைக்கும் நான் பத்தாம் வகுப்பிற்கு ஆசிரியாராய் பணியாற்றியது இல்லை.எனக்கு அந்த சிலபஸ் புதிது. ஆனால் மிக எளிமையான அந்த ஸ்டெட் போர்ட் சிலபஸினை கூட பாஸ் செய்ய வைக்க முடியாமல் அந்த லூஸ்கள் எதற்கு ஸ்கூல் நடத்துகிறார்கள் என்று தெரியவில்லை.ஜெயில் வைத்து நடத்த தகுந்த நபர்கள்.அவன் ஸ்கூலில் இருந்த போது தினம் கீழே தான் உட்கார வேண்டுமாம்.பெரிய பிரம்பால் அடி அடிக்கடி வாங்கி இருக்கிறான். அவனே ஸ்கூலிற்கு வர மாட்டேன் என்று சொல்ல மாட்டானா என்னும் விதமாய் தினம் திட்டி இருக்கிறார்கள். 6 அடி உயரம் உள்ளவன் அவன். நான் பார்க்கும் போது அவமானத்தால் யாரிடமும் பேசுவதையே நிறுத்தி இருந்தான்.என்னிடம் சொல்ல வெட்க பட்டு கொண்டு அனைத்தையும் பொறுத்து உள்ளான்.நீ கட்டாயம் பாசாவே விக்கி என்று தினம் மந்திரம் ஓதி அவனை பாசாக வைத்தேன்.

ஊரில் படிக்க சென்ற கடைசி 20 நாட்கள் கூட டிசி வாங்கிய மற்ற மாணவர்களையும் அழைத்து வாடா படிக்கலாம் ஜஸ்ட் பாசாக்கலாம் என்றால் அந்த பசங்க வெட்க பட்டு கொண்டு படிக்க வரவில்லை.

என்னை மாதிரி திறமை(நிஜமா!!) உள்ள ஆசிரியர்களுக்கு இந்த அரசு ஆசிரியர் வேலை கொடுக்காமல் 20 வருடங்களாய் காக்க வைத்துள்ளது.தனியார் பள்ளிகளில் கொத்தடிமை வேலை பார்க்க பிடிக்காமல் என் திறமையினை வீணடித்து வருகிறேன்.

விக்னேஷின் அப்பா 12 வருடங்கள் முன்பு இறந்து விட்டார். அவர் என் கணவரின் தம்பி ஆவார். விக்னேஷ் இப்போது அரியர்ஸ் வைத்து இரண்டாவது வருடம் பாலிடெக்னிக் படித்து வருகிறான். ஒழுங்காய் டியூஷன் கிடைக்காமல் மேத்சில் அரியர்ஸ் வைத்துள்ளான்.அவன் அம்மாவிற்காக, கூட பிறந்த இரண்டு சகோதரிகளுக்காக எப்படியும் படிக்க வேண்டும் என்று வராத படிப்புடன் போராடிக் கொண்டு இருக்கிறான்.நிச்சயம் படிப்பான்,வேலைக்கு போவான் என்ற நம்பிக்கையுடன் நாங்களும் இருக்கிறோம். கஷ்டப்படுபவர்கள் எப்பவும் வாழ்க்கை முழுவதும் கஷ்டப்பட கடவுள் விடமாட்டார் என்ற நம்பிக்கையுடன். ஆனால் இந்த காலம் பணப்பேய்களான அந்த லூஸ்களுக்கான காலமாய் இருக்கிறது. அந்த ஸ்கூலில் படித்த காரணத்தால் சரளமாய் யாரிடமும் உரையாட முடியாமல் பயந்து போய் தன்னம்பிக்கை இல்லாமல் இருக்கிறான்.ஆனாலும், நம்பிக்கையுடன் இருக்கிறோம்

ரிசல்ட் வந்துடுச்சு

2011-02-04T12:19:00.006+05:30

29,ஜனவரி சனி இரவு

நான்: டே, நாளைக்கு எண்ட்ரன்ஸ் இருக்கு, மறந்துறாத.

ரிஷி: எத்தனை மணிக்கும்மா.

நான்: காலையில ஒன்பதுக்குடா.

ரிஷி: சரி, சரி சண்டே வேற சரி சீக்கிரம்ம்மா எழுப்புங்கம்மா.கூட்டிட்டு போறேன்.

சண்டே காலை 8 AM

நான்: பத்திரம்டா.பாத்து வண்டி ஓட்டுடா.இந்தா இந்தா ஒரு டம்ளர் பாலாச்சும் குடிச்சுட்டு போங்கடா.

ரிஷி: சரிம்மா.

சண்டே காலை 11 AM

நான்: எண்ட்ரன்ஸ் எக்ஸாம் பற்றி எதுவும் கேட்கக் கூடாதுன்னு மனசுக்குள் நினைத்துக் கொண்டே என்னடா ரொம்ப கூட்டமா எக்ஸாமுக்கு.

ரிஷி: ம்.

நான்: எவ்ளோ பேருடா வந்தாங்க.

ரிஷி: 800 இல்லை 1000 பேர்மா.

நான்: ஓ, கிடைச்சுடும்மா.

ரிஷி: ம்.

நான்: ரிசல்ட் இன்னைக்கேவாடா.

ரிஷி: ம்.

நான்: நெட்லே தானே பார்க்கணும்.

ரிஷி: ம்.

மாலை 6 மணி.நெட் யூஸ் செய்துக் கொண்டிருந்த ரிஷியிடம்.

நான்: டேய் நெட்ல அந்த ரிசல்ட் வரும் சைட்டை ஓபன் செய்தாச்சாடா..1000 பேரும் ஓப்பன் செய்து ஹாங்க் ஆக போகுது.இப்பவே ஓபன் செய்திடு.

ரிஷி: ஹா.ஹா.ஹா.ஹா(சிரிக்கிறாராம்)..ம்.

நான்: வந்துருச்சா

ரிஷி: இல்லைம்மா.

நான்: அய்யோ பெயர் இல்லையா.

ரிஷி: ம்மா (நற.நற) இன்னும் ரிசல்ட் வரலை.

அதற்குள் ஒரு ஃபோன் எனக்கு என் தங்கையிடமிருந்து. இல்லை இன்னும் ரிசல்ட் வரலை ரிஷி பார்த்துட்டு இருக்கான் வந்ததும் சொல்றேன்.

இன்னொரு ஃபோன் கொடைக்கானல் போயிருந்த நகுலிடமிருந்து.இல்லைடா ரிசல்ட் வந்ததும் சொல்றேண்டா.

இன்னொரு ஃபோன் சித்தி பெண்ணிடமிருந்து இல்லைப்பா இன்னும் வரலை.

மணி: மாலை 7 ஆச்சு.

சரி அம்மு நான் கிளம்புறேன். ரிசல்ட் வந்தா பார்த்துட்டு ஃபோனில் சொல்லு என்று என் தம்பி தன் மகன்களை கூட்டிக் கொண்டு அவன் வீட்டிற்கு கிளம்பினான்.

மணி: 7.30

ரிஷி: ரிசல்ட் வந்தாச்சும்மா. விஷால் பெயர் லிஸ்ட்டில் இருக்கு.பிப்ரவரி 17-ல் ஃப்ர்ஸ்ட் டெர்ம் ஃபீஸ் கட்டணுமாம்.

நான்: ஓ, சரி, சரி. கொள்ளைடா ஜூன் ஸ்கூலுக்கு இப்பவே ஃபீஸாடா. கலிகாலம்டா.ஒண்ணாப்புக்கு இப்படி எண்ட்ரன்ஸ் எக்சாம் வைச்சு.அதுலேயும் நாமும் சேர்க்கிறோமே.பேசாமா ஒரு ஸ்கூல் ஆரம்பிக்கலாம்டா.

ரிஷி: பாவம்ம்மா விஷால். ஆரம்பிச்சுடுச்சு ரோதணை.இன்னும் 12 வருடத்திற்கு ஒரே ஓட்டம் தான் அவனுக்கு.

ஃபோன் செய்து தங்கைகள்,மகனிடம் விஷால் ”ஒண்ணாப்பு” படிக்க செலக்ட் ஆனதை சொன்னேன்.

விஷால் என் தம்பி மகன் காலை 9 மணியிலிருந்து 10 வரை நடந்த ஒண்ணாப்பு எண்ட்ரன்ஸ் எக்ஸாமிற்கு என் மகன் ரிஷியுடன் போய் வந்தான். மற்ற பசங்க 10, 10.15க்கு எல்லாம் எக்ஸாம் முடித்து வெளியில் வர நம்ம தல 10.30 வரை எக்ஸாம் எழுதினாராம்.(ஒரு வேளை அவுட் ஆப் சிலபசில் கேள்வி வந்துச்சு போல.அதான் தல யோசிச்சு எழுதி இருக்கு) வந்து சொல்லும் போது ரிஷிக்கு ஒரே சிரிப்பு. என்னத்த தல எழுதுச்சோ தெரியலை.Maths 86, English - 88 எடுத்துள்ளார்.

விஷால் ஸ்கூலில் இருந்து வரும் போது மம்மி ஸ்கூலில், க்ரீம் பிஸ்கெட்டும்,பாலும் தந்தாங்கன்னு சந்தோஷமாய் சொன்னான்.அப்ளிகேஷன் ஆயிரம் ரூபாய்டா (என்னுடைய மைண்ட் வாய்ஸ் பிரியாணியே தரலாம்.)

கூலாய் விஷால்

இது எண்ட்ரன்ஸ் என்றோ, புது ஸ்கூலிற்கு போகப்போவது பற்றியோ அதுக்கு எதுவும் தெரியலை. ஜாலியா ரிஷிகூட வண்டியில் போக பிடித்து போய் வந்தான். நாங்களும் அன்றைய முழுநாள் சிரித்துக் கொண்டே இருந்தோம். அவனின் அம்மா மட்டும் கொஞ்சம் டென்ஷன் ஆஃப் இண்டியாவில். ஆனால்,பிள்ளைகளை இப்படி கஷ்டப்படுத்துகிறோமே என்று மனம் கஷ்ட பட்டது.அப்பப்ப நாங்கள் படித்த லட்சணங்களை பட்டியலிட்டு சிரித்துக் கொண்டிருந்தோம்.

எகிப்தில் என்ன நடக்கிறது?

2011-02-03T13:35:00.000+05:30

புரட்சியாளர்கள் யார்?

ஏப்ரல் 6 யூத் மூவ்மெண்ட் என்ற அமைப்பினை சேர்ந்தவர்கள் முஸ்லீம் சகோதரத்துவ கட்சியுடன் சேர்ந்து புரட்சியினை ஜனவரி 25, 2011-ல் ஆரம்பித்தனர். இந்த அமைப்பு எல் மஹாரா-எல் குப்ரா என்ற மிக பெரிய தொழில் நகரில் தொழிலாளர்களுக்கு ஆதரவாக 2008, ஏப்ரல் 6-ல் ஸ்ட்ரைக் செய்வதற்காக ஏற்படுத்த பட்டது.

புரட்சியாளர்களை பற்றிய ஒரு முன்னுரை:

அகம்மது மஹர், அகம்மது சலா என்ற இருவர் ஃபேஸ் புக்கில் இந்த யூத் மூவ்மெண்டினை ஆரம்பித்தனர். ஏப்ரல் 6 அன்று கருப்பு ஆடை அணிந்து வீட்டிலேயே இருக்கும் படி பணிநிறுத்தம் செய்பவர்களிடம் ப்ளாக், facebook, ட்விட்டர், ஃப்லிக்கர் போன்ற சமுதாய வலைதளங்களில் அறிவித்துக் கொண்டனர்.
இதற்கு முன் அரசியலில் ஈடுபடாத சுமார் 70,000 படித்த மக்கள் இதில் தங்களை ஈடுபடுத்திக் கொண்டனர்.பேச்சு சுதந்திரம், நாட்டின் பொருளாதார வீழ்ச்சி பற்றி எழுச்சி மிகு கட்டுரையினை எழுதினர். செர்பியாவில் 2000த்தில் நடந்த புரட்சியினை தங்களுக்கு முன்னுதாரணமாய் கொண்டனர். 2008-ல் அஹம்மது மஹர் கைது செய்ய பட்டார். சமுதாய வலைதளங்கள் தடை செய்யப் பட்டன. ப்ளாக்கர்களும்,கவிஞர்களும், பத்திரிக்கையாளர்களும் கைது செய்யப்பட்டனர்.
இந்த ஏப்ரல் -6 அமைப்பினரே இப்போது புரட்சியினை எகிப்தில் ஏற்படுத்தி உள்ளனர். எகிப்தில் ஏற்பட்டுள்ள இந்த புரட்சிக்கு லோட்டஸ் புரட்சி என்று பெயர்.டுனிஷியாவில் நடந்த ஜாஸ்மின் புரட்சி தான் இந்த லோட்டஸ் புரட்சிக்கு முன் உதாரணம்.

காலித் சைத் (28) என்ற இளைஞன் போலீஸ் அத்து மீறலை, ஊழலை இணையத்தில் வெளியிட்டதால் ஒரு மாதம் முன்பு அவன் போலீசாரால் கொல்ல பட்டான்.அவன் போதை மருந்து சாப்பிட்டு இறந்தான் என்று போலீஸ் சொல்வதை மக்கள் நம்பவில்லை. காலித்தின் மரணத்தினை எகிப்து மக்கள் மன்னிக்க, மறக்க தயாராக இல்லை. காலித் சைத்தின் இணையம்

தற்சமயம் நீதிபதிகளும், இராணுவத்தினரும் இப்போராட்டத்தில் பங்கு பெற்று வருகின்றனர். இராணுவத்தினர் இது வரை எந்த நாட்டிலும் புரட்சியாளர்களுடன் கைகோர்த்தது இல்லை. பொது மக்களும் புரட்சியில் பங்கேற்று வருகின்றனர்.

புரட்சிக்கு காரணம் என்ன?

எந்த நேரத்திலும் யாரையும் விசாரணையின்றி கைது செய்யும் போலீசின் அடக்கு முறை, குறைந்த சம்பளம், ஊழல், வேலையின்மை இவைகளை எதிர்த்தும்,பொதுத் தேர்தலை நடத்தக் கோரியும்,பேச்சு சுதந்திரம் கேட்டும் இந்த விலைவாசி ஏற்றத்தினை எதிர்த்தும் புரட்சி வெடித்து உள்ளது. எமர்ஜென்சி சட்டத்தினை எதிர்த்தும் இந்த புரட்சி. தலைநகர் கெய்ரோவிலும், சூயஸ்,அலெக்ஸாண்டிரியா என்ற நகரத்திலும் புரட்சி ஏற்பட்டுள்ளது.

முக்கியமாய் அதிபர் ஹோஸினி முபாரக்கினை பதவி விலக கோரியே இந்த புரட்சி ஏற்பட்டுள்ளது.

யாரை எதிர்த்து புரட்சி? இதோ இவரை தான்.

முகமது ஹோஸினி சையது முபாரக்(82) எகிப்தில் 1981-லிருந்து 2011 வரை 30 வருடங்கள் ஜனாதிபதியாக இருக்கிறார்.அதற்கு முன்னால் எகிப்தின் ஏர்ஃபோர்சில் பணியாற்றியவர். ஜனாதிபதியான இவர் 6 முறை கொலை முயற்சியில் இருந்து தப்பியவர். நம் இந்தியா போல் அல்லாது இங்கு ஜனாதிபதிக்கு தான் அதிக பவர்.பாராளுமன்ற ஜனநாயகம் போல் இந்த அரசு இல்லை. தான் ஆட்சிக்கு வந்ததும் 1958-ன் எமர்ஜென்சி சட்டத்தினை தவிர்க்காமல் அதை இன்னும் இறுக்கமாக்கினார். இவருடைய இளைய மகன் கேமல் முபாரக்(47)லண்டனுக்கு பறந்து விட்டார் என்று செய்தி.அப்பா மண்டையை போட்டால் அடுத்த ஜனாதிபதி ஆகலாம் என்ற கனவுடன் இருந்தவர். மூத்த மகன் ஆலா முபாரக் அரசியலில் விருப்பம் இல்லாதவர்.

புரட்சியின் விளைவுகள்:

ஊரடங்கு உத்தரவு பிறப்பித்தும் அதனை அங்குள்ள இராணுவத்தினர் நடை முறை படுத்தவில்லை.

இந்த புரட்சியில் ஜனவரி 30 வரை 150 பேர் இறந்ததும், 1500 மனிதர்கள் காயமடைந்தும், 750 போலீசார் காயமடைந்தும் உள்ளனர்.

ஹாசினி முபாரக், உளவு துறை தலைவர் ஓமர் சுலைமான்(74 வயது) என்பவரை ஜனவரி 29-ல் துணை ஜனாதிபதியாக்கி உள்ளார்.இந்த தாத்தா இதற்கு முன்னால் இலாகா இல்லாத மந்திரியாகவும், உளவுத்துறை டைரக்டராய் இருந்தவர். பவர்ஃபுல் ஸ்பை என்று பெயர் வாங்கியவர்.

ஹோசினி முபாரக், அஹம்மது சாபிக்(69) என்பவரை அரசு அமைக்கும் படி கேட்டுக் கொண்டுள்ளார். சஃபிக் பிரதம மந்திரியாக ஜனவரி 31-ல் பொறுப்பேற்றுக் கொண்டுள்ளார். இவர் எகிப்தின் ஏர்ஃபோர்ஸ் கமாண்டராக இருந்தவர். பிறகு ஏவியேஷன் மந்திரியாக இருந்தவர்.எகிப்தின் ஏர்போர்ட்டுகளை மிகவும் மாடர்னாக மாற்றியவர்.

இந்தியா உட்பட அனைத்து நாடுகளும் தங்கள் நாட்டு மக்களை எகிப்தில் இருந்து திரும்பி அழைத்துக் கொண்டு உள்ளன. யாரும் எகிப்திற்கு பயணம் மேற்கொள்ள வேண்டாம் என்றும் அனைத்து நாடுகளும் தங்கள் நாட்டு மக்களை கேட்டுக் கொண்டன.

எகிப்து அரசு இணையத்தினையும், செல்ஃபோன் பயன்பாட்டினையும் சரியாக பயன்படுத்த முடியாத படி முட்டுக்கட்டை போட்டுள்ளது. ஆனால்

Hacktivism மூலமாக எகிப்தியர்கள் இவை இரண்டினையும் உபயோகப்படுத்த முடிகிறது.

முபாரக் அடுத்த செப்டம்பர்,2011 ஜனாதிபதி தேர்தலில் போட்டியிட போவதில்லை எனவும், அரசியலமைப்பில் சில மாறுதல்கள் செய்ய இருப்பதாகவும் பிப்ரவரி 1-ல் அறிவித்து உள்ளார். இந்த எகிப்தின் மண்ணில் தான் தான் சாக விரும்புவதாகவும்,இந்த நாட்டை விட்டு செல்ல மாட்டேன் என்றும் அறிவித்து உள்ளார். ஆனால், புரட்சியாளர்கள் உடனே முபாரக் பதவி விலக வேண்டும் என்று நினைக்கிறார்கள்.

பிப்ரவரி 2 மதியம் முபாரக்கின் ஆதரவாளர்களுக்கும், எதிர்ப்பவர்களுக்கும் இடையே பிரச்சனை ஏற்பட்டதில் 13 பேர் இறந்தும், 600 பேர் காயமடைந்தும் இருக்கின்றனர். 9 நாட்களாக புரட்சி நடந்து வருகிறது. பிப்ரவரி 2-ல் புது திருப்பமாக முபாரக்கின் ஆதரவாளர்கள் 20 ஆயிரம் பேர் களத்தில்.

லிபியா,அல்ஜீரியா,ஏமன் முதலிய நாடுகளில் புரட்சி வெடிக்கலாம் என தெரிகிறது. பெட்ரோலின் விலை இன்னும் ஏறுவதற்கு சாத்தியங்கள் உள்ளன.தினம் 2.4 மில்லியன் பேரல் ஆயில் எகிப்தில் இருக்கும் சூயஸ் கால்வாய் வழியாக வருவதால் புரட்சி நீடித்தால் இன்னும் விலையேற்றம் ஏற்படும்.

வெள்ளிக் கிழமைக்குள் பிப்ரவரி 4,அதிபர் பதவி விலக வேண்டும் என்பது மக்களின் வேண்டுகோள். நேற்று ஏற்பட்ட மோதல் காரணமாக ராணுவம் போராட்டக்காரர்களை போராட்டத்தினை கைவிட கோரி அழைப்பு விடுத்துள்ளது.

அடுத்த தலைவர் யார்?

முகம்மது முஸ்தஃபா எல்பராடி(68):

ஜனவரி 27-ல் தஹ்ரிர் ஸ்கொயரில் நடந்த புரட்சியாளர்கள் கூட்டத்தில் உரையாற்றி உள்ளார். பிப்ரவரி 1-ல் ஒரு மில்லியன் மக்கள் இந்த ஸ்கொயரிலும், அடுத்து உள்ள தெருக்களிலும் கூடி உள்ளனர். அடுத்து அமைய போகும் புதிய அரசிற்கு மக்கள் விரும்பினால் தலைமை தாங்குவதாய் அறிவித்து உள்ளார்.முஸ்தஃபா எல்பராடி ஒரு வக்கீல் ஆவார். இவர் 2005 அமைதிக்கான நோபல் பரிசு பெற்றவர்.அனாதை இல்லங்களுக்கு தான் பெற்ற தொகையினை கொடுத்து விட்டார்.

ஐக்கிய நாட்டு சபையின் இண்டர்நேஷனல் அட்டாமிக் எனர்ஜி ஏஜன்சியின்(IAEA) டைரக்டராய் பணி புரிந்தவர்.மூன்று முறை இந்த பதவியினை வகித்தார். (1997-2009).உலக அளவில் நோபல் பரிசினை தவிர உலக அளவில் 18 பரிசுகளை வாங்கி உள்ளார்.இவரின் மகள் லண்டனில் வக்கீலாகவும், மகன் கெய்ரோவில் ஐடி மேனஜராகவும் இருக்கிறார்கள். வியன்னாவில் வசித்து வந்தார். பெரும்பான்மையான வருடங்கள் இவர் கெய்ரோவில் இருக்கவில்லை என்பது இவரது பலகீனம்.நேஷனல் அசோஷியேசன் ஃபார் சேன்ஞ் என்ற அமைப்பினை ஏற்படுத்தி உள்ளனர்.தடை செய்யப்பட்ட இயக்கமான முஸ்லீம் சகோதரத்துவக் கட்சி, அராப் லீக் இயக்கிதனரினை இவர் சந்தித்து இருக்கலாம் என்று செய்தி.இவர் ஜனவரி 30-லிருந்து இப்போது வீட்டு காவலில் வைக்கப்பட்டு இருக்கிறார்.

அமெரிக்கா ஒரு பக்கம் முபாரக்கினை ஆதரித்துக் கொண்டே புரட்சியாளர்களை ஊக்குவிப்பதாக விக்கிலீக்ஸ் இணையதளம் ஆதாரங்களை வெளியிட்டு உள்ளது.செப்டம்பர் தேர்தலுக்கு முன்பாகவே முபாரக்கினை பதவி விலகிட செய்யுமாறு அமெரிக்கா நினைத்துள்ளதாக விக்கிலீக்ஸ் வெளியிட்டு உள்ளது.எகிப்தில் உள்ள அமெரிக்க தூதரகம் புரட்சியாளர்களுடன் கடந்த இரண்டு ஆண்டுகளாக தொடர்பு வைத்துள்ளதாக கூறுகிறது.
20 முதல் 35 வயதுடைய ஏறத்தாழ 1,60,000 எகிப்து ப்ளாகர்கள் அரேபிய மற்றும் ஆங்கிலத்தில் முபாரக்கின் ஆட்சிக்கு எதிராக எழுதி வந்துள்ளனர்.

இந்தியாவும், எகிப்தும்: நாசர்-நேரு காலத்தில் இருந்தே இரு நாட்களும் நட்புறவுடன் பொருளாதார மேம்பாட்டுக்காக உடன்படிக்கை செய்த வண்ணமே உள்ளன. 2008 நவம்பரில் ஹோஸ்னி முபாரக் இந்தியாவிற்கு வருகை தந்து மன்மோகன் சிங்கினை சந்தித்து பேசினார். அணிசேரா நாடுகளின் அமைப்பில் இரு நாடுகளும் உறுப்பினர்கள். எகிப்தில் நடந்த அணிசேரா நாடுகளின் கூட்டத்தில் கலந்துக் கொள்ள 2009-ல் மன்மோகன் சிங் எகிப்திற்கு சென்றார்.எகிப்து இந்தியாவிற்கு 3.30 மணிநேரம் பின்னால் இருக்கிறது. சர்க்கரை,பருத்தி ஆடைகள், பருத்தி நூல்களை,சணல்,பிளாஸ்டிக், ரப்பர், கெமிக்கல்ஸ் முதலியன இந்தியா எகிப்திற்கு ஏற்றுமதி செய்கிறது. இந்தியாவின் ஓபராய் ஹோட்டல் கெய்ரோவில் உள்ளது.ஏசியன் பெயிண்ட்ஸ்,ரான்பாக்ஸி,டாட்டா மோட்டார்ஸ், அசோக் லேய்லாண்ட்,யூனிட் ட்ரஸ்ட் ஆப் இந்தியா,டாபர் இந்தியா போன்ற கம்பெனிகள் எகிப்தில் உள்ளன.

நம் பதிவர் துபாய் ராஜாவிடம், அவர் எகிப்தில் இன்னும் இருந்தால் மற்ற செய்திகளை எதிர்ப்பார்க்கலாம்.

அம்மா

2011-02-01T10:52:00.001+05:30

எப்பவும் ஏன் உன் கூடவே அம்மா இருக்காங்க உன் உடன் பிறந்தவர்களுக்கும் அவர்கள் அம்மா தானே? ஏன் அவர்கள் வீட்டிற்கு போனால் உடனே ஓரிரு நாட்களில் திரும்ப வந்து விடுகிறார்கள் என்று சமயங்களில் யாரேனும் என்னிடம் கேட்கிறார்கள்.கொஞ்சம் யோசித்ததில் அங்கெல்லாம் போனால் ஒரு விருந்தாளி போல் தான் அவர்களால் இருக்க முடிகிறது என்று புரிந்தது.

காலையில் சீக்கிரம் எழுந்து பாத்ரூம் போகும் போதே ஹீட்டர் போட்டு விட்டு வருவாங்க. பிறகு பால் காய்ச்சி அதை அப்படியே கொண்டு போய் சாமி ரூமில் வைத்து கும்பிட்டு வருவதில் ஆரம்பிக்கும் அம்மாவின் ஒரு நாள்.

குளித்து விட்டு வந்து சூடாக ஒரு காஃபி குடிச்சுட்டு அப்படியே தோட்டத்தில் துளசி மாடத்தில் பூ போட்டு, சுத்து சுத்திட்டு சாமி அறைக்குள் நுழைந்தால் ஒரு மணிநேரம் பொழுது போகும்.

வந்து காலை டிபன் சாப்பிட்டு விட்டு என் பசங்க, தன் தம்பியான என் கணவரிடம் பேசி கொண்டே தமிழ் பேப்பர் படித்து கொண்டு இருப்பார்கள்.

அப்புறம் கிச்சன் வந்து நான் நறுக்கி வைத்து இருக்கும் காய்கறிகளை செய்வார்கள் அல்லது ரசம் புளிப்பு கொஞ்சம் தூக்கலாய் வைப்பார்கள்.

காய்கறி சூப் செய்து ஒரு க்ளாஸ் குடித்து விட்டு என் பசங்களையும் குடிக்க செய்வார்கள்.

பின் காலை 11 மணிவரை ஏதேனும் புத்தகம் ஆன்மீகம், ஆலயம், பாலஜோதிடம், துக்ளக் என்று படிப்பார்கள். டாணென்று 11 மணிக்கு சன் சேனலில் சீரியல் ஆரம்பம்.

12.30 க்கு மதியம் காக்காவும், அம்மாவும் சாப்பிடுவார்கள்.சாப்பிட்டு விட்டு ஒரு மணிநேரம் படுக்கையில் படுத்துக் கொண்டே புத்தகம் வாசித்தல். பிறகு 2.30 மணிக்கு டி.வியில் திருப்பதி சேனல் பார்த்துக் கொண்டே,எதாவது எம்பிராய்டரி,தையல் வேலை, டைரியில் சாமி ஸ்தோத்திரம் எழுதுதல்.நடு நடுவே தன் சின்ன வயது நிகழ்வுகளை, தான் பட்ட கஷ்டங்களை, தன் அம்மாவின் கதையினை என்னிடம் கூறுதல். நிறைய முறை இது ரிப்பீட்டு கதையாக இருக்கும்.மதியம் வீட்டில் இருக்கும் எதாவது ஒரு பொருளை கணக்கு வைத்து வெயிலில் காய வைத்து எடுத்து வைப்பார்கள். தூள் வகைகள்,காய்ந்த பூக்கள்,தலையணை, பெட்ஷீட் உட்பட எதாவது வெயிலில் தினம் ஒன்றாய் காயும்.

மாலை 5 மணிக்கு ஒரு டீ குடித்து விட்டு கோயில். நடந்த மாதிரியும் இருக்கும்,சாமி கும்பிட்ட மாதிரியும் இருக்கும்.6 மணிக்கு வீட்டிற்குள் வருவார்கள்.திரும்ப சாமி ரூமில் கொஞ்ச நேரம்.7.30க்குள் ராத்திரி டிபன் முடித்து விடுவார்கள்.9 மணிவரை டி.வி இல்லையெனில் புத்தகம்.கீரை எதுவும் இருந்தால் அதை சுத்தம் செய்து வைத்து விடுவார்கள்.அவர்களின் காய்ந்த துணிகளை மடித்து வைப்பார்கள்.நடு நடுவில் மற்ற மகன், மகள்களுடன் ஃபோனில் பேச்சு.

டாண்ணு 9 மணிக்கு தூக்கம்.இது தான் அம்மாவின் ஒரு நாள்.

யாருக்கும் ஒரு தொந்தரவு இல்லாமல் தன் வேலையினை தானே முடித்து கொள்ளுதல்.வாரம் இரண்டு முறை பூண்டு,இஞ்சி தட்டிப்போட்டு காய்ச்சிய நல்ல எண்ணெய் குளியல், சீயக்காய் பொடியினை சோற்று கஞ்சியுடன் சேர்த்து தலைக்கு தேய்ப்பார்கள்.அரைத்த வெந்தயம், முட்டை, மருதாணி என்று எதாவது தலைக்கு வைத்து குளிப்பார்கள். உடலுக்கு தானே செய்து வைத்துள்ள வாசனை பொடி+பயத்தம் மாவு போட்டு குளியல்.

வரமிருமுறை இஞ்சி சாறு குடித்தல்.காய்கறி சூப் குடித்தல்.ஏதேனும் பழச்சாறு குடித்தல். சத்துமாவு கஞ்சி, ஓட்ஸ் கஞ்சி குடித்தல்.

வாரம் ஒரு முறை அடை,உளுந்து வடை,வெண்பொங்கல்,பணியாரம்,ஆப்பம், இடியாப்பம், புட்டு,அப்பம் கட்டாயம் செய்து விடுதல்.

வெள்ளிக்கிழமை, மற்ற நல்ல நாட்களில் வாசல் அடைத்து காவி கோலம் இடுதல்.சலிக்காமல் அம்மா செய்ற இந்த வேலைகளுக்கு என் வீடு தான் வசதி. அவர்களுக்கு வேண்டிய அனைத்து சாமான்களும் இங்கு தான் உள்ளன.50 வருடங்களாக அவர்கள் கும்பிடும் சாமி படங்கள் என் வீட்டில் தான் உள்ளன.

பழைய புத்தகங்கள், டைரிகள்,எம்பிராய்டரி துணிகள்,நூல்கள்,மருந்து பொடி,தேன்,காய்ச்சிய எண்ணெய்கள்(கீழாநல்லி,மருதாணி, அருகம்புல்,கடுக்காய்), வாசனை பொடிகள்,சாமி படங்கள்,தினம் பார்க்கும் காக்கா என்று அனைத்தும் இங்கு தான். இங்கு தான் அம்மா வசதிக்கு செய்வதை உபயோகப் படுத்த முடிகிறது. அதான் அம்மா இங்கேயே இருக்காங்க.பி.பி செக் செய்ய போகும் டாக்டர் இங்கு வீட்டு பக்கத்தில்.
இறந்து போன அப்பாவின் பெரிய ஃபோட்டோ இங்கு தான்.துளசி பறித்து பெரிய மாலை கட்டி பெருமாளின் பெரிய ஃபோட்டாக்கும், அப்பாவிற்கு ஒரு சிறிய பூ மாலையும் அவ்வப்போது பளிச்சுன்னு போடப்படும்.

எல்லாவற்றிற்கும் மேலாக வேலைக்கு போகாத நான் அம்மாவின் துணைக்கு.

நான் பிறந்ததில் இருந்து என் கூடவே இருக்கும் என் அம்மாவிற்கு இன்று பிறந்த நாள்.

மை சிஸ்டர்ஸ் கீப்பர்

2011-01-31T12:20:00.002+05:30

தன் பெண் குழந்தை kate-ற்கு ரத்த புற்றுநோய் இருப்பதால் அவளுக்கு மருத்துவம் பார்ப்பதற்காகவே, இன்னொரு குழந்தை Anna-வை பெற்றுக்கொள்கிறார்கள் பெற்றோர். 10 வயது வரை Anna தன் சகோதரி kate மருத்துவத்திற்கு உதவுகிறாள்.

kate-ற்கு கிட்னி ஃபெயிலர் ஆகிறது. ஆனால் Anna தன் கிட்னியினை சகோதரி kate-ற்கு கொடுக்க மறுத்து,கட்டாயப்படுத்தும் தன் தாய் மீது கேஸ் ஃபைல் செய்கிறார். ஆமாம் kate-ற்காக ஏன் Anna இப்படி கஷ்டப்பட வேண்டும் என்று தான் நமக்கும் தோன்றுகிறது.கேஸ் நடக்கும் போது அவர்களின் சகோதரன் உண்மையினை கூறி விடுகிறான். அதாவது Kate தான் கிட்னி வேண்டாம் என்றும், அந்த ஆபரேஷனால் தான் உயிர் பிழைக்க மாட்டேன் என்றும் தன் தங்கையினை கிட்னி கொடுக்க மறுக்கும் படி கூறி தன் பெற்றோர் மீது கேஸ் போடும்படி சொல்லி இருக்கிறாள்.

Cameron Diaz

ஒரு அழகான அமெரிக்க குடும்பம். தாயாக வரும் Cameron Diaz சூப்பர் நடிப்பு. அந்த பெண்கள் இருவரும் மிகவும் அருமையாக நடித்து இருக்கிறார்கள். நிறைய இடங்களில் நம் கண்களில் கண்ணீர். கேன்சர் என்னும் இந்த கொடிய அரக்கனை வெல்வது எப்போது?.கீமோவின் பின்விளைவுகள் பயமுறுத்துகின்றன.கேட்டின் பாய்ஃப்ரெண்டும் கேன்சர் நோயாளி.குழந்தைகளின் அப்பாவாக வருபவரும் அருமையாக வருகிறார்.

Anna

Kate

ஒரு நல்ல படம் பார்த்த திருப்தி.

கரண்டி முட்டை

2011-01-28T16:00:00.004+05:30

முட்டையினை கரண்டியில் சமைப்பதால் இது கரண்டி முட்டை.
கரண்டி இப்படி நல்லா குழியாய் (கட்டாயம் கருப்பாய்!!!) இருக்க வேண்டும்.உடைத்த முட்டை, பொடித்த உப்பு,தட்டிய சோம்பு,பொடித்த மிளகு போட்டு கலந்து,இப்படி ஊற்றி கொஞ்சமாய் எண்ணெய் ஊற்றி ஸ்பூனால் ஒரு திருப்பு திருப்பினால்

இப்படி கரண்டி முட்டை ரெடி.

இதனுள் முட்டை வேகும் போது கொஞ்சமா வேக வைத்த கறித்துண்டுகள், கோழித்துண்டுகள் பிச்சுப் போட்டால் ஒரு கரண்டி முட்டை ஹோட்டல்களில் 60 ரூபாயாம். பிரியாணி போல இல்லாமல் ஆத்துக்காரர் உதவியின்றி நானே சாப்பிட்டது.சாரி செய்தது.

வெரைட்டி-தை-2011

2011-01-27T14:30:00.004+05:30

பொங்கல் அன்று எதிர் வீட்டில் 3 மாதம் முன்பு புதியதாய் குடி வந்து இருக்கும் ஒரு குடும்பத்திற்கு பொங்கல் கொடுத்து வாடா என்று நகுலிடம் கேட்ட போது, போங்கம்மா அந்த வீட்டில் யாரும் முகம் கூட பார்க்க மாட்டாங்க, பேசவே மாட்டாங்க நான் போக மாட்டேன் என்றான், நீங்களும் பேசி நான் பார்த்தது இல்லை என்ன திடீரென்று பொங்கல்,பாயாசம் என்று பார்சல் என்றான். அதற்கு ரிஷி நகுலிடம் சொன்ன பதில் கடைசி பத்தியில்.

போன வாரம் தம்பி மகன் விஷால் ஸ்கூல் டே ஃப்ங்ஷன். சார் டான்ஸ் ஆடுகிறேன் என்று 10 நாளா தினம் ஃபோனில் சொல்லிட்டே இருந்தான்.சரி என்று ஸ்கூலுக்கு போனேன். உன் கூட ஆடப்போகும் பெண் பெயர் என்னடா கேட்டால் ஒரே வெட்கம் சாருக்கு. அப்புறம் ரொம்ப அலட்டிக் கொண்டு ஒரு குட்டிப் பெண்ணை காண்பித்தான். பெயர் எல்லாம் தெரியாது என்று சொல்லிட்டான்.சரியென்று அந்த பெண்ணிடம் பெயர் கேட்டேன். அது அதிபயங்கர வெட்கத்தில் ப்ரியா என்று சொல்லிச்சு. உடனே இவன் மம்மி நீங்க யார் கிட்டேயும் இதை சொல்ல கூடாது என்று சொல்லிட்டான்.இது ஏன்னுதெரியலை. வெட்கமாம்.மூன்றாவதாக அவனின் ப்ரோக்ராம் வந்தது. நல்லாதான் ஆடினார்கள். ஆனால் குழந்தைகள் போட்டிருந்த ட்ரெஸ் கலர் தான் சகிக்கலை. மண் கலர், மரக்கலர்,இட்லி பொடிக்கலர்,மூக்குப்பொடி கலர் என்ன ரசனையோ அந்த டீச்சருக்கு. வேறு டான்ஸ் ஆடினவர்கள் எல்லாம்

கலர்ஃபுல்லாய் இருக்க இவர்கள் ட்ரெஸ் கொடுமையாய் இருந்தது. ஆனால், குழந்தைகள் முகத்தில் இருந்த வெட்கம் கலந்த சிரிப்பு பார்க்க பார்க்க சூப்பர்.

போன வீக் எண்டில் ஒரு சூறாவளி சுற்றுப்பயணம். திண்டுக்கல், சோழவந்தான், சுல்தான்பேட்டை, கோயமுத்தூர் என பஸ்ஸிலேயே சுற்றி விட்டு வந்தோம்.சோழவந்தான் ஒரு குட்டி கேரளா.திண்டுக்கல் டூ வாடிப்பட்டி தனியார் பஸ்ஸில் இளையராஜா ராஜ்ஜியம் தான்.பாட்டு கேட்டுக் கொண்டே பசுமையில் பயணம் அருமையாக இருந்தது.

அப்புறமா சுல்தான்பேட்டை பஞ்சாயத்து யூனியன் அலுவலகத்தில் வேலை பார்க்கும் மாமா பெண் வீட்டிற்கு ஒரு விசிட்.மேடம் அலுவலகமும், வீடும் ஒரே காம்ப்பவுண்டினில்.காலை டீ,மதிய சாப்பாடு, மாலை டிபன் என வீட்டிற்கு அடிக்கடி விசிட் செய்கிறார். ஆனால், லீவு போட்டால் கூட வேலை செய்ய வேண்டி இருக்கும் சில சமயங்களில் என சலித்துக் கொண்டார்.

கோயம்புத்தூரில் என் கணவரின் ஃப்ரெண்ட் கேன்சருக்கு ட்ரீட்மெண்ட் எடுத்துக் கொண்டு இருக்கிறார். அவரை பார்க்க சென்றோம். நானெல்லாம் தண்ணீ அடிச்சேன், ஸ்மோக் செய்தேன்.இப்ப அனுபவிக்கிறேன் , ஆனால் எந்த தப்பும் செய்யாத குழந்தைகள் என்ன பாவம் செய்தார்கள். கீமோவிற்கு செல்லும் போது அங்கு ட்ரீட்மெண்ட் செய்ய வரும் 5 வயது குழந்தைகளை நினைத்து தான் அவர் புலம்பினார். இந்த கேள்விக்கு பதில் தெரியலை.

போன மாதம் ஒரு நாள் மதியம் வீட்டில் நான் இல்லாத போத பூட்டி இருந்த வீட்டு வாசலில் எனக்கு ஃபோன் செய்துட்டு ரிஷி காத்து இருந்த போது அந்த எதிர் வீட்டு பெண் உன் அக்கா காலையில் 11 மணிக்கு போனாங்க, நீ வேணா என் வீட்டில் வெயிட் செய் என்று சொல்லி இருக்கிறார். ஆண்ட்டி அவுங்க என் அக்கா இல்லை, என் அம்மா, ஃபோன் செய்துட்டேன் இப்ப வந்துடுவாங்க என்று சொல்லி இருக்கிறான்.அன்று நான் வந்ததும் உங்களை அக்கா என்று நினைச்சுட்டாங்கம்மா என்று சிரித்தான்.அன்றுஅக்கான்னு அவுங்க சொன்னதுக்கு தான் நான் பொங்கல் கொடுக்கிறேனாம்.இல்லையே! ஒரு நட்பு உணர்வுடன் கொடுத்தால் இந்த காலத்து பசங்க இருக்காங்களே !!!

ஒரு உப்பு டப்பாவின் பயணம்

2011-01-19T16:56:00.001+05:30

போன வாரம் என் ஃப்ரெண்ட் ஜெயா வீட்டிற்கு போன போது வழக்கம் போல் இரண்டு பேரும் பேசிக் கொண்டே சேர்ந்து சமைத்தோம்.அதாவது நான் பேசிக்கொண்டும், ஜெயா சமைத்துக் கொண்டும். சமைத்ததை சாப்பிட்டோமா என்றெல்லாம் கேட்க கூடாது. அவளுடைய இரண்டு பெண்களும், என்னுடைய இரண்டு பசங்களும் எதற்கு இருக்கிறார்கள்.எங்கள் சமையல் ஆராய்ச்சியின் எலிகளே அவர்கள் தானே.

ஆஹா!!! சமையலுக்கு தூள் உப்பு எடுத்த போது அந்த உப்பு டப்பாவை பார்த்து நான் அசந்தே விட்டேன்.மூடியில் லேசாக உடைந்த பகுதிக்கு செலோ டேப்பால் ஒரு ஒட்டு போடப்பட்டிருந்தது.நான் அசந்தது அந்த ஒட்டை பார்த்து அல்ல.அசந்த நான் இப்பொழுது சிரிக்க ஆரம்பித்தேன்.ஜெயா என்ன இது என கேட்டுக் கொண்டே நான் சிரிக்க கூடவே சேர்ந்து ஜெயா சிரிக்க எங்கள் அட்டகாச சிரிப்பை கேட்டு பசங்க எல்லாம் கிச்சனில் ஆஜர்.

என்ன மம்மி சொல்லிட்டு சிரிங்க என்று ஒரே நொச்சு.சிரிப்பால் எனக்கு விஷயத்தினை சொல்லவே முடியவில்லை.ஜெயாவிற்கும் சொல்ல முடியவில்லை. அந்த டப்பாவை என் கைக்கு அருகில் பார்த்ததும் என் ஃப்ரெண்ட் மகள் வைஷ்ணவிக்கு புரிந்து போச்சு. ஓ, இதுவா ஆண்ட்டி என்று சொல்லி விட்டு மற்றவர்களுக்கு எங்கள் சிரிப்பின் காரணத்தினை சொல்லி கொண்டு இருந்தாள்.

அதாவது இந்த உப்பு டப்பாவிற்கு ஒரு வரலாறு இருக்கிறது.
டப்பா தன் பயணத்தினை நெல்லையில் ஆரம்பித்து ஹைதை,மீரட்,
ரூர்க்கி,பெங்களூர்,வெலிங்க்டன், ஷில்லாங், நாசிக் என 20 வருடங்களாக ஒவ்வொரு ஊரிலும் ஒரு மூன்று வருடம் இருந்துட்டு இப்ப சென்னை வந்துள்ளதே அது தான் என் சிரிப்பிற்கு காரணம்.

அப்படி என்ன சிற(ரி)ப்பு அந்த டப்பாவில்.அது நாங்கள் ஆறாப்பு படித்த போது க்ளாசில் மிகவும் அமைதியாக இருக்கிறாள் என்று(என் கூட சேர்ந்து இருந்தும்) எங்கள் க்ளாஸ் டீச்சர் ஜெயாவிற்கு பரிசாக கொடுத்தது.அவள் வாழ்க்கையில் வாங்கிய ஒரே பரிசு அதான் என்பதால் அந்த டப்பாவிற்கு அவ்வளவு மகிமை.உப்பு தினம் சமையலுக்கு எடுத்தே ஆக வேண்டும் எனவே அந்த டப்பாவை தினம் பார்க்கலாம் என்பதால் அந்த டப்பா 20 வருடங்களாக உப்பை சுமக்கிறது.ஜெயாவின் கணவர் ஆர்மியில் ஆஃபிசர்.அதான் இத்தனை ஊர் சுற்றல்.

நகுல் ம்மா இப்படி சிரிக்கிறீர்களே, ஆண்ட்டியாவது ஒரு பரிசாவது வாங்கி இருக்காங்க நீங்க என்னம்மா வாங்கினீங்க என்ற போது எங்கள் ஃப்ரெண்ட்ஷிப் தான் நான் வாழ்க்கையில் பெற்ற பரிசு என்று சொல்லணும் போல் இருந்தாலும், அந்த கேள்வியே காதில் விழாது போல் விழுந்து விழுந்து சிரித்துக் கொண்டே இருந்தேன்.